'പ്രിയപ്പെട്ട മമ്മൂട്ടിച്ചേട്ട'നു വന്ന അനേകം കത്തുകളിലൊന്നിന്റെ കഥ

'രേഖാചിത്രം' എന്ന സിനിമയുടെ സസ്പെൻസ് ഒളിഞ്ഞുകിടന്നിരുന്നത് മമ്മൂട്ടിച്ചേട്ടനു വന്നിരുന്ന കത്തുകളിലാണ്. തുടക്കകാലം തൊട്ടേ ഇങ്ങനെ 'പ്രിയപ്പെട്ട മമ്മൂട്ടിച്ചേട്ടന്..' എന്നും 'പ്രിയപ്പെട്ട മമ്മൂക്ക..' എന്നുമൊക്കെ അഭിസംബോധന ചെയ്തുകൊണ്ടുള്ള ധാരാളം കത്തുകൾ മമ്മൂക്കയ്ക്ക് വരാറുണ്ടായിരുന്നുവെന്ന് അദ്ദേഹം തന്നെ പറഞ്ഞിട്ടുണ്ട്. കത്തുകൾ ആയിരുന്നല്ലോ പണ്ടത്തെ പ്രധാന ആശയവിനിമയോപാധി. മമ്മൂക്കയുടെ ചെന്നൈയിലെയും കൊച്ചി ജവഹർന​ഗറിലെയും പനമ്പിള്ളി ന​ഗറിലെയും വീടുകളുടെ വിലാസത്തിൽ ധാരാളം കത്തുകൾ വരുമായിരുന്നു. അതിലേറെയും ആരാധനയുടെ അക്ഷരങ്ങൾ കൊണ്ട് എഴുതിയതായിരുന്നു. പക്ഷേ അങ്ങനെയല്ലാത്ത ചില കത്തുകളും അദ്ദേഹത്തെ തേടിവന്നു. അതിൽ ചിലതിൽ ഒളിഞ്ഞിരുന്നത് ഒരു സിനിമാക്കഥയിലേതുപോലെയുള്ള ചില സംഭവങ്ങളാണ്.

2011-ൽ ആണെന്ന് തോന്നുന്നു. ഞാൻ അങ്കമാലി ലിറ്റിൽ ഫ്ളവർ ആശുപത്രിയിൽ ജോലി ചെയ്യുന്ന സമയം. ഒരു ദിവസം രാവിലെ ജോർജേട്ടന്റെ കോൾ വരുന്നു. 'എപ്പഴാണ് ലൊക്കേഷനിലേക്ക് വരുന്നത്?' ഈ ചോദ്യം കേട്ടാൽ പിന്നെ ലൊക്കേഷനിലേക്ക് ഉടൻ പോകുക എന്നതാണ് ശീലം. ലൊക്കേഷനിലേക്ക് ഉടൻ വരണം എന്നുതന്നെയാണ് ആ ചോദ്യത്തിന്റെ അർഥം. അത് മമ്മൂക്ക ചോദിക്കുന്ന ചോദ്യമാണ്.

കളമശ്ശേരിയിലായിരുന്നു ലൊക്കേഷൻ. പിറ്റേന്നുതന്നെ ചെന്നു. മമ്മൂക്കയെ കണ്ടു. പതിവുള്ള കുശലമൊക്കെ കഴിഞ്ഞപ്പോൾ അദ്ദേഹം പറഞ്ഞു: 'ഞാൻ ഒരു സാധനം തരാം....ജോർജേ അതിങ്ങ് എടുത്തേ...'ജോർജേട്ടൻ എന്തോ ഒരു കടലാസ് മമ്മൂക്കയ്ക്ക് എടുത്തുകൊടുത്തു. മമ്മൂക്ക തുടർന്നു: 'ഇത് കഴിഞ്ഞ ദിവസം വീട്ടിലേക്ക് വന്ന ഒരു കത്താണ്. ഇതിൽ പറഞ്ഞിട്ടുള്ള കാര്യമൊക്കെ സത്യമാണോ എന്ന് അന്വേഷിക്കണം. സത്യമാണെങ്കിൽ നമുക്ക് എന്തെങ്കിലും ഉടൻ ചെയ്യണം..'

ലൊക്കേഷനിൽ മമ്മൂക്കയ്ക്ക് അരികെ നിന്നുകൊണ്ടുതന്നെ ഞാൻ ആ കത്ത് വായിച്ചു. കൊല്ലം നീണ്ടകര ഭാ​ഗത്തുള്ള ഒരു അനാഥാലയത്തിൽ നിന്നുള്ള കത്തായിരുന്നു അത്. ഒരു പെൺകുട്ടിയാണ് എഴുതിയിരിക്കുന്നത്. സ്വകാര്യത മാനിച്ച് ലൂസിയ എന്ന് തത്കാലം വിളിക്കാം,നമുക്ക്. ലൂസിയ അനാഥാലയത്തിലാണ് കുട്ടിക്കാലം തൊട്ടേ പഠിച്ചുവളർന്നത്. ഇപ്പോൾ പന്ത്രണ്ടാംക്ലാസ് പൂർത്തിയായി. തുടർന്ന് പഠിക്കണമെന്ന് ആ​ഗ്രഹമുണ്ട്. നേത്രപരിശോധനയ്ക്കും മറ്റുമുള്ള ഒപ്ടോമെട്രിയാണ് പഠിക്കാൻ ഉദ്ദേശിക്കുന്നത്. പക്ഷേ അനാഥാലയത്തിൽ നിന്ന് തുടർപഠനത്തിന് സ​ഹായം കിട്ടില്ല. ഒപ്ടോമെട്രി കോഴ്സ് സൗജന്യമായി പഠിപ്പിക്കുന്ന സർക്കാർ സ്കോളർഷിപ്പ് പദ്ധതികളുമില്ല. അതുകൊണ്ട് തുടർപഠനത്തിന് മമ്മൂക്ക സഹായിക്കണം. ഇതായിരുന്നു കത്തിന്റെ ഉള്ളടക്കത്തിന്റെ ചുരുക്കം.

ആ കത്തുവായിച്ചപ്പോൾ മമ്മൂക്കയ്ക്ക് ചില സംശയങ്ങൾ തോന്നി. അനാഥാലയങ്ങൾ,പ്രത്യേകിച്ച് ക്രൈസ്തവസഭകളുടെ നേതൃത്വത്തിലുള്ളവ തുടർപഠനത്തിന് സ​ഹായംനല്കില്ലേ? അപ്പോൾ പിന്നെ എന്തിനാണ് ഇങ്ങനെയൊരു കത്ത്? എന്തെങ്കിലും തട്ടിപ്പുണ്ടോ. ലൂസിയ എന്ന പെൺകുട്ടിയുടെ പേരിൽ വേറെ ആരെങ്കിലുമാണോ ഇത് അയച്ചിരിക്കുന്നത്. അതെല്ലാം ഒന്ന് അന്വേഷിക്കണം. അതുകൊണ്ടാണ് മമ്മൂക്ക കത്ത് തന്നപ്പോഴേ പറഞ്ഞത് 'സത്യമാണോ എന്ന് അന്വേഷിക്കണം' എന്ന്. പക്ഷേ അതിനുശേഷം പറഞ്ഞ വാചകത്തിനായിരുന്നു കൂടുതൽ ഊന്നൽ. 'സത്യമാണെങ്കിൽ നമുക്ക് എന്തെങ്കിലും ചെയ്യണം.'

നീണ്ടകര ഭാ​ഗത്ത് കാര്യമായ ബന്ധങ്ങളില്ലാതിരുന്നതിനാൽ ഞാൻ കെയർ ആന്റ് ഷെയറിന്റെ ദൈനംദിനപ്രവർത്തനങ്ങൾ നോക്കാൻ നിയുക്തനായിരുന്ന തോമസ് കുര്യൻ അച്ചനെ അന്വേഷണം ഏല്പിച്ചു. അച്ചൻ ആ അനാഥാലയത്തിൽ നേരിട്ടുചെന്നു. അതിന്റെ നടത്തിപ്പുകാരോട് വിവരം തിരക്കിയപ്പോൾ മനസ്സിലായി കത്തിൽ പറഞ്ഞത് സത്യമാണ്. പന്ത്രണ്ടാംക്ലാസുവരെ പഠിപ്പിക്കാനേ അനാഥാലയങ്ങളുടെ നിയമാവലി അനുശാസിക്കുന്നുള്ളൂ. പന്ത്രണ്ടാം ക്ലാസ് കഴിയുമ്പോൾ കുട്ടികൾ സ്വതന്ത്രരാകും. എന്തു ചെയ്യണം എന്നറിയാത്ത അവസ്ഥയിലായിരിക്കും അവർ. ഈ ഒരു വിഷമാവസ്ഥ പല അനാഥാലയങ്ങളിലുമുണ്ട്.

ഇക്കാര്യം മമ്മൂക്കയെ ധരിപ്പിച്ചപ്പോൾ അദ്ദേഹത്തിനും അതൊരു പുതിയ അറിവായിരുന്നു. 'പന്ത്രണ്ടാം ക്ലാസ്സിനുശേഷം പഠിക്കാൻ പറ്റാത്ത കുട്ടികൾ എന്തു ചെയ്യും?' ഒരു രക്ഷകർത്താവിന്റെ മാനസികാവസ്ഥയിൽ മമ്മൂക്ക ചോദിച്ചു. വിശദമായ അന്വേഷണത്തിൽ ബോധ്യപ്പെട്ടു; കുറേപ്പേർക്കൊക്കെ പന്ത്രണ്ടാംക്ലാസ് കഴിയുമ്പോൾ സ്പോൺസർമാരെ കിട്ടുന്നുണ്ട്. പക്ഷേ ആ ഭാ​ഗ്യം കിട്ടാത്തവരുമുണ്ട്. നിർഭാ​ഗ്യവാന്മാരും നിർഭാ​ഗ്യവതികളുമായ കുട്ടികൾ. അവരൊക്കെ എന്തുചെയ്യും?

'എന്തുചെയ്യും' എന്ന ആ ചോദ്യം മമ്മൂക്കയുടെ മനസ്സിലുമുണ്ടായി. എന്തു ചെയ്യാൻ പറ്റും എന്ന ആലോചനയായി പിന്നീട്. മുതിർന്ന കുട്ടികളുടെ തുടർ‍പഠനകാര്യമാണ്. സൂക്ഷിച്ചുകൈകാര്യം ചെയ്തില്ലെങ്കിൽ വിവാദങ്ങളും അബദ്ധങ്ങളുമൊക്കെയുണ്ടാകും. അതൊന്നുമില്ലാതെ, ചതിക്കുഴിയിൽപെടാതെ സൂക്ഷ്മമായി വേണം എന്തെങ്കിലുമൊരു പദ്ധതി ആസൂത്രണം ചെയ്യേണ്ടത്. അങ്ങനെ ആദ്യഘട്ടമെന്നോണം ഒരു പഠനം നടത്തി. അതിൽ ബോധ്യപ്പെട്ട കാര്യം ഞെട്ടിക്കുന്നതും സങ്കടപ്പെടുത്തുന്നതുമായിരുന്നു. പന്ത്രണ്ടാംക്ലാസ് കഴിഞ്ഞ ഒരുപാട് കുട്ടികൾ തുടർപഠനത്തിന് അവസരം കിട്ടാതെ സംസ്ഥാനത്തിന്റെ പലയിടങ്ങളിലുമുള്ള അനാഥാലയങ്ങളിലുണ്ട്. പഠിക്കാൻ ആ​ഗ്രഹമുണ്ടായിട്ടും അത് ഉള്ളിലൊതുക്കി കഴിയേണ്ടി വന്ന പാവം കുട്ടികൾ.

അതിന്റെ വിശദാംശങ്ങളെല്ലാം മമ്മൂക്കയ്ക്ക് മുന്നിൽ അവതരിപ്പിച്ചു. ഇത്തരം ഘട്ടങ്ങളിൽ ഉടൻ തീരുമാനം എടുക്കുന്നതാണ് അദ്ദേഹത്തിന്റെ രീതി. ഒരുമിനിട്ട് സമയം പാഴാക്കിയാൽ ആ കുട്ടികൾക്ക് എന്തെങ്കിലും ഒരു അവസരം നഷ്ടപ്പെട്ടുപോയാലോ എന്ന ചിന്തയിലായിരുന്നു മമ്മൂക്കയുടെ തുടർനീക്കങ്ങൾ. 'മുരളിയോടും ​ഗീവർ​ഗീസ് യോ​ഹന്നാനോടും വിജുവിനോടും റോയിയോടുമെല്ലാം പറ‍ഞ്ഞ് പെട്ടെന്ന് നമുക്കൊരു പ്രോജക്ട് തുടങ്ങണം'-അദ്ദേഹം പറഞ്ഞു. അങ്ങനെ അതിന്റെ രൂപരേഖയായി. പന്ത്രണ്ടാംക്ലാസ് ജയിച്ചുനില്കുന്നവരിൽ പഠിക്കാൻ മിടുക്കരായ നിർധന വിദ്യാർഥികളുടെ തുടർ പഠനം കെയർ ആന്റ് ഷെയർ ഏറ്റെടുക്കും. അനാഥാലയങ്ങളിൽ മാത്രമല്ല,നിർധന കുടുംബങ്ങളിലും ഇത്തരം കുട്ടികളുണ്ടാകും. അവരെയും പദ്ധതിയിൽ ഉൾപ്പെടുത്തും.

പദ്ധതിക്ക് പേരുകണ്ടുപിടിക്കാനുള്ള ചുമതല തോമസ് കുര്യൻ അച്ചനെയാണ് ഏല്പിച്ചത്. അദ്ദേഹം അതിനായി അക്കാദമിക് രം​ഗത്ത് പ്രാ​ഗത്ഭ്യം തെളിയിച്ച മുതിർന്ന ഒരാളെ സമീപിച്ചു. എഴുത്തുകാരൻ കൂടിയായ ആ വിദ്യാഭ്യാസവിചക്ഷണൻ നിർദേശിച്ച പേര് 'വിദ്യാമധു' എന്നായിരുന്നു. പിന്നെ അതിനപ്പുറം മറ്റൊരു പേരിന്റെ ആലോചനയുടെ ആവശ്യമില്ല. കാരണം അദ്ദേഹം അത്രത്തോളം പണ്ഡിതനാണ്. 'വിദ്യാമധു' എന്ന പേര് കേട്ടപ്പോൾ മമ്മൂക്ക പറഞ്ഞു, 'കൊള്ളാവുന്ന പേരാണ്,പക്ഷേ നമുക്ക് പെട്ടെന്ന് തീരുമാനമെടുക്കേണ്ട മറ്റെന്തെങ്കിലും പേരുകൂടി നോക്കിവച്ചോളൂ' എന്ന്. പക്ഷേ ‍ഞങ്ങൾക്ക് അതിനപ്പുറമൊരു പേര് സങ്കല്പിക്കാനായില്ല. മുമ്പ് പറഞ്ഞ വ്യക്തിയേക്കാൾ മികച്ച ഒരാളോട് ചോദിക്കാനുമില്ല.

അതുകൊണ്ട് 'വിദ്യാമധു' എന്ന പേര് തന്നെ ഉറപ്പിച്ച് വീണ്ടും മമ്മൂക്കയുടെ അടുക്കലെത്തി. അദ്ദേഹം ആദ്യം പറഞ്ഞതുതന്നെ ആവർത്തിച്ചു: 'പേര് കൊള്ളാം. അർഥവുമുണ്ട്. പക്ഷേ അതിലൊരു പ്രശ്നമുണ്ട്...'എന്താണ് മമ്മൂക്ക ഉദ്ദേശിക്കുന്നതെന്ന് മനസിലാകാതെ നിന്നപ്പോൾ മമ്മൂക്ക പറഞ്ഞു: 'മധു എന്ന വാക്കിന്, തേൻ എന്നുമാത്രമല്ല മദ്യം എന്നുകൂടി അർഥമുണ്ട്. മധുപാനം എന്നൊക്കെപ്പറയുന്നതുകേട്ടിട്ടില്ലേ..മദ്യപാനം എന്നർഥം. ഇതുകുട്ടികൾക്ക് വേണ്ടിയുളള പദ്ധതിയല്ലേ. അതിന്റെ പേരിൽ ലഹരിയെന്ന് അർഥം വരുന്ന ഏതെങ്കിലും ഒരുവാക്കിന്റെ ഒരംശം വന്നാൽ പോലും അത് ഒരു കളങ്കമാണ്. ഒരിക്കലും അതുപാടില്ല. അതുകൊണ്ട് മധു എന്ന വാക്കിന് പകരം മറ്റൊരുവാക്ക് ചേർക്കാം.'

മമ്മൂക്കയുടെ ഭാഷാജ്ഞാനം മുന്നിൽവെളിപ്പെട്ട സന്ദർഭമായിരുന്നു അത്. എം.ടി.വാസുദേവൻനായരെപ്പോലെയു ള്ളവരെഴുതിയ അർഥ​ഗർഭമായ സംഭാഷണങ്ങൾ എന്തുകൊണ്ടാണ് മമ്മൂക്കയ്ക്ക് അതിന്റെ ആഴം ഒട്ടും ചോർന്നുപോകാതെ അവതരിപ്പിക്കാൻ കഴിഞ്ഞത് എന്ന് അപ്പോൾ മനസ്സിലായി. പരന്ന വായനയിലൂടെയും പ്ര​ഗത്ഭരായ എഴുത്തുകാരോടുള്ള സഹവാസത്തിലൂടെയും മമ്മൂക്ക സ്വായത്തമാക്കിയാണ് ഭാഷാപ്രയോ​ഗത്തിലുള്ള സ്വാധീനം. അതുകൊണ്ടാണ് പ്രസം​ഗിക്കുമ്പോഴും എഴുതുമ്പോഴും മമ്മൂക്കയ്ക്ക് ഒരു വാക്കുപോലും പിഴയ്ക്കാത്തത്. 'മധു' എന്ന വാക്കിനുപകരം അവസാനം അദ്ദേഹം തന്നെ ഒരുമറുവാക്ക് നിർദേശിച്ചു- 'അമൃതം.' അങ്ങനെ ആ പദ്ധതിയുടെ പേര് 'വിദ്യാമൃതം' എന്നായി. 'അമൃതം' എന്നാൽ മരണത്തെ ഇല്ലാതാക്കുന്നത് എന്നർഥം. പഠിക്കാനുള്ള കുട്ടികളുടെ മോഹം സാഹചര്യങ്ങളില്ലാത്തതിനാൽ ഒരിക്കലും മരിച്ചുപോകരുത്. പഠന സാചഹര്യമൊരുക്കി ആ മരണത്തെ ഇല്ലാതാക്കാനാണ് 'വിദ്യാമൃതം'. അമൃത് പോലെ വിദ്യനുകർന്ന് ആ കുട്ടികൾ പഠിച്ചുവളരട്ടെ. അതിലൂടെ ഇവിടെ അറിവിലൂടെ അനശ്വരരാകുന്ന ഒരു തലമുറ സൃഷ്ടിക്കപ്പെടട്ടെ.

'വിദ്യാമൃതം' പദ്ധതി പ്രഖ്യാപിച്ചപ്പോൾ നൂറിലധികം അപേക്ഷകളാണ് കിട്ടിയത്. ആദ്യഘട്ടത്തിലേക്കായി 30 കുട്ടികളുടെ അപേക്ഷകൾ ഷോർട്ട്ലിസ്റ്റ് ചെയ്തു. എല്ലാ അപേക്ഷകളുടെയും കാര്യം നേരിട്ടുഉറപ്പുവരുത്തണമെന്ന് മമ്മൂക്ക നിർദേശിച്ചിരുന്നു. അങ്ങനെ ഞങ്ങൾ എല്ലായിടത്തും പോയി നേരിട്ടു കണ്ട് ബോധ്യപ്പെട്ടാണ് കുട്ടികളെ തിരഞ്ഞെടുത്തത്. വെറുതെ നിർദേശം തന്ന് തന്റേതായ വഴിക്കുപോകുകയായിരുന്നില്ല മമ്മൂക്ക ചെയ്തത്. അദ്ദേഹം അതിനൊപ്പംതന്നെ നിന്നു. ഒരു കുട്ടിയുടെ പഠനം ഏറ്റെടുത്തുകൊണ്ട് താൻ തന്നെ വിദ്യാമൃതത്തിന് തുടക്കമിടുകയാണെന്ന് മമ്മൂക്ക പ്രഖ്യാപിച്ചു. ഷോർട്ട് ലിസ്റ്റ് ചെയ്ത അപേക്ഷകളിൽ നിന്ന് കാക്കനാട്ടെ കാരുണ്യാശ്രമം എന്ന അനാഥാലയത്തിൽ നിന്നുള്ള അപേക്ഷയാണ് അദ്ദേഹം തിരഞ്ഞെടുത്തത്. പ്ലസ് ടു ഉയർന്ന മാർക്കോടെ വിജയിച്ച് നഴ്സിങ് പഠനത്തിന് പണം കണ്ടെത്താൻ വഴിയില്ലാതെ വിഷമിച്ച കാരുണ്യാശ്രമത്തിലെ അനാഥക്കുട്ടിയായ മമതയ്ക്കുവേണ്ടി അവിടത്തെ സിസ്റ്റർ അയച്ചതായിരുന്നു അത്. സിസ്റ്റർമാർ ഒരുപാട് ശ്രമിച്ചിട്ടും തുടർപഠനം സ്പോൺസർ ചെയ്യാൻ ആളെകിട്ടിയില്ല. മമതയാകട്ടെ പഠനത്തിൽ അതിസമർഥ. നഴ്സിങ് ജോലിയാണ് അവളുടെ മനസ്സിൽ.

അങ്ങനെ മമതയെ നേരിട്ടുകാണാൻ മമ്മൂക്ക തീരുമാനിച്ചു. ചെല്ലുന്നതിന് ഒരു മണിക്കൂർ മുമ്പാണ് കാരുണ്യാശ്രമത്തിൽ വിവരമറിയിച്ചത്. അവിടെയുള്ളവർ ഞെട്ടിപ്പോയി. എന്നിട്ടും മധുരപലഹാരങ്ങളൊക്കെയൊരുക്കിവച്ച് അവർ മമ്മൂക്കയെ സ്വീകരിച്ചു. മമ്മൂക്ക മമതയ്ക്കൊപ്പം ഒരുപാട് നേരം ചെലവിട്ടു. മാധ്യമങ്ങളെയൊന്നും അറിയിക്കരുത് എന്ന് മമ്മൂക്ക കർശനമായി പറ‍ഞ്ഞിരുന്നു. എന്നിട്ടും മമ്മൂക്കയെത്തിയ വിവരം കാരുണ്യാശ്രമത്തിൽ നിന്നറിഞ്ഞെത്തിയ പ്രാദേശികപത്രപ്രവർത്തകരിലാരോ ചിത്രം പകർത്തി. അതാണ് പിന്നീട് പത്രങ്ങളിലൊക്കെ വന്നത്.

അങ്ങന അവിടെ മമതയുടെ പഠനം ഏറ്റെടുത്തുകൊണ്ട് മമ്മൂക്ക തുടക്കമിട്ട 'വിദ്യാമൃതം' പദ്ധതി പിന്നീട് പലഘട്ടങ്ങൾ പിന്നിട്ട്, ഒടുവിൽ കെയർ ആന്റ് ഷെയറിന്റെ വൈസ് ചെയർമാൻ കൂടിയായ ഡോ.​ഗീവർ​ഗീസ് യോ​ഹന്നാന്റെ എം.ജി.എം ​ഗ്രൂപ്പ് ഓഫ് എജ്യുക്കേഷനൽ ഇൻസ്റ്റിറ്റ്യൂഷൻസ് ഏറ്റെടുക്കുന്ന നിലയിലേക്ക് വളർന്നു. ഇന്ന്, ഈ പദ്ധതിയിലൂടെ എം.ജി.എമ്മിൽ നിന്ന് സൗജന്യമായി പഠിച്ചിറങ്ങുകയും ഇറങ്ങാനൊരുങ്ങുകയും ചെയ്യുന്ന കുട്ടികളുടെ ആകെ എണ്ണമെടുത്താൽ 1000 എന്ന വലിയ സംഖ്യയിലേക്കെത്തും. ആയിരം കുടുംബങ്ങളിൽ അമൃതായി മാറുകയായിരുന്നു മമ്മൂക്കയുടെ 'വിദ്യാമൃതം'.