വിഷപ്പുകയിലും ഉരുൾപൊട്ടലിലും ഉയിരുകൊടുക്കാൻ വന്ന മമ്മൂക്കഫാൻസ്

മമ്മൂക്കയുടെ ആരാധകർക്ക് അദ്ദേഹം ആരാണ്? അതിനുള്ള ഉത്തരം അവർ പലപ്പോഴും വാക്കിലൂടെയല്ല, പ്രവൃത്തിയിലൂടെയാണ് കാണിച്ചു തരിക. അതുകാണുമ്പോൾ മനസ്സിലാകും,മമ്മൂക്ക എന്ന മനുഷ്യനെ ഓരോ ആരാധകനും എങ്ങനെയാണ് കാണുന്നതെന്ന്.. അദ്ദേഹത്തിന് അവരുടെ ജീവിതത്തിലും ഹൃദയത്തിലുമുള്ള സ്ഥാനം എന്തെന്ന്..

മമ്മൂക്കാആരാധകരുടെ കൂട്ടായ്മയായതിനാൽ ഫാൻസ് അസോസിയേഷനാണ് എപ്പോഴും അദ്ദേഹത്തോട് അവർക്കുള്ള ആത്മാർഥതയുടെ അളവുകോൽ ആയി മാറുക. ഫാൻസ് അസോസിയേഷൻ അം​ഗങ്ങളുടെ പ്രവർത്തനങ്ങളും ആത്മസമർപ്പണവും പലപ്പോഴും നമ്മളെ ഞെട്ടിക്കും. കടുത്ത മമ്മൂക്കാആരാധകനെന്ന് സ്വയം വിശ്വസിച്ച് കാലങ്ങളായി ജീവിക്കുന്ന ഞാൻപോലും പലപ്പോഴും അതുകണ്ട് അദ്ഭുതപ്പട്ടുനിന്നിട്ടുണ്ട്. നമ്മുടെ ആരാധനയൊന്നും ഒന്നുംഅല്ലെന്ന് തോന്നിപ്പിക്കുന്ന സംഭവങ്ങൾ. എന്തെങ്കിലും ഒരു കാര്യം ആവശ്യപ്പെട്ടാൽ സ്വപ്നത്തിൽപോലും വിചാരിക്കാത്ത രീതിയിലുള്ള പ്രതികരണവും തുടർപ്രവർത്തനങ്ങളുമാകും ഫാൻസ് അസോസിയേഷൻ അം​ഗങ്ങളിൽ നിന്നുണ്ടാകുന്നത്. എത്രയോ സംഭവങ്ങൾ അതിന് ഉദാഹരണമായി പറയാനാകും.

2023 മാർച്ച് 2. കൊച്ചിയുടെ ആകാശത്ത് പുകച്ചുരുളുകൾ നിറഞ്ഞുതുടങ്ങി. ന​ഗരത്തിന്റെ കുപ്പയെന്ന് വിളിക്കാവുന്ന ബ്രഹ്മപുരം മാലിന്യസംഭരണകേന്ദ്രത്തിൽ തീപിടുത്തമുണ്ടായിരിക്കുന്നു. അതിന്റെ പുകയാണ് കിലോമീറ്ററുകൾക്കിപ്പുറം കൊച്ചിയിൽ വരെയെത്തിയിരിക്കുന്നത്. എത്രശ്രമിച്ചിട്ടും തീ അണയ്ക്കാനാകുന്നില്ല. ബ്രഹ്മപുരത്തും പരിസരങ്ങളിലുമുള്ളവർക്ക് ശ്വാസംമുട്ടൽപോലെയുള്ള ശാരീരിക അസ്വസ്ഥതകൾ അനുഭവപ്പെട്ടുതുടങ്ങി. മാരകമായ വിഷാംശങ്ങളടങ്ങിയ പുക ജനങ്ങളുടെ ആരോ​ഗ്യത്തിന് ഭീഷണിയായി പടർന്നുപരന്നുതുടങ്ങിയപ്പോൾ മമ്മൂക്ക ഇടപെട്ടു. താരം എന്നതിനപ്പുറം അദ്ദേഹം നമ്മളിലൊരാൾ ആയി മാറും ഇത്തരം സന്ദർഭങ്ങളിൽ. മഹാന​ഗരത്തെ വിഴുങ്ങാൻ തുടങ്ങുന്ന വിപത്ത് മുൻകൂട്ടി കണ്ട് മഹാനടൻ മുണ്ടുമടക്കിക്കുത്തിയിറങ്ങി. ബ്രഹ്മപുരത്തെ ജനങ്ങൾക്ക് ഉടൻ വൈദ്യസഹായം ഉറപ്പുവരുത്താനായിരുന്നു മമ്മൂക്കയുടെ നിർദേശം. ഞാൻ ഓസ്ട്രേലിയയിലാണ്. പക്ഷേ ഇവിടെയിരുന്നുതന്നെ വിളിച്ചാൽ വിളിപ്പുറത്തുവരുന്ന ഒരുപാട് പേരുണ്ട്. എന്നോടുള്ള സ്നേഹം കൊണ്ടല്ല,മമ്മൂക്കയോടുള്ള ആദരവും ആരാധനയും കൊണ്ട്.

രാജ​ഗിരി ആശുപത്രിയിൽ നിന്നുള്ള മെഡിക്കൽ സം​ഘം ഉടൻ ബ്രമപുരത്തേക്ക് കുതിച്ചു. മാലിന്യപ്പുകയിൽ മൂടിനില്കുകയാണ് അവിടം. ശ്വസിച്ചാൽ ചിലപ്പോൾ ബോധം കെടും. പുക ശ്വാസകോശത്തിലെത്തിയാൽ ​ഗുരുതരമായ ആരോ​ഗ്യപ്രശ്നങ്ങളുണ്ടാകും. ജീവന് പോലും ഭീഷണിയായി മാറും. അതുകൊണ്ടുതന്ന അത്യാധുനിക മാസ്കുകൾ ഉൾപ്പെടെയുള്ള സംവിധാനങ്ങളുമായാണ് ഡോക്ടർമാരടങ്ങുന്ന വൈദ്യസംഘത്തിന്റെ യാത്ര. ഓക്സിജൻ കോൺസെൻട്രേറ്ററുകൾ,മരുന്നുകൾ തുടങ്ങിയവയുടെ ശേഖരവും കരുതിയിരുന്നു. ശ്വാസതടസ്സം മാത്രമായിരുന്നില്ല പ്രശ്നം. ഒരുപാടുപേർക്ക് കാഴ്ചയ്ക്ക് പോലും ബുദ്ധിമുട്ടുകളുണ്ടായിത്തുടങ്ങിയിരുന്നു. അതുകൊണ്ട് അങ്കമാലി ലിറ്റിൽ ഫ്ളവർ ആശുപത്രിയിൽ നിന്നുള്ള സം​ഘവും കെയർ ആന്റ് ഷെയറിനോട് സഹകരിച്ച് ബ്രഹ്മപുരത്തേക്ക് പുറപ്പെട്ടു.

മാനംമുട്ടെ വളർന്ന വിഷപ്പുക നിറഞ്ഞ ബ്രഹ്മപുരത്തേക്ക് രാജ​ഗിരിയിലെയും ലിറ്റിൽ ഫ്ളവറിലെയും വൈദ്യസംഘങ്ങളെത്തുമ്പോൾ കാണുന്നത് അവരെ സഹായിക്കാനായി പെരിന്തൽമണ്ണയിൽ നിന്ന് ബസ് കയറിയെത്തിയ ഒരു മമ്മൂട്ടി ഫാൻസ് പ്രവർത്തകനെയാണ്-ഹമീദലി പുന്നക്കാടൻ. ഒരു മാസ്ക് പോലുമില്ലാതെ,ആ പുകച്ചുരുളുകൾക്ക് നടുവിൽ ഞാൻ എന്താണ് ചെയ്യേണ്ടത് എന്നുചോദിച്ച് അയാൾ നിന്നു; മമ്മൂട്ടിയെന്ന മനുഷ്യനോടും അദ്ദേഹത്തിന്റെ മനുഷ്യസ്നേഹത്തോടുമുള്ള അടങ്ങാത്ത ആരാധനകൊണ്ട്. ബ്രഹ്മപുരത്തിനായി മമ്മൂക്ക മുന്നിട്ടിറങ്ങിയതറിഞ്ഞ് അതേനേരം പെരിന്തൽമണ്ണയിൽ നിന്ന് ചാടിപ്പുറപ്പെടുകയായിരുന്നു ഹമീദ്. അപ്പോൾ അയാൾക്ക് വിഷപ്പുകയൊന്നും ഒരു വിഷയമേയായിരുന്നില്ല. ടിവിയിൽ വാർത്ത കണ്ടിരിക്കാതെ, ശ്വാസംമുട്ടിപ്പിടയുന്ന കുറേ സഹജീവികൾക്കിടയിലേക്ക് ഓടിയെത്തുകയെന്നതായിരുന്നു അയാൾക്ക് പ്രധാനം. ഹമീദിന് അങ്ങനെ ചെയ്യാനേ ആകൂ...കാരണം അയാളൊരു മമ്മൂട്ടി ഫാൻസ് പ്രവർത്തകനാണ്. അങ്ങനെ ചെയ്യാനാണ് മമ്മൂക്ക അയാളെപ്പോലെയുള്ളവരോട് സ്വന്തം പ്രവൃത്തികളിലൂടെ പറയാതെ പറഞ്ഞിട്ടുള്ളത്.

ഡോക്ടർമാരോട് ഹമീദ് പറഞ്ഞു: പത്തുപേരെക്കൂടി കൊണ്ടുവന്നിട്ടുണ്ട്. 'അവർ കളമശ്ശേരിയിൽ നില്കുകയാണ്. എല്ലാവരുംകൂടിവന്നാൽ നിങ്ങൾക്ക് ബുദ്ധിമുട്ടുണ്ടാകുമോ എന്നോർത്ത് ഇങ്ങോട്ട് വിളിക്കാതിരുന്നതാണ്. എപ്പോൾ പറഞ്ഞാലും അവർ വരാൻ റെഡിയാണ്...'ഡോക്ടർമാർ അത് കേട്ട് ഞെട്ടിത്തരിച്ചുപോയി. പത്തുപേരുടെ ആ സംഘത്തിന് ആവശ്യമായ ജീവൻരക്ഷാ സംവിധാനങ്ങളില്ലാതിരുന്നതിനാൽ ഡോക്ടർമാർ പറഞ്ഞു: 'ഇപ്പോൾ ഇവിടേക്ക് വരേണ്ട,ആവശ്യത്തിന് ആളുണ്ടല്ലോ...ആവശ്യം വരുമ്പോൾ തീർച്ചയായും പറയും...' ആരും വിളിച്ചിട്ടുവന്നവരല്ല ഹമീദും സംഘവും. അവർ മമ്മൂക്കയുടെ ദൗത്യം എങ്ങനെയോ അറിഞ്ഞുകേട്ട് വന്നവരാണ്. അവർക്ക് സ്വന്തം ജീവനേക്കാൾ വലുതാണ് മമ്മൂക്ക. രാജ​ഗിരി ആശുപത്രിയിൽ നിന്ന് ഈ വിവരം വിളിച്ചു പറഞ്ഞപ്പോൾ കണ്ണുനിറഞ്ഞുപോയി.

അതുപോലെ തന്നെ കോട്ടയം ജില്ലയിലെ കൂട്ടിക്കലിലും ഇടുക്കി ജില്ലയിലെ കൊക്കയാറിലും 2021-ൽ ഉണ്ടായ ഉരുൾപൊട്ടൽ ദുരന്തം ഓർമവരുന്നു. ഉരുൾപൊട്ടിയ ഒക്ടോബർ 16ന് രാത്രി തന്നെ മമ്മൂക്ക വിളിച്ചു: 'നമുക്ക് അവിടെ വൈദ്യസഹായം ഉടൻ എത്തിക്കണം.' അപ്പോൾ തന്നെ മെഡിക്കൽസംഘത്തെ സജ്ജമാക്കാനുള്ള ശ്രമം തുടങ്ങി. രാജ​ഗിരി ആശുപത്രിയുമായി ചേർന്നാണ് വൈദ്യസംഘത്തെ തയ്യാറാക്കിയത്. അവർ രാജ​ഗിരി മെഡിക്കൽ സൂപ്രണ്ട് ഡോ.സണ്ണി പി.ഓരത്തേലിന്റെ നേതൃത്വത്തിൽ പത്തോളം ഡോക്ടർമാരുംപതിനഞ്ചോളം പേരുടെ നഴ്സിങ് സ്റ്റാഫും അടങ്ങുന്ന ടീം കൂട്ടിക്കലിലേക്കും കൊക്കയാറിലേക്കും യാത്രയായി. ലക്ഷക്കണക്കിന് രൂപയുടെ മരുന്നുകളുമായി മൂന്ന് ആംബുലൻസുകളിലാണ് അവർ രക്ഷാദൗത്യത്തിനിറങ്ങിയത്. മറ്റ് അവശ്യവസ്തുക്കളുമായി വേറെയും വാ​ഹനങ്ങളും.

പക്ഷേ വലിയൊരു പ്രശ്നമുണ്ടായിരുന്നു. ആംബുലൻസുകൾ ദുരന്തസ്ഥലത്തേക്ക് എത്തില്ല. കാരണം ഉരുൾപൊട്ടിയുണ്ടായ കല്ലും പാറയും ചെളിയുമെല്ലാം പ്രദേശമാകെ മൂടിക്കിടക്കുകയാണ്. അന്ന് ഇടുക്കിയിലെ എ.ഡി.എം ആയിരുന്ന ഷൈജു ജേക്കബ്ബ് കെയർ ആന്റ് ഷെയറിന്റെ പ്രവർത്തനങ്ങളുമായി പണ്ടുതൊട്ടേ സഹകരിക്കുന്നയാളാണ്. അദ്ദേഹം നമുക്ക് വേണ്ട പോലീസ് സംവിധാനങ്ങളുൾപ്പെടെ ഒരുക്കുന്നുണ്ട്. പക്ഷേ ഉരുൾപൊട്ടിയ സ്ഥലത്തേക്ക് എത്തിച്ചേരുക എന്നത് ദുഷ്കരം തന്നെയാണ്. രാത്രി പുറപ്പെട്ട മെഡിക്കൽസംഘം കാൽനടപോലും ഏതാണ്ട് അസാധ്യമായ സ്ഥലത്തുകൂടി ഏറെ പാടുപെട്ട് പോലീസ് വാ​ഹനങ്ങളിലും മറ്റും ഉരുൾപൊട്ടൽ ഏറ്റവും കൂടുതൽ നാശംവിതച്ച മേഖലയിലെത്തിയപ്പോൾ പിറ്റേന്ന് ഉച്ചയായി. ഇതിനിടയ്ക്ക് മെഡിക്കൽടീം പുറപ്പെട്ട വിവരം ഫാൻസ് അസോസിയേഷന്റെ ചില പ്രധാനപ്രവർത്തകരെ ഞാൻ അറിയിച്ചിരുന്നു.

മെഡിക്കൽ സംഘവും കെയർ ആന്റ് ഷെയറിന്റെ പ്രവർത്തകരും വാഹനങ്ങളിൽ കൂട്ടിക്കലിലെ ഉരുൾപൊട്ടൽ സ്ഥലത്തെത്തുമ്പോൾ കാണുന്നത് ഷർട്ടിലും പാന്റിലുംചെളിയൊക്കെ പുരണ്ട് നില്കുന്ന ഒരു ചെറുപ്പക്കാരനെയാണ്-ഷാമോൻ സലിം. മമ്മൂട്ടി ഫാൻസ് അസോസിയേഷൻ പ്രവർത്തകൻ. പത്തനംതിട്ടയിൽ നിന്ന് ബസുകയറിയും കിലോമീറ്ററുകൾ നടന്നുമൊക്കെ വന്നതാണ്. ഹമീദിന്റെ ചോദ്യം തന്നെയാണ് ഷാമോനും ചോദിച്ചത്: 'ഞാൻ എന്താണ് ചെയ്യേണ്ടത്...?' അയാൾ തലേന്ന് ഒരുപോള കണ്ണടച്ചിട്ടുണ്ടായിരുന്നില്ല. മമ്മൂക്കയുടെ സംഘം കൂട്ടിക്കലിലേക്ക് പുറപ്പെട്ട വാർത്തയറിഞ്ഞ് രാത്രി തന്നെ ബസുകയറി. എങ്ങനെയൊക്കയോ അവിടെയെത്തി. അതിനിടയിൽ ഉരുൾപൊട്ടലിനൊന്നും ഷാമോൻ എന്ന ചെറുപ്പക്കാരന്റെയുള്ളിലെ മമ്മൂക്ക എന്ന വികാരത്തെ കെടുത്തിക്കളയാനാകില്ല.

കോവിഡ് കാലം. ലോക്ഡൗൺ ആയതിനാൽ കുട്ടികളുടെ പഠനം മൊബൈൽഫോണിലൂടെയായപ്പോൾ ഒരുപാട് നിർധനകുടുംബങ്ങൾ എന്തുചെയ്യണമെന്നറിയാതെ നിന്നു. ​​ഗൂ​ഗിൾ മീറ്റിലും സൂമിലൊക്കെയാണ് ക്ലാസുകൾ. അതിനൊക്കെയുള്ള സൗകര്യമുള്ള ഫോണിന് അത്യാവശ്യം നല്ല വിലയാകും. മമ്മൂക്ക 'വിദ്യാമൃത'ത്തിന്റെ കീഴിൽ കുട്ടികൾക്ക് പഠനാവശ്യത്തിനായി മൊബൈൽ ഫോൺ കൈമാറുന്ന പദ്ധതി ആവിഷ്കരിച്ചു. കല്യാൺ ജൂവലേഴ്സിന്റെ സഹകരണത്തോടെയായിരുന്നു ഇത്. എന്തുസഹായവും ചെയ്യാൻ സന്നദ്ധരായിരുന്നു കല്യാൺ ജൂവലേഴ്സ്. ആവശ്യമുള്ളവർക്ക് ഫോണിൽ ബന്ധപ്പെട്ടാൽ ഫോൺ എത്തിച്ചുനല്കുന്ന പദ്ധതിയായിരുന്നു മമ്മൂക്കയുടേത്. ഇത് പ്രഖ്യാപിക്കുന്നതിനുമുമ്പ് തന്നെ വിശദമായി ആലോചിച്ചു. ആളുകൾ മറ്റ്ജോലികളൊന്നുമില്ലാതെ വീട്ടിലിരിക്കുകയാണ്. കുട്ടികൾക്ക് പഠിക്കാൻ മമ്മൂക്ക സൗജന്യമായി ഫോണുകൾ നല്കുന്നു എന്നൊരു പ്രഖ്യാപനം വന്നാൽ അതിലേക്ക് എത്രയാളുകൾ വേണമെങ്കിലും വിളിച്ചേക്കാം. ഫോണുകൾ ആവശ്യമുള്ളവർ മുതൽ മമ്മൂക്കയോട് സംസാരിക്കാൻ പറ്റുമോ എന്നുകരുതി വെറുതെ വിളിച്ചുനോക്കുന്നവർ വരെയുണ്ടായേക്കാം. പദ്ധതിയിലേക്ക് മൊബൈൽ ഫോൺ സംഭാവന ചെയ്യാൻ താത്പര്യമുള്ളവരും മുന്നോട്ടുവന്നേക്കാം. അങ്ങനെ ഫോൺകോളുകളുടെ പ്രളയം തന്നയുണ്ടാകും.

ആരെ വിശ്വസിച്ച് ഈ സംവിധാനം ഏല്പിക്കും എന്നാലോചിച്ചിരുന്നപ്പോൾ മമ്മൂക്ക തന്നെയാണ് ഫാൻസ് പ്രവർത്തകരോട് പറയാൻ നിർദേശിച്ചത്. അങ്ങനെ ഫാൻസിന്റെ ഏറ്റവും മുതിർന്ന നാലുപേരെ തന്നെ ഫോൺ കോളുകൾ എടുക്കാൻ നിയോ​ഗിച്ചു. സംസ്ഥാന പ്രസിഡന്റ് അരുൺ,സെക്രട്ടറി ഷാനവാസ്,കാസർകോട്ടെ അൻഷാദ്,പാലക്കാട്ടെ വിനോദ്. കെയർ ആന്റ് ഷെയർ പ്രോജക്ട് ഓഫീസറായിരുന്ന അനൂപിനെയും ഇക്കൂട്ടത്തിൽ പെടുത്തി. ഇവരുടെ ഫോൺ നമ്പരുകൾ തന്നെയാണ് പദ്ധതിയുടെ അനൗൺസ്മെന്റിനൊപ്പം കൊടുത്തിരുന്നത്. പ്രഖ്യാപനം വന്ന് ഉച്ചയായപ്പോൾ മമ്മൂക്ക വിളിക്കുന്നു. 'അരുണിന്റെ നമ്പരിലേക്ക് വിളിച്ചിട്ടുകിട്ടുന്നില്ല,എന്ന് പലരും പരാതി പറയുന്നു.' ഞാനപ്പോൾ തന്നെ അരുണിനെ വിളിച്ചു,കിട്ടുന്നില്ല, എൻ​ഗേജ്ഡ് ആണ്. അഞ്ചുമിനിറ്റ് കഴിഞ്ഞ് വീണ്ടും വിളിച്ചു. അപ്പോഴും എൻ​ഗേജ്ഡ്. പിന്നീട് പലവട്ടം ശ്രമിച്ചിട്ടും ഇതുതന്നെ അവസ്ഥ. ഇതിനിടയ്ക്ക് മമ്മൂക്കയും ഏതോ നമ്പരിൽ നിന്ന് വിളിച്ചുനോക്കിയിരുന്നു. കിട്ടിയില്ല.

സംഭവം എന്താണെന്നറിയാൻ ഞാൻ ഒരു സുഹൃത്തിൽ നിന്ന് അരുണിന്റെ ഭാര്യയുടെ നമ്പർ വാങ്ങി വിളിച്ചു. അപ്പോഴേക്കും ഏതാണ്ട് നാലുമണിയായിട്ടുണ്ടാകും. അരുണിന്റെ ഭാര്യയാണ് വിവരം പറഞ്ഞത്. രാവിലെ ആറുമണിക്ക് തുടങ്ങിയതാണ് ഫോൺകോളുകൾ. ഒരു ചായപോലും കുടിക്കാതെ അപ്പോൾ തുടങ്ങി കോളുകൾ അറ്റൻഡ് ചെയ്യാൻ തുടങ്ങിയതാണ് അരുൺ. ഞാൻ വിളിക്കുന്ന സമയം വരെ അരുൺ ഒരു തുള്ളിവെള്ളം കുടിച്ചിട്ടില്ല. ചാർജ് തീർന്നതോടെ ഫോൺ കുത്തിയിട്ടുകൊണ്ടാണ് മറുപടി പറയുന്നത്.

രാത്രി പന്ത്രണ്ടുമണിയായപ്പോൾ അരുൺ തിരിച്ചുവിളിച്ചു. അയാളപ്പോഴേക്കും ഏതാണ്ട് അവശനായിക്കഴിഞ്ഞിരുന്നു. എനിക്ക് അരുണിനോട് എന്തുപറയണമെന്ന് അറിയില്ലായിരുന്നു. ഇങ്ങനെ മൂന്ന് ദിവസം കൊണ്ട് ഏതാണ്ട് അയ്യായിരത്തിലധികം ഫോൺകോളുകൾക്കാണ് അരുണും ഷാനവാസും അൻഷാദും വിനോദും അനൂപും ചേർന്ന് മറുപടി പറഞ്ഞത്.

ആരാധകർ എന്നത് മമ്മൂക്കയുടെ കാര്യത്തിൽ എന്താണ് എന്ന് ഇനി നിങ്ങൾ പറയുക...

(തുടരും)