EXCLUSIVE:അടൂരും മമ്മൂട്ടിയും വീണ്ടും,നിർമാണം മമ്മൂട്ടികമ്പനി

അനന്തരം അവർ വീണ്ടും ഒരുമിക്കുന്നു. മലയാളസിനിമയെ മതിലുകൾക്കപ്പുറത്തെത്തിച്ച മഹാപ്രതിഭകളുടെ സം​ഗമം. അടൂർ ​ഗോപാലകൃഷ്ണൻ സംവിധാനം ചെയ്യുന്ന സിനിമയിൽ ഒരിക്കൽക്കൂടി മമ്മൂട്ടി നായകനാകുന്നു. തകഴിയുടെ പ്രസിദ്ധമായ 'രണ്ടിടങ്ങഴി' എന്ന നോവലിന്റെ ചലച്ചിത്രാവിഷ്കാരമായിരുന്നു ആദ്യം ആലോചനയിലുണ്ടായിരുന്നത്. മമ്മൂട്ടിക്കും അതിൽ താത്പര്യമായിരുന്നു. എന്നാൽ ഇതുസംബന്ധിച്ച് അന്തിമ തീരുമാനമായിട്ടില്ല. മമ്മൂട്ടി കമ്പനിയായിരിക്കും ചിത്രം നിർമിക്കുക. പ്രാഥമിക ജോലികളും കൂടിയാലോനകളും പുരോ​ഗമിക്കുകയാണ്.

അടുത്തിടെ സംസ്ഥാനസർക്കാരിന്റെ പരിപാടിയിൽ പങ്കെടുക്കാൻ തിരുവനന്തപുരത്തെത്തിയ മമ്മൂട്ടി അടൂരിനെയും മധുവിനെയും സന്ദർശിച്ചിരുന്നു. മമ്മൂട്ടിയെ നായകനാക്കി ഒരു ചിത്രം ദീർഘകാലമായി അടൂരിന്റെ മനസ്സിലുണ്ട്. കൂടിക്കാഴ്ചയിൽ ഇത് സംബന്ധിച്ച തീരുമാനമായി എന്നാണ് വിവരം. തുടർന്നാണ് സിനിമയ്ക്കായുള്ള ആലോചനകൾക്ക് തുടക്കമായത്.

1987-ൽ 'അനന്തരം' എന്ന ചിത്രത്തിലാണ് അടൂരും മമ്മൂട്ടിയും ആദ്യമായി ഒന്നിച്ചത്. അതിനുശേഷം 'മതിലുകൾ','വിധേയൻ' എന്നീ ചലച്ചിത്രങ്ങളും മമ്മൂട്ടിയെ നായകനാക്കി അടൂർ സംവിധാനം ചെയ്തു. 'മതിലുകളി'ൽ വൈക്കം മുഹമ്മദ് ബഷീറിന്റെയും 'വിധേയനി'ൽ ഭാസ്കരപട്ടേലർ എന്ന ജന്മിയുടെയും കഥാപാത്രങ്ങളായിരുന്നു മമ്മൂട്ടിക്ക്. 1989-ൽ 'മതിലുകളി'ലൂടെയും 1994-ൽ 'വിധേയനി'ലൂടെയും മമ്മൂട്ടി മികച്ച നടനുള്ള ദേശീയ അവാർഡ് നേടി. 'വിധേയന്' അദ്ദേഹത്തിന് സംസ്ഥാന അവാർഡും ലഭിച്ചു.

2016-ൽ ദിലീപ്,കാവ്യാമാധവൻ എന്നിവരെ പ്രധാനകഥാപാത്രങ്ങളാക്കിയ 'പിന്നെയും' ആണ് അടൂർ ഒടുവിൽ സംവിധാനം ചെയ്ത സിനിമ. ഏതാണ്ട് ഒരു ദശാബ്ദത്തിനുശേഷം സംവിധാനരം​ഗത്തേക്കുള്ള അടൂരിന്റെ മടങ്ങിവരവ് കൂടിയാകും മമ്മൂട്ടിക്കൊപ്പമുള്ള സിനിമ. മമ്മൂട്ടിയ്ക്കാകട്ടെ അത് മൂന്നുപതിറ്റാണ്ടുകൾക്കുശേഷമുള്ള അടൂർ ചിത്രവും.

'രണ്ടിടങ്ങഴി'യാണ് അടൂർ-മമ്മൂട്ടി സിനിമയ്ക്ക് ആധാരമെങ്കിൽ രണ്ടാംതവണയാകും ആ നോവലിന് ചലച്ചിത്രരൂപമുണ്ടാകുന്നത്. 1958-ൽ പി.സുബ്രഹ്മണ്യം ആണ് ആദ്യമായി സിനിമയാക്കിയത്. നീല പ്രൊഡക്ഷൻസ് നിർമിച്ച 'രണ്ടിടങ്ങഴി'യുടെ തിരക്കഥയും സംഭാഷണവും തകഴി തന്നെയായിരുന്നു. ആ വർഷം മികച്ച പ്രാദേശിക സിനിമയ്ക്കുള്ള ദേശീയ പുരസ്കാരവും ഈ ചിത്രത്തിനായിരുന്നു.

ജന്മിത്തത്തിനെതിരായ, കുട്ടനാട്ടിലെ കർഷകത്തൊഴിലാളി കളുടെ പോരാട്ടത്തിന്റെ കഥ പറയുന്ന 'രണ്ടിടങ്ങഴി' കേരളത്തിലെ കമ്യൂണിസ്റ്റ് പ്രസ്ഥാനത്തിന്റെ സമരതീക്ഷ്ണമായ ഇന്നലെകളുടെ ചുവന്ന ഇതിഹാസം കൂടിയാണ്. കോരൻ എന്ന കർഷകത്തൊഴിലാളിയെ സിനിമയിൽ അവതരിപ്പിച്ചത് പി.ജെ.ആന്റണിയാണ്. ഭാര്യ ചിരുതയായി മിസ് കുമാരി. മറ്റ് പ്രധാന കഥാപാത്രങ്ങളെ അവതരിപ്പിച്ചത് ടി.എസ്.മുത്തയ്യ,തിക്കുറിശ്ശി സുകുമാരൻ നായർ,കൊട്ടാരക്കര ശ്രീധരൻ നായർ,ബഹദൂർ എന്നിവരാണ്. തലമുറകൾ ഏറ്റുപാടിയ 'തുമ്പപ്പൂ പെയ്യണ പൂ നിലാവേ...'ഉൾപ്പെടെ ഇതിലെ പാട്ടുകളും ശ്രദ്ധനേടി.