മണിക്കൂറുകൾക്കുള്ളിൽ അവർ അയാളെ കണ്ടെത്തി, 'ട്രാഫിക്' സിനിമയെ തോല്പിച്ച ജനകീയദൗത്യം

ഫാൻസ് അസോസിയേഷനുകൾ കൊണ്ട് എന്തുപ്രയോജനം എന്ന ചോദ്യം എല്ലാക്കാലത്തും ഉയർന്നുകേൾക്കുന്ന ഒന്നാണ്. സ്വന്തം നായകന്റെ സിനിമയ്ക്കുവേണ്ടി കട്ടൗട്ടിൽ പാലഭിഷേകം നടത്തുകയും തിയേറ്ററിനുള്ളിൽ ആർപ്പുവിളിക്കുകയും മറ്റുനടന്മാരുടെ സിനിമകളെ കൂവിതോല്പിക്കുകയും ചെയ്യുന്ന ഒരുതരം വെട്ടുകിളിക്കൂട്ടം എന്ന പ്രതിച്ഛായയാണ് പലരും ആരാധകസമൂഹത്തിന് കല്പിച്ചുകൊടുത്തിട്ടുള്ളത്. ഒരു താരത്തെ ആരാധിക്കുന്നത് അപരാധമല്ല. ആ താരത്തോടുള്ള ആരാധന പലതരത്തിലാണ് പലരും പ്രകടമാക്കുന്നതെന്നുമാത്രം. രാഷ്ട്രീയപാർട്ടികളിലെ അം​ഗങ്ങൾ അവരവർ വിശ്വസിക്കുന്ന പ്രസ്ഥാനത്തിനുവേണ്ടി ചെയ്യുന്ന കാര്യങ്ങളൊക്കെതന്നെയേ ഫാൻസ് അസോസിയേഷൻകാരും പലപ്പോഴും ചെയ്യുന്നുള്ളൂ. പക്ഷേ സിനിമാതാരത്തെ ആരാധിക്കുന്നത് എന്തോ വിലകുറഞ്ഞ കാര്യമാണ് എന്ന മട്ടിലാണ് പലരും സംസാരിച്ചുകാണാറുള്ളത്. എന്നാൽ ഈ ആരാധകസമൂഹത്തിന്റെ ശക്തിയും നന്മയും കെട്ടുറപ്പും സമൂഹത്തിനുവേണ്ടി അവർ ചെയ്യുന്ന കാര്യങ്ങളും പലപ്പോഴും ആരും കാണാതെ പോകുന്നു. അത് മനസ്സിലാക്കിയാൽ വെറും വെട്ടുകിളിക്കൂട്ടമല്ല ഫാൻസ് എന്ന് ബോധ്യപ്പെടും.

മമ്മൂക്കയെ സംബന്ധിച്ചാണെങ്കിൽ ആരാധകർ സിനിമകൾ വിജയിപ്പിച്ചെടുക്കാനുള്ള ഉപകരണങ്ങളല്ല. ആരാധകരെക്കൊണ്ട് കൈയടിപ്പിച്ചും ആർപ്പുവിളിപ്പിച്ചും പടം ഹിറ്റാക്കേണ്ട ആവശ്യവും അദ്ദേഹത്തിനില്ല. സിനിമ നല്ലതാണെങ്കിൽ അത് പ്രേക്ഷകർക്ക് ഇഷ്ടപ്പെടും വിജയിക്കും എന്നാണ് മമ്മൂക്ക എല്ലാക്കാലത്തും പറയുന്നത്. എന്നെ സ്നേഹിക്കുന്നവർ എന്റെ കൂടെ നില്കേണ്ടത് നല്ലകാര്യങ്ങൾക്കുവേണ്ടിയാകണം എന്നും അദ്ദേഹം പലവേദികളിൽ പലവട്ടം പറ‍ഞ്ഞിട്ടുണ്ട്. മമ്മൂക്കയ്ക്ക് ഫാൻസ് എന്നത് അദ്ദേഹത്തിന്റെയൊരു സന്നദ്ധസേനയാണ്. അത് സിനിമ യ്ക്കു വേണ്ടിയുള്ളതല്ല, സമൂഹത്തിനുവേണ്ടി യുള്ളതാണ്. ആരാധകരുടെ സംഘടിതശക്തിയെ സമൂഹനന്മയ്ക്കുവേണ്ടി പ്രയോജനപ്പെടുത്തുക എന്നതാണ് മമ്മൂക്ക മുന്നോട്ടുവയ്ക്കുന്ന ആശയം. ഞാനുൾപ്പെടെ അദ്ദേഹത്തിന്റെ ഫാൻസ് അസോസിയേഷൻ പ്രവർത്തകരെല്ലാം ആ ദൗത്യം എന്നും ആവേശത്തോടെയും അഭിമാനത്തോടെയുമാണ് ഏറ്റെടുത്തിട്ടുള്ളത്. മമ്മൂക്കയുടെ ഒരു ചിത്രം തിയേറ്ററിൽ ആവേശവും കോരിത്തരിപ്പും തരുമ്പോൾ ഞങ്ങൾക്ക് ആഹ്ലാദമുണ്ടാകും. പക്ഷേ അതിനപ്പുറമുള്ള ഒരു വികാരവും സാഫല്യവുമാണ് മമ്മൂക്കയുടെ സാമൂഹികസേവന പ്രവർത്തനങ്ങളിൽ അദ്ദേഹത്തിനൊപ്പം നില്കുമ്പോൾ കിട്ടുന്നത്.

മമ്മൂക്കയുടെ ഫാൻസിന്റെ ശക്തി വേദനിക്കുന്ന ഒരുപാട് ജീവിതങ്ങൾക്ക് തുണയായ എത്രയോ കഥകളുണ്ട്. ഒരു പുസ്തകമെഴുതിയാലും തീരാത്തത്ര വിപുലമാണത്. എങ്കിലും ഫാൻസ് ആരാണ്,എന്താണ് അവർ ചെയ്യുന്നത് എന്നറിയാൻ ചുരുക്കം ചില ഉദാ​ഹരണങ്ങൾ മാത്രം ഇവിടെ കുറിക്കുന്നു. ഇത്തരം പലതുള്ളികൾ ചേർന്നുള്ള പെരുവെള്ളമാണ് മമ്മൂക്കയുടെ ആരാധകർ സൃഷ്ടിച്ച അദ്ഭുതങ്ങൾ.

നീണ്ടകരയിലെ അനാഥാലയത്തിൽ നിന്നുള്ള ഒരു കത്തുപോലെ തന്നെ മമ്മൂക്കയ്ക്ക് ഒരിക്കൽ മറ്റൊരു കത്ത് കിട്ടി. കൊച്ചിയിലെ വീട്ടിലെ വിലാസത്തിലാണ് അതും വന്നത്. സഹദേവൻ എന്നൊരു ഓട്ടോ ഡ്രൈവർ ആയിരുന്നു അതഴുതിയിരുന്നത്. അക്ഷരാർഥത്തിൽ കണ്ണീരുവീണതെന്ന് തോന്നിക്കും വിധം അതിലെ അക്ഷരങ്ങൾ പലയിടത്തും അവ്യക്തമായിരുന്നു. ഇത്തരം കത്തുകൾക്കൊക്കെ പ്രത്യേകപരി​ഗണനയാണ് മമ്മൂക്ക നല്കാറുള്ളത്. അതിലെ വേദന അപ്പോൾ അദ്ദേഹത്തിന്റേതായി മാറിക്കഴിഞ്ഞിരിക്കും.അതുകൊണ്ട് ഉടൻ ഞങ്ങളെ ഏല്പിക്കും. എത്രയും പെട്ടെന്ന് എന്തെങ്കിലും ചെയ്യണം എന്നതാണ് ആ കൈമാറ്റത്തിൽ ഉള്ളടങ്ങുന്ന നിർ​ദേശം. അങ്ങനെ സഹദേവന്റെ കത്തും എന്റെ കൈയിലെത്തി.

2009-ൽ ആണ് സംഭവം. സഹദേവന്റെ മകൾക്ക് പ്രസവിച്ചപ്പോൾ തന്നെ ഹൃദയത്തിൽ സുഷിരമുണ്ടായിരുന്നു. മൂന്നുവയസ്സ് കഴിഞ്ഞാൽ ശസ്ത്രക്രിയവേണമെന്നായിരുന്നു ഡോക്ടർമാർ പറഞ്ഞിരുന്നത്. അശ്വതി എന്നുപേരിട്ട ആ കുട്ടിക്ക് മൂന്നുവയസ്സായിട്ടും ശസ്ത്രക്രിയയ്ക്കുള്ള പണം കണ്ടെത്താൻ സഹദേവനായില്ല. പലയിടത്തും ഓടിനടന്നു. ഉള്ളതെല്ലാം വിറ്റുപെറുക്കി. എന്നിട്ടും ഒന്നുമായില്ല. ഒന്നരലക്ഷം രൂപയോളം വേണമായിരുന്നു ശസ്ത്രക്രിയയ്ക്ക്. അന്ന് അതൊരു വലിയ തുക തന്നെയായിരുന്നു. പ്രത്യേകിച്ച് നിത്യവൃത്തിക്ക് ബുദ്ധിമുട്ടിയിരുന്ന സഹദേവനെപ്പോലൊരാൾക്ക്. എന്തുചെയ്യണമെന്നറിയാതെ സഹദേവൻ പകച്ചുനില്കുമ്പോഴാണ് ആരോ മമ്മൂക്കയ്ക്ക് ഒന്ന് കത്തെഴുതിനോക്കാൻ പറഞ്ഞത്. കെയർ ആന്റ് ഷെയറിന്റെ നേതൃത്വത്തിൽ സൗജന്യഹൃദയശസ്ത്രക്രിയാ പദ്ധതി തുടങ്ങിയ കാലമായിരുന്നു അത്. അങ്ങനെയാണ് കണ്ണീരിൽ കുതിർന്ന ആ കത്ത് മമ്മൂക്കയുടെ പക്കൽ എത്തുന്നത്.

പക്ഷേ കത്തിൽ അയച്ചയാളുടെ മേൽവിലാസമുണ്ടായിരുന്നില്ല! കാസർകോട്ടുനിന്നാണ് എഴുതുന്നതെന്നും സഹദേവൻ എന്നാണ് പേരെന്നും ഓട്ടോ ഡ്രൈവറാണ് എന്നും മാത്രമാണ് എഴുതിയിരുന്നത്. അത് സ്വഭാവികമായിട്ടേ തോന്നിയുള്ളൂ. മകളുടെ ജീവൻ രക്ഷിക്കാനുള്ള പണം തേടിപ്പായുന്ന ഒരച്ഛൻ വെപ്രാളത്തിൽ ചിലപ്പോൾ വിലാസമെഴുതാൻ വിട്ടുപോയതായിരിക്കണം. ആ മനുഷ്യന്റെ തെറ്റായിരുന്നില്ല അത്. മകളുടെ പ്രാണനും വാരിപ്പിടിച്ചോടുന്നതിനിടെ ഇങ്ങനെയൊക്കെ സംഭവിച്ചുപോകും,ആരായാലും.

കത്തിൽ മേൽവിലാസമില്ലെന്നും ആളെ കണ്ടെത്തണമെന്നും പറഞ്ഞുകൊണ്ടാണ് മമ്മൂക്ക കത്ത് ഏല്പിച്ചത്. ആളെ കണ്ടെത്താൻ പറ്റിയ സൂചനകളൊന്നും അതിൽ നോക്കിയിട്ട് കിട്ടിയില്ല. ഇനി ഫാൻസിന്റെ അം​ഗബലത്തിലാണ് പ്രതീക്ഷ. അവരെ വിളിക്കാനും അവരോട് അന്വേഷിക്കാൻ പറയാനും നിർദേശിച്ചത് മമ്മൂക്ക തന്നെയാണ്. അങ്ങനെ കത്തിന്റെ പകർപ്പ് കാസർകോട്ടെ ഫാൻസ് അസോസിയേഷൻ ജില്ലാ പ്രസിഡന്റായിരുന്ന അബ്ദുൾ മജീദിന് എത്തിച്ചു. ഒറ്റനിമിഷം പോലും കളയാതെ അവർ അന്വേഷണം തുടങ്ങി. ഫാൻസിലെ അം​ഗങ്ങൾ ഒരു ജീവൻരക്ഷാശ്രമത്തിനെന്നപോലെ നിരത്തിലിറങ്ങി. കത്തിലുണ്ടായിരുന്ന സീലിന്റെ ഏതോ ഒരംശത്തിലെ അക്ഷരങ്ങളിൽ നിന്നുള്ള സൂചനയിൽ പിടിച്ചായിരുന്നു അന്വേഷണം. ഓട്ടോസ്റ്റാൻഡുകൾ ഓരോന്നായി അവർ കയറിയിറങ്ങി. സഹദേവൻ എന്നൊരാൾ അക്കൂട്ടത്തിലുണ്ടോയെന്ന് ചോദിച്ചു,ഇല്ല എന്ന മറുപടിയിൽ തളരാതെ അടുത്തിയിടത്തേക്ക്. ഒരു പഞ്ചായത്തിൽ തന്നെ എത്രയോ ഓട്ടോ സ്റ്റാൻഡുകൾ കാണുമെന്ന് ചിന്തിക്കുക. അവിടെനിന്ന് ഒരാളെ കണ്ടെത്തിയെടുക്കുക എന്നത് എത്രത്തോളം പ്രയാസകരമായിരുന്ന പ്രവൃത്തിയാണെന്നും.

പക്ഷേ മമ്മൂക്കയുടെ ഫാൻസുകാർ കൈകോർക്കുമ്പോൾ എന്തും നിഷ്പ്രയാസം സാധിക്കും. എത്രയോ സംഭവങ്ങൾ ഇതിന് സാക്ഷ്യം പറയാനുണ്ട്. അത്രയും വിപുലമാണ് മമ്മൂക്ക എന്ന ഒറ്റ മനുഷ്യനുവേണ്ടി ചലിക്കാൻ തയ്യാറായി നില്കുന്ന ലക്ഷങ്ങളുടെ ആരാധകസമൂഹം. അപ്പോൾ പിന്നെ മജീദും കൂട്ടരും തോറ്റുപോകില്ലല്ലോ...അവർ ഉച്ചയ്ക്ക് മുമ്പ് കാഞ്ഞങ്ങാട് ഉദയമം​ഗലത്തുനിന്ന് സഹദേവനെ കണ്ടെത്തി. 'ട്രാഫിക്' സിനിമയിൽ കണ്ടതൊന്നും ഒന്നുമല്ല എന്ന് തെളിയിച്ച ഒരു ജനകീയ​ദൗത്യം. പിന്നെ നീക്കങ്ങളെല്ലാം അതിവേ​ഗത്തിൽ കോഴിക്കോട് മിംസ് ആശുപത്രിയിൽ ഡോക്ടർ സാജൻ കോശിയുടെ നേതൃത്വത്തിൽ അശ്വതിയുടെ ശസ്ത്രക്രിയ നടന്നു. സഹദേവന്റെ അക്ഷരങ്ങൾക്ക് അർഥമുണ്ടായി. ഒരു കുടുംബത്തിന്റെ ജീവിതത്തിന് താളം വീണ്ടുകിട്ടി.

ഇനി വ്യക്തിപരമായ ഒരനുഭവം കൂടി. അതും ഏറെക്കുറെ പത്തുവർഷം മുമ്പാണ്. ഓസ്ട്രേലിയയിൽവച്ച് പരിചയമുള്ള ഒരാളുടെ കുടംബത്തിലൊരാൾക്ക് അവധിക്ക് നാട്ടിൽവന്നപ്പോൾ വാഹനാപകടത്തിൽ ​ഗുരുതരമായി പരിക്കേറ്റു. അദ്ദേഹവും കുടുംബവും സഞ്ചരിച്ചിരുന്ന കാറും ലോറിയുമായി കൂട്ടിയിടിക്കുകയായിരുന്നു. പരിക്കേറ്റയാളെ കോഴിക്കോട് ബേബി മെമ്മോറിയൽ ആശുപത്രിയിയിലേക്കാണ് കൊണ്ടുപോയത്. അവിടെയെത്തിച്ചപ്പോൾ അടിയന്തരമായ ശസ്ത്രക്രിയയാണ് ഡോക്ടർമാർ നിർദേശിച്ചത്. പത്തുകുപ്പിയിലധികം രക്തം ഉടൻവേണം. അതും അപൂർവമായൊരു രക്ത​ഗ്രൂപ്പ്. ഞാനും ആ സമയത്ത് നാട്ടിലാണ്. അദ്ദേഹത്തിന്റെ ബന്ധുക്കൾ എന്നെ വിളിക്കുന്നു. പരമാവധി ശ്രമിച്ചിട്ടും കിട്ടുന്നില്ല. രണ്ടോ മൂന്നോ കുപ്പി മാത്രമാണ് അതുവരെ കിട്ടിയത്. അപൂർവ ​ഗ്രൂപ്പായതിനാൽ മറ്റ് ​ഗ്രൂപ്പുകളിലേത് കൊടുത്താൽ ആശുപത്രിയിൽ നിന്ന് പകരം ആവശ്യമുള്ള ​ഗ്രൂപ്പ് കിട്ടാനും ബുദ്ധിമുട്ടാണ്.

രാവിലെ എട്ടുമണിക്കാണ് ശസ്ത്രക്രിയ നിശ്ചയിച്ചിട്ടുള്ളത്. എനിക്ക് മറ്റൊന്നും ചിന്തിക്കാനുണ്ടായിരുന്നില്ല. ഫാൻസിന്റെ കോഴിക്കോട് ജില്ലാ പ്രസിഡന്റായിരുന്ന ഫസലിനെ വിളിച്ചു. ഉടൻ ജില്ലാകമ്മറ്റിയം​ഗങ്ങൾ സന്നദ്ധരായി രം​ഗത്തിറങ്ങി. ഫസലും മറ്റൊരു ഫാൻസ് നേതാവായ ഹാഷിറും പ്രവർത്തനങ്ങൾ ഏകോപിപ്പിച്ചു. അങ്ങനെ രാവിലെ ഏഴുമണിയായപ്പോൾ പരിക്കേറ്റയാളുടെ ഭർത്താവ് എന്നെ വിളിക്കുന്നു: 'എങ്ങനെ നന്ദി പറയണമെന്ന് അറിയില്ല..നമ്മൾ ആവശ്യപ്പെട്ടത് പത്തുബോട്ടിലാണ്..ഇവിടെ ഒരു മുപ്പത്പേരെങ്കിലും ബ്ലഡ് ഡൊണേറ്റ് ചെയ്യാൻ റെഡിയായി വന്നിട്ടുണ്ട്..ഫാൻസിന്റെ കോഴിക്കോട് ജില്ലയിലെ പ്രവർത്തകരാണ്. ഞങ്ങളിന്നുവരെ മമ്മൂക്കയെ കണ്ടിട്ടില്ല. ഇനി കാണാനും സാധ്യതയില്ല. പക്ഷേ..ഇത് ഞങ്ങൾക്ക് മറക്കാനാകില്ല...അദ്ദേഹത്തോട് ഞങ്ങളുടെ നന്ദി പറയണം..അദ്ദേഹത്തോടുള്ള സ്നേഹം കൊണ്ടുമാത്രമല്ലേ ഇത്രയും പേർ ഇവിടെ എത്തിയിരിക്കുന്നത്...'

അതെ,അകലെനില്കുന്നവർ പറയും ഫാൻസ് എന്നാൽ ഒരു വെട്ടുകിളിക്കൂട്ടം എന്ന്.. പക്ഷേ അനുഭവസ്ഥർ പറയും അവർ ഒരു മാലാഖക്കൂട്ടമെന്ന്..

(തുടരും)