ആ ​ഗുഹയിലെ രഹസ്യങ്ങളറിയുന്നതെങ്ങനെ? അതിനുള്ള താക്കോലായി 'വാരണാസി'യിലെ 'നി​ഗൂഢഭാഷ'

എസ്.എസ്. രാജമൗലിയുടെ സംവിധാനത്തിലൊരുങ്ങുന്ന പുതിയ ചിത്രം 'വാരാണസി'ക്കായി പ്രത്യേക സാങ്കല്പിക ഭാഷ സൃഷ്ടിക്കുന്നു. മഹേഷ് ബാബു, പ്രിയങ്ക ചോപ്ര, പൃഥ്വിരാജ് സുകുമാരന്‍ എന്നിവര്‍ പ്രധാന വേഷങ്ങളിലെത്തുന്ന സിനിമയില്‍ കഥയുടെ മുന്നോട്ടുപോക്കിന് പുതിയ ഭാഷ വലിയ പങ്കു വഹിക്കുന്നുണ്ട്.

മുമ്പ് 'ബാഹുബലി' എന്ന ചിത്രത്തിലെ കാലകേയന്മാര്‍ എന്ന വിഭാ​ഗത്തിനായി പ്രത്യേക ഭാഷ സൃഷ്ടിച്ചിരുന്നെങ്കിലും, 'വാരാണസി'യില്‍ അതിനേക്കാള്‍ വിശദവും വിപുലവുമായ തലത്തിലാണ് പുതിയ ഭാഷ അവതരിപ്പിക്കുന്നത്. സ്വന്തമായി ലിപിയും വ്യാകരണ നിയമങ്ങളും വാക്കുകളുമുള്ള ഭാഷ രൂപപ്പെടുത്താന്‍ ഭാഷാവിദഗ്ധന്റെ സേവനവും ചിത്രത്തിനായി തേടിയിട്ടുണ്ട്.

സിനിമയിലെ പ്രധാന കഥാപാത്രങ്ങള്‍ പുരാതനമായ എഴുത്തുകളുള്ള ഒരു ഗുഹയ്ക്കുള്ളില്‍ പ്രവേശിക്കുന്ന രംഗമുണ്ടെന്നും, അതിലെ രഹസ്യങ്ങള്‍ മനസിലാക്കുന്നതിന് അപരിചിത ഭാഷ പഠിക്കേണ്ടതുണ്ടെന്നുമാണ് റിപ്പോര്‍ട്ടുകള്‍ നല്‍കുന്ന സൂചന. കഥാഗതി തിരിച്ചുവിടുന്ന പ്രധാന ഘടകമായിരിക്കും ഈ ഘടന.

ആഗോളതലത്തില്‍ വന്‍ റിലീസായി ആസൂത്രണം ചെയ്യുന്ന ചിത്രം ലോകമെമ്പാടുമുള്ള 120 രാജ്യങ്ങളില്‍ 50 ഓളം ഭാഷകളിലാണ് പുറത്തിറക്കുന്നത്. നിര്‍മിതബുദ്ധി ഉപയോഗിക്കാതെ 1500-ാളം ശബ്ദകലാകാരന്മാരെ പങ്കെടുപ്പിച്ച് തികച്ചും സ്വാഭാവികമായ രീതിയില്‍ ഡബ്ബിങ് പൂര്‍ത്തിയാക്കാനാണ് അണിയറപ്രവര്‍ത്തകരുടെ പദ്ധതി. മഹേഷ് ബാബുവിന്റെ 'രുദ്ര'യും പൃഥ്വിരാജിന്റെ 'കുംഭ'യും തമ്മിലുള്ള പോരാട്ടം ദൃശ്യവത്കരിക്കുന്ന ചിത്രം 2027 ഏപ്രില്‍ ഏഴിന് തിയേറ്ററുകളിലെത്തും.