ഒരുവർഷം,ഏഴുമാസം,29ദിവസം; 'വാരണാസി'യുടെ ഷൂട്ടിങ് പൂർത്തിയാക്കി മഹേഷ്ബാബു

2025 ജനുവരി 24നാണ് മഹേഷ് ബാബു രാജമൗലി ചിത്രം 'വാരണാസി'യിലേക്കുള്ള യാത്ര ആരംഭിച്ചത്. പ്രഖ്യാപനം മുതൽ തന്നെ ചിത്രത്തെ ചുറ്റിപ്പറ്റിയുള്ള പ്രതീക്ഷകൾ ഓരോ ഘട്ടത്തിലും വർധിച്ചുകൊണ്ടിരിക്കുകയായിരുന്നു. ഇപ്പോഴിതാ ഒരുവർഷത്തിനും ഏഴുമാസത്തിനും 29 ദിവസങ്ങൾക്കും ശേഷം ചിത്രത്തിലെ മഹേഷ് ബാബുവിന്റെ ഭാഗങ്ങളുടെ ചിത്രീകരണം പൂർത്തിയായിരിക്കുന്നു.

സെപ്റ്റംബർ 22നാണ് മഹേഷ് ബാബു 'വാരണാസി'യിലെ തന്റെ ഭാഗങ്ങളുടെ ഷൂട്ടിങ് പൂർത്തിയാക്കിയത്. ഏറെ നാളുകളായി ഈ ബിഗ് ബജറ്റ് ചിത്രത്തിനായി സമയം ചെലവഴിച്ചുവരികയായിരുന്നു താരം. മഹേഷ് ബാബുവിന്റെ ഭാഗങ്ങളുടെ ചിത്രീകരണം പൂർത്തിയായത് ചിത്രത്തിന്റെ അണിയറപ്രവർത്തകർക്ക് നിർണായകമായ ഘട്ടമാണ്.

അതേസമയം, ശേഷിക്കുന്ന ഭാഗങ്ങളുടെ ചിത്രീകരണവും വിപുലമായ പോസ്റ്റ് പ്രൊഡക്ഷൻ ജോലികളും രാജമൗലി ഒരേസമയം മുന്നോട്ടുകൊണ്ടുപോകുകയാണ്. ചിത്രത്തിന്റെ അവസാനഘട്ട ജോലികളിലേക്ക് ഉടൻ കടക്കുമെന്നാണ് സൂചന. നേരത്തെ പ്രഖ്യാപിച്ച 2027 ഏപ്രിൽ 7ലെ റിലീസ് ലക്ഷ്യമിട്ടാണ് അണിയറപ്രവർത്തകരുടെ മുന്നൊരുക്കങ്ങൾ.

മാസങ്ങൾ നീണ്ട തീവ്രമായ ചിത്രീകരണത്തിന് ശേഷമാണ് മഹേഷ് ബാബു 'വാരണാസി'യിലെ തന്റെ ഭാഗങ്ങൾക്ക് പാക്കപ്പ് പറഞ്ഞിരിക്കുന്നത്. രാജമൗലി-മഹേഷ് ബാബു കൂട്ടുകെട്ടിൽ ഒരുങ്ങുന്ന ഈ വമ്പൻ ചിത്രം പ്രേക്ഷകർക്ക് മുന്നിൽ എങ്ങനെയായിരിക്കും എത്തുക എന്നതാണ് ഇനി കാത്തിരിപ്പ്. 'വാരണാസി'യുടെ അടുത്ത വലിയ അപ്‌ഡേറ്റിനായി ആകാംക്ഷയോടെ കാത്തിരിക്കുകയാണ് ആരാധകർ.