രാജമൗലിചിത്രത്തിൽ പൃഥ്വിരാജ് കൊടുംക്രൂരനായ വില്ലൻ 'കുംഭ'

എസ്.എസ്. രാജമൗലി-മഹേഷ് ബാബു-പൃഥ്വിരാജ്-പ്രിയങ്കാ ചോപ്ര ടീം ഒന്നിക്കുന്ന ചിത്രം ആരാധകർ ഏറെ നാളായി കാത്തിരിക്കുകയാണ്, ഇപ്പോഴിതാ പ്രേക്ഷകരുടെ ആകാംക്ഷയ്ക്ക് വിരാമമിട്ട് ചിത്രത്തിൽ പൃഥ്വിരാജ് സുകുമാരൻ അവതരിപ്പിക്കുന്ന ക്യാരക്ടർ പോസ്റ്റർ അണിയറപ്രവർത്തകർ റിലീസ് ചെയ്തു. കുംഭ എന്ന കഥാപാത്രത്തെയാണ് പൃഥ്വിരാജ് സുകുമാരൻ ചിത്രത്തിൽ അവതരിപ്പിക്കുന്നത്. രാജമൗലിയുടെയും മഹേഷ് ബാബുവിന്റെയും ഡ്രീംപ്രോജക്ടാണിത്. 'ഗ്ലോബ് ട്രോട്ടർ' എന്ന വിശേഷണത്തോടെയാണ് ചിത്രത്തെക്കുറിച്ചുള്ള വാർത്തകൾ പുറത്തുവരുന്നത്. 'SSMB29' എന്നാണ് ചിത്രത്തിന് താത്കാലികമായി നൽകിയിരിക്കുന്ന പേര്. കൈകൾപോലുമുള്ള ഒരു ഹൈടെക് വീൽചെയറിലിരിക്കുന്ന പൃഥ്വിരാജിനെയാണ് പോസ്റ്ററിൽ കാണാനാകുക.

'പൃഥ്വിയുമൊത്തുള്ള ആദ്യ ഷോട്ട് പകർത്തിയതിനുശേഷം ഞാൻ അദ്ദേഹത്തിനടുത്തേക്ക് ചെന്നുപറഞ്ഞു എനിക്ക് ഇന്നേവരെ അറിയാവുന്നതിൽ വെച്ച് ഏറ്റവും പ്രതിഭാധനരായ അഭിനേതാക്കളിലൊരാളാണ് താങ്കൾ. ദുഷ്ടനും ക്രൂരനും ശക്തനുമായ ഈ പ്രതിനായകൻ കുംഭ സർ​ഗാത്മക സംതൃപ്തി നല്കിയിരുന്നു. അയാളുടെ ഇരിപ്പിടത്തിലേക്ക് അക്ഷരാർഥത്തിൽ ഊർന്നിരുന്നതിന് നന്ദി പൃഥ്വി'-കുംഭ ക്യാരക്ടർ പോസ്റ്റർ പങ്കുവെച്ചുകൊണ്ട് എസ്.എസ്.രാജമൗലി കുറിച്ചു. ഓസ്കാർ പുരസ്കാരംനേടിയ ആർആർആറിന് തൊട്ടുപിന്നാലെയാണ് രാജമൗലി ഈ ബ്രഹ്‌മാണ്ഡ ചിത്രവുമായി എത്തുന്നത്.

'കുംഭയെ അവതരിപ്പിക്കുന്നു, ഞാൻ ഇതുവരെ അഭിനയിച്ചതിൽ വെച്ച് ഏറ്റവും സങ്കീർണ്ണമായ കഥാപാത്രമാണിത്, മഹേഷ് ബാബു നിങ്ങൾക്കായി ഞാൻ തയ്യാറാണ്. പ്രിയങ്കാ ചോപ്രാ ഗെയിം ആരംഭിക്കുന്നു, എന്റെ പരിമിതികളെ നിരന്തരം പരീക്ഷിക്കുന്ന ഒരു ലോകം ഒരുക്കിയ രാജമൗലി സാറിന് നന്ദി'. പൃഥ്വിരാജ് പോസ്റ്റർ പങ്കുവെച്ച് സോഷ്യൽ മീഡിയയിൽ കുറിച്ചു.

നവംബർ 15-ന് ഹൈദരാബാദിലെ റാമോജി ഫിലിം സിറ്റിയിൽ നടക്കുന്ന ചിത്രത്തിന്റെ ലോഞ്ച് ഇവന്റ് ഇന്ത്യൻ സിനിമ കണ്ടതിൽ ഏറ്റവും വലിയ ആഘോഷമായി മാറും. മഹേഷ് ബാബു, പൃഥ്വിരാജ്, പ്രിയങ്കാ ചോപ്ര എന്നിവർ ആദ്യമായി രാജമൗലിക്കൊപ്പം അണിനിരക്കുന്ന ചിത്രം കൂടിയാണിത്. വി.വിജയേന്ദ്ര പ്രസാദാണ് തിരക്കഥ. കീരവാണിയാണ് സംഗീതസംവിധാനം.