അല്ലു-ലോകേഷ്, രാംചരൺ-സുകുമാർ സിനിമകളുടെ അപ്ഡേറ്റുകൾ പുറത്ത്

തെലുങ്ക് സിനിമാലോകത്തെ വന്‍കിട പ്രോജക്ടുകളായ അല്ലു അര്‍ജുന്‍ - ലോകേഷ് കനകരാജ് ചിത്രം 'എഎ23', രാം ചരണ്‍ - സുകുമാര്‍ ചിത്രം 'ആര്‍സി17' എന്നിവയുടെ റിലീസ് തീയതികള്‍ സംബന്ധിച്ച പുതിയ വിവരങ്ങള്‍ പുറത്തുവന്നു. റിപ്പോര്‍ട്ടുകള്‍ പ്രകാരം, അല്ലു അര്‍ജുന്‍ ചിത്രം 2027-ലും രാം ചരണ്‍ ചിത്രം 2028-ലുമാണ് തിയേറ്ററുകളിലേക്ക് എത്താനൊരുങ്ങുന്നത്.

ലോകേഷ് കനകരാജ് സംവിധാനം ചെയ്യുന്ന, താല്കാലികമായി 'എഎ23' എന്ന് പേരിട്ടിരിക്കുന്ന ആക്ഷന്‍ ചിത്രം 2027 ക്രിസ്മസ് റിലീസായി തിയേറ്ററുകളില്‍ എത്തിക്കാനാണ് നിര്‍മാതാക്കള്‍ പദ്ധതിയിടുന്നത്. അനിരുദ്ധ് രവിചന്ദര്‍ സംഗീതം പകരുന്ന ബിഗ് ബജറ്റ് പാന്‍-ഇന്ത്യന്‍ ചിത്രം സ്‌റ്റൈലിഷ് വെസ്റ്റേണ്‍ ആക്ഷന്‍ മൂഡിലാണ് ഒരുക്കുന്നത്. അറ്റ്ലി സംവിധാനം ചെയ്യുന്ന 'രാക്ക' എന്ന വമ്പന്‍ ചിത്രത്തിന്റെ ചിത്രീകരണം പൂര്‍ത്തിയാക്കിയ ശേഷമാകും അല്ലു അര്‍ജുന്‍ ഈ സിനിമയില്‍ പങ്കുചേരുക. പൂജ ഹെഗ്‌ഡെ ചിത്രത്തില്‍ നായികയായി എത്തിയേക്കുമെന്നും സൂചനകളുണ്ട്.

സൂപ്പര്‍ഹിറ്റ് ചിത്രം 'രംഗസ്ഥല്'യ്ക്കു ശേഷം രാം ചരണും സംവിധായകന്‍ സുകുമാറും വീണ്ടും ഒന്നിക്കുന്ന 'ആര്‍സി17' എന്ന ചിത്രം 2028 റിലീസായി പ്ലാന്‍ ചെയ്യുന്നതായാണ് റിപ്പോര്‍ട്ടുകള്‍. മൈത്രി മൂവി മേക്കേഴ്‌സ് നിര്‍മിക്കുന്ന ചിത്രത്തിന്റെ പ്രീ-പ്രൊഡക്ഷന്‍ ജോലികള്‍ പുരോഗമിക്കുകയാണ്.

നിലവില്‍ സോഷ്യല്‍ മീഡിയയിലും ഫിലിം ട്രാക്കര്‍മാര്‍ക്കിടയിലും ഈ വിവരങ്ങള്‍ പ്രചരിക്കുന്നുണ്ടെങ്കിലും, നിര്‍മാതാക്കളുടെ ഭാഗത്തുനിന്നുള്ള ഔദ്യോഗിക റിലീസ് പ്രഖ്യാപനങ്ങള്‍ക്കായി കാത്തിരിക്കുകയാണ് ആരാധകര്‍.