വിക്രം പ്രഭുവിന്റെ പുതിയ സിനിമ തുടങ്ങി;സം​ഗീതം യുവാൻ ശങ്കർ രാജ

തമിഴ് സിനിമയിലെ ശ്രദ്ധേയനായ നടന്‍ വിക്രം പ്രഭുവിന്റെ 26-ാമത് ചിത്രത്തിന്റെ ഷൂട്ടിങ് ആരംഭിച്ചു. താത്കാലികമായി 'വിക്രം പ്രഭു 26' എന്നു പേരിട്ടിരിക്കുന്ന പുതിയ ചിത്രത്തിന്റെ വിശേഷങ്ങള്‍ ആവേശത്തോടെയാണ് ആരാധകര്‍ സ്വീകരിച്ചത്.

പ്രശസ്ത സംഗീതസംവിധായകന്‍ യുവന്‍ ശങ്കര്‍ രാജയാണ് ചിത്രത്തിനായി ഈണങ്ങള്‍ ഒരുക്കുന്നത്. 2017-ല്‍ പുറത്തിറങ്ങിയ 'സത്രിയന്‍' എന്ന ചിത്രത്തിനുശേഷം വിക്രം പ്രഭുവും യുവനും ഒന്നിക്കുന്ന രണ്ടാമത്തെ പ്രോജക്ടാണിത്.

നവാഗതനായ സിദ്ധാര്‍ഥ് ആണ് സംവിധായകൻ. റോമിയോ പിക്‌ചേഴ്‌സിന്റെ ബാനറില്‍ രാഹുല്‍ ആണ് ചിത്രം നിര്‍മിക്കുന്നത്. മുമ്പ് വിജയ് ചിത്രം 'ദി ഗ്രേറ്റസ്റ്റ് ഓഫ് ഓള്‍ ടൈം' (GOAT 2024), അജിത് കുമാര്‍ ചിത്രം 'ഗുഡ് ബാഡ് അഗ്ലി' (2025) എന്നിവ വിതരണം ചെയ്ത പ്രമുഖ ബാനറാണിത്.

2025ല്‍ പുറത്തിറങ്ങി വലിയ രീതിയില്‍ ശ്രദ്ധിക്കപ്പെട്ട 'സിറൈ' എന്ന സിനിമയ്ക്ക് ശേഷമുള്ള വിക്രം പ്രഭുവിന്റെ പുതിയ ചിത്രമായതുകൊണ്ട് തന്നെ വലിയ പ്രതീക്ഷയിലാണ് തെന്നിന്ത്യന്‍ സിനിമാലോകം. ചിത്രത്തിലെ മറ്റ് അഭിനേതാക്കളെക്കുറിച്ചുള്ള വിവരങ്ങള്‍ ഉടന്‍ തന്നെ പുറത്തുവിടുമെന്ന് അണിയറപ്രവര്‍ത്തകര്‍ അറിയിച്ചിട്ടുണ്ട്.