

ദളപതി വിജയ്യും കീർത്തി സുരേഷും കേന്ദ്ര കഥാപാത്രങ്ങളായി, 2017-ൽ പൊങ്കൽ റീലീസായി തിയേറ്ററുകളിലെത്തിയ ഹിറ്റ് ചിത്രം 'ഭൈരവ' വീണ്ടും തിയേറ്ററുകളിലേക്ക്. പുതുവത്സര സമ്മാനമായി 2027 ജനുവരി ഒന്നിനാണ് ചിത്രം തിയേറ്ററുകളിൽ റീ-റിലീസ് ചെയ്യുന്നത്.
ഭരതൻ സംവിധാനം ചെയ്ത ചിത്രം നിർമിച്ചത് ബി. വെങ്കടരാമ റെഡ്ഡിയാണ് (വിജയാ പ്രൊഡക്ഷൻസ്). ഒരു മെഡിക്കൽ വിദ്യാർഥിനിയെ ഗുണ്ടാസംഘത്തിൽ നിന്നു രക്ഷിക്കാൻ ശ്രമിക്കുന്ന നായകന്റെ കഥയാണ് ചിത്രം പറയുന്നത്. ജഗപതി ബാബു, ഡാനിയേൽ ബാലാജി, സതീഷ്, തമ്പി രാമയ്യ, ഹരീഷ് ഉത്തമൻ, മൈം ഗോപി തുടങ്ങി വലിയൊരു താരനിര തന്നെ ചിത്രത്തിലുണ്ടായിരുന്നു.
സന്തോഷ് നാരായണൻ സംഗീതം പകർന്ന ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. റിലീസ് ചെയ്ത സമയത്ത് 100 കോടി ക്ലബ്ബിൽ ഇടംനേടാൻ കഴിഞ്ഞിട്ടുള്ള വിജയ്യുടെ പ്രധാന ചിത്രങ്ങളിലൊന്നാണ് 'ഭൈരവ'. ആരാധകരുടെ വലിയ ആവേശത്തിനിടയിൽ പുതുവർഷത്തിൽ ചിത്രം വീണ്ടും തിയേറ്ററുകളിൽ എത്തുമ്പോൾ വലിയ സ്വീകരണം ലഭിക്കുമെന്നാണു പ്രതീക്ഷിക്കുന്നത്.