ലോകേഷ് മറ്റൊരു യൂണിവേഴ്സിലോ...! 'എൽസിയു'വിനെ മറന്നോ?

കരിയറിൽ ഏറെ വ്യത്യസ്തമായൊരു ഘട്ടത്തിലൂടെയാണ് ലോകേഷ് കനകരാജ് ഇപ്പോൾ കടന്നുപോകുന്നത്. നായകനായി ‘ഡിസി’യിലൂടെ അരങ്ങേറ്റം കുറിച്ച് ബ്ലോക്ക്ബസ്റ്റർ വിജയം നേടിയതിന് പിന്നാലെ, അല്ലു അർജുൻ നായകനാകുന്ന പുതിയ ചിത്രത്തിന്റെ മറ്റൊരു വലിയ ഉത്തരവാദിത്തത്തിലേക്ക് കടന്നിരിക്കുകയാണ് ആരാധകരുടെ പ്രിയ ലോകി.

ഇത്രയേറെ കാര്യങ്ങൾ ഒരേസമയം സംഭവിച്ചുകൊണ്ടിരിക്കെ ലോകേഷ് സമ്മർദത്തിലായിരിക്കുമെന്ന് അവർ കരുതുന്നതിൽ തെറ്റില്ല. എന്നാൽ ഏറെക്കാലം അവഗണിക്കാൻ അദ്ദേഹത്തിന് കഴിയാത്ത ഒരു കാര്യമുണ്ട്- ലോകേഷ് സിനിമാറ്റിക് യൂണിവേഴ്സ് അഥവാ എൽസിയു.

ലോകേഷിനെ സംബന്ധിച്ചിടത്തോളം മറ്റൊരു ഫ്രാഞ്ചൈസി മാത്രമല്ല എൽസിയു. ‘കൈതി’, ‘വിക്രം’ എന്നീ ചിത്രങ്ങളിലൂടെ രൂപപ്പെട്ട ഈ ബ്രാൻഡ് ദക്ഷിണേന്ത്യൻ സിനിമയിലെ തന്നെ ഏറ്റവും ആവേശകരമായ സിനിമാറ്റിക് യൂണിവേഴ്സുകളിലൊന്നായി മാറി. അതുകൊണ്ടുതന്നെ ഇനി വരാനിരിക്കുന്ന ചിത്രങ്ങളെക്കുറിച്ചുള്ള പ്രേക്ഷക പ്രതീക്ഷകളും വളരെ ഉയർന്നതാണ്.

എന്നാൽ ‘കൈതി 2’ ഇപ്പോഴും ചിത്രീകരണം ആരംഭിച്ചിട്ടില്ല. മറ്റൊരു സംവിധായകന്റെ സംവിധാനത്തിൽ എൽസിയുവിന്റെ ഭാഗമാക്കിയ ‘ബെൻസ്’ എന്ന ചിത്രവും വൈകുന്നു. ചിത്രത്തിന്റെ ഷൂട്ടിങ്ങുമായി ബന്ധപ്പെട്ട് അണിയറപ്രവർത്തകരിൽ നിന്ന് കൃത്യമായ ആശയവിനിമയം ഇതുവരെ ലഭിച്ചിട്ടില്ലെന്ന് അതിലെ താരം നിവിൻ പോളി അടുത്തിടെ തുറന്നുപറഞ്ഞിരുന്നു.

ലോകേഷ് സ്വന്തം അഭിനയ തിരക്കുകളിലും അല്ലു അർജുന്റെ ചിത്രത്തിന്റെ ഉത്തരവാദിത്തത്തിലുമെല്ലാം ഇപ്പോൾ വ്യാപൃതനാണ്. എങ്കിലും എൽസിയുവിന് കൃത്യമായ ആസൂത്രണവും വ്യക്തതയും ആവശ്യമാണ്. ഓരോ വൈകലും പ്രേക്ഷകരുടെ കാത്തിരിപ്പ് നീട്ടും. കാലക്രമേണ ഈ യൂണിവേഴ്സിനോടുള്ള ആവേശത്തെ ബാധിക്കുകയും ചെയ്തേക്കാം.

ലോകേഷ് കനകരാജ് ഇന്ന് ഈ നിലയിലെത്തിയതിന്റെ പ്രധാന കാരണങ്ങളിലൊന്നാണ് എൽസിയു. അതുകൊണ്ട് നിലവിലെ തിരക്കുകൾ കഴിയുമ്പോൾ ഈ സിനിമാറ്റിക് യൂണിവേഴ്സിനും അദ്ദേഹം തുല്യമായ ശ്രദ്ധ നൽകുകയും വരാനിരിക്കുന്ന ചിത്രങ്ങൾ കൃത്യമായി മുന്നോട്ടുപോകുന്നുവെന്ന് ഉറപ്പാക്കുകയും വേണമെന്നാണ് എൽസിയു ആരാധകർ ഒരേസ്വരത്തിൽ ആവശ്യപ്പെടുന്നത്.