- Industry NewsIndustry News
- Exclusives
- Specials
- Premium
- Reviews
- OTT
- Padam Feed
- Music
തമിഴകത്തെ സ്റ്റൈലിഷ് സംവിധായകന്റെ പുതിയ മാസ് അവതാരം ഏറ്റെടുത്ത് പ്രേക്ഷകര്. ക്യാമറയ്ക്ക് പിന്നില്നിന്ന് വെള്ളിത്തിരയിലേക്ക് നായകനായി പറന്നിറങ്ങിയ ലോകേഷ് കനകരാജിന്റെ പുതിയ പരീക്ഷണം ബോക്സ് ഓഫീസില് കാറ്റല്ല, കൊടുങ്കാറ്റ് തന്നെ വിതയ്ക്കുകയാണ്. അരുണ് മാതേശ്വരന് ഒരുക്കിയ 'ഡിസി' ആക്ഷന് ത്രില്ലര് ചിത്രം റിലീസ് ചെയ്ത് വെറും രണ്ടാഴ്ച പിന്നിടുമ്പോള് 100 കോടി ക്ലബ്ബില് ഇടംപിടിച്ചു.
മാനഗരം, കൈതി, മാസ്റ്റര്, വിക്രം, ലിയോ, കൂലി എന്നിങ്ങനെ ഒന്നിനു പിറകെ ഒന്നായി സൂപ്പര്ഹിറ്റുകള് സമ്മാനിച്ച സംവിധായകനില് നിന്ന് ഇങ്ങനെയൊരു 'നായക നടനെ' പ്രേക്ഷകര് പ്രതീക്ഷിച്ചിരുന്നില്ല. ഓഗസ്റ്റ് 7-ന് തിയേറ്ററുകളിലെത്തിയ ചിത്രത്തിന് ആദ്യദിനം അഞ്ച് കോടിയോളം രൂപയാണ് ലഭിച്ചതെങ്കിലും, പിന്നീട് തിയേറ്ററുകളില് അലയടിച്ച അനുകൂല തരംഗത്തില് കളക്ഷന് കുത്തനെ ഉയരുകയായിരുന്നു. വെറും അഞ്ച് ദിവസം കൊണ്ട് 50 കോടി കടന്ന ചിത്രം രണ്ടാഴ്ച കൊണ്ട് 100 കോടിയെന്ന സ്വപ്നനേട്ടത്തിലേക്ക് എത്തിനില്ക്കുമ്പോള് തമിഴകത്തെ പുതിയ ആക്ഷന് ഹീറോയുടെ ഉദയം കൂടിയാണ് രേഖപ്പെടുത്തപ്പെടുന്നത്.
പോലീസ് ക്രൂരതയ്ക്ക് ഇരയാകുന്ന ഒരു കുടുംബത്തിന് കാവലായി നില്ക്കുന്ന ദേവദാസ് എന്ന കഥാപാത്രമായാണ് ലോകേഷ് സ്ക്രീനില് തകര്ത്താടുന്നത്. റഫ് ആന്ഡ് ടഫ് ലുക്കിലും തീവ്രമായ അഭിനയമുഹൂര്ത്തങ്ങളിലും ലോകേഷ് നിറഞ്ഞാടിയത് സിനിമാസ്നേഹികളെയും നിരൂപകരെയും ഒരുപോലെ അമ്പരപ്പിച്ചു. സാധാരണ പ്രേക്ഷകര്ക്ക് പുറമെ സൂര്യ, മഹേഷ് ബാബു, അല്ലു അര്ജുന്, വിഗ്നേഷ് ശിവന്, സൗന്ദര്യ രജനികാന്ത് തുടങ്ങിയ ഇന്ഡസ്ട്രിയിലെ വമ്പന് താരങ്ങളും ലോകേഷിന്റെ ഈ മാസ് എന്ട്രിയെയും അരുണ് മാതേശ്വരന്റെ ക്രാഫ്റ്റിനെയും പരസ്യമായി പ്രശംസിച്ച് രംഗത്തെത്തിയിട്ടുണ്ട്.
റോക്കി, സാണി കായിധം, ക്യാപ്റ്റന് മില്ലര് എന്നീ സിനിമകളിലൂടെ തന്റേതായ ഡാര്ക്ക് ആക്ഷന് ശൈലി അടയാളപ്പെടുത്തിയ അരുണ് മാതേശ്വരന്റെ നാലാമത്തെ സംവിധാന സംരംഭമാണിത്. വാമിഖ ഗബ്ബി, സഞ്ജന കൃഷ്ണമൂര്ത്തി എന്നിവര് നായികമാരായ ചിത്രത്തില് തലവാസല് വിജയ്, കസ്തൂരി രാജ തുടങ്ങിയ വമ്പന് താരനിര തന്നെയുണ്ട്. സണ് പിക്ചേഴ്സിന്റെ ബാനറില് കലാനിധി മാരന് നിര്മിച്ച ചിത്രത്തിന് അനിരുദ്ധ് രവിചന്ദറിന്റെ മാസ് പശ്ചാത്തലസംഗീതവും മുകേഷ് ജിയുടെ ഛായാഗ്രഹണവും വലിയ കരുത്താണ് പകരുന്നത്. ഇതോടെ, സംവിധാനത്തിലും അഭിനയത്തിലും ഒരുപോലെ ബോക്സ് ഓഫീസ് ഭരിക്കാന് തനിക്ക് കഴിയുമെന്ന് തെളിയിച്ചിരിക്കുകയാണ് ലോകേഷ് കനകരാജ്.