നടനാകാൻ ജേസൺ സഞ്ജയ്, നിർമിക്കാൻ ആറ്റ്‌ലി; കീർത്തിശ്വരനുമായി ചർച്ചകൾ

വിജയ്‌യുടെ മകൻ ജേസൺ സഞ്ജയ് നടനായി അരങ്ങേറ്റം കുറിക്കാനൊരുങ്ങുന്നതായി റിപ്പോർട്ടുകൾ. 'സിഗ്മ' എന്ന ചിത്രത്തിലൂടെ സംവിധായകനായി അരങ്ങേറ്റം കുറിച്ച സഞ്ജയ്, ഇനി അഭിനയരംഗത്തേക്ക് കടക്കാനാണ് പദ്ധതിയിടുന്നതെന്നാണ് സൂചന. വിജയുമായി അടുത്ത ബന്ധമുള്ള സംവിധായകൻ ആറ്റ്‌ലി പുതിയ ചിത്രത്തിന്റെ നിർമാണച്ചുമതല ഏറ്റെടുക്കാൻ താൽപര്യം പ്രകടിപ്പിച്ചതായും റിപ്പോർട്ടുകളുണ്ട്.

തമിഴ് സിനിമാ വൃത്തങ്ങളിൽ നിന്നുള്ള പുതിയ വിവരങ്ങൾ അനുസരിച്ച്, 'ഡ്യൂഡ്' എന്ന ചിത്രത്തിലൂടെ അരങ്ങേറ്റം കുറിച്ച സംവിധായകൻ കീർത്തിശ്വരൻ ഒരുക്കുന്ന കഥയിലൂടെയായിരിക്കും ജേസൺ സഞ്ജയ് നടനായി എത്തുക. ഇരുവരും തമ്മിൽ ഇതുസംബന്ധിച്ച ചർച്ചകൾ നടന്നുവരികയാണെന്നാണ് വിവരം. തന്റെ നിർമാണ സംരംഭമായ 'ബത്ത'യുടെ വിജയത്തിന്റെ പശ്ചാത്തലത്തിൽ ആറ്റ്‌ലി ഈ ചിത്രത്തിന്റെ നിർമാതാവായേക്കുമെന്നും റിപ്പോർട്ടുകളുണ്ട്.

സഞ്ജയ് സംവിധാനം ചെയ്ത ആദ്യ ചിത്രമായ 'സിഗ്മ' നിർമിച്ചത് ലൈക്ക പ്രൊഡക്ഷൻസായിരുന്നു. അദ്ദേഹത്തിന്റെ അഭിനയ അരങ്ങേറ്റ ചിത്രവും ലൈക്ക തന്നെ നിർമിക്കുമെന്നായിരുന്നു നേരത്തെയുണ്ടായിരുന്ന അഭ്യൂഹങ്ങൾ. എന്നാൽ പദ്ധതികളിൽ ഇപ്പോൾ മാറ്റമുണ്ടായതായാണ് സൂചന.

നടനെന്ന നിലയിൽ സഞ്ജയിന്റെ അരങ്ങേറ്റത്തെക്കുറിച്ച് വ്യത്യസ്ത അഭിപ്രായങ്ങൾ നിലനിൽക്കുന്നുണ്ട്. അതേസമയം, സിനിമാരംഗത്തെ തന്റെ സ്വാധീനവും ബന്ധങ്ങളും പ്രയോജനപ്പെടുത്തി അഭിനയരംഗത്തും ഭാഗ്യം പരീക്ഷിക്കാനാണ് സഞ്ജയ് ഒരുങ്ങുന്നതെന്നാണ് റിപ്പോർട്ടുകൾ.

ആറ്റ്‌ലി നേരിട്ട് പദ്ധതിയുടെ ഭാഗമാകുന്ന സാഹചര്യത്തിൽ സഞ്ജയിന്റെ അരങ്ങേറ്റം മികച്ച രീതിയിൽ ഒരുക്കാൻ അദ്ദേഹത്തിന് കഴിയുമെന്നാണ് ചിലരുടെയെങ്കിലും പ്രതീക്ഷ. തമിഴ് സിനിമയിലെ പുതിയ തലമുറയിലെ സൂപ്പർതാരമായി സഞ്ജയിനെ വളർത്തിയെടുക്കാൻ ആറ്റ്‌ലിക്ക് സാധിക്കുമോ എന്നതും കാത്തിരുന്ന് കാണേണ്ട കാര്യമാണ്.