'ഇല്ലൈ...റൊമ്പ ദൂര പോഗലൈ റാം...'; '96' വീണ്ടും തിയേറ്ററുകളിലേക്ക്

ഇന്ത്യൻസിനിമ നെഞ്ചേറ്റിയ പ്രണയചിത്രം '96' വീണ്ടും തിയേറ്ററുകളിലേക്ക് എത്തുന്നു. സി. പ്രേംകുമാര്‍ സംവിധാനം ചെയ്ത് വിജയ് സേതുപതിയും തൃഷയും പ്രധാന വേഷങ്ങളിലെത്തിയ ചിത്രം റിലീസ് ചെയ്ത് എട്ടു വര്‍ഷത്തിനുശേഷമാണ് വീണ്ടും പ്രദര്‍ശനത്തിനെത്തുന്നത്.

2018 ഒക്ടോബര്‍ നാലിനായിരുന്നു ചിത്രം ആദ്യം തിയേറ്ററുകളിലെത്തിയത്. റീ-റിലീസിലൂടെ പുതിയ തലമുറയിലെ പ്രേക്ഷകര്‍ക്ക് ബിഗ് സ്‌ക്രീനില്‍ ചിത്രം കാണാനും, പഴയ പ്രേക്ഷകര്‍ക്ക് റാം-ജാനു കൂട്ടുകെട്ടിന്റെ പ്രണയം വീണ്ടും ആസ്വദിക്കാനുമുള്ള അവസരമാണ് ഒരുങ്ങുന്നത്.

സ്‌കൂള്‍ റീയൂണിയനില്‍ വര്‍ഷങ്ങള്‍ക്കുശേഷം കണ്ടുമുട്ടുന്ന രാമചന്ദ്രന്‍ (റാം), ജാനകി (ജാനു) എന്നിവരുടെ വികാരനിര്‍ഭരമായ പ്രണയകഥയാണ് ചിത്രം പറഞ്ഞത്. റാം, ജാനു എന്നിവരുടെ ചെറുപ്പകാലം അവതരിപ്പിച്ചത് ആദിത്യ ഭാസ്‌കറും ഗൗരി കിഷനുമായിരുന്നു. പ്രേംകുമാറിന്റെ മികച്ച സംവിധാനവും വിജയ് സേതുപതി-തൃഷ കൂട്ടുകെട്ടിന്റെ അഭിനയവും ഗോവിന്ദ് വസന്തയുടെ സംഗീതവുമായിരുന്നു ചിത്രത്തിന്റെ പ്രധാന ആകര്‍ഷണം.