തീയിൽ കുരുത്ത' കുട്ടികൾ ദുരന്തമുഖത്തെ മനുഷ്യരുടെ കഥ

കത്തിയാളുന്ന കാട്ടുതീ. മരങ്ങൾ കരിഞ്ഞും പുഴകൾ തിളച്ചും മറിയുന്ന പകൽ. കട്ടകറുപ്പിൽ പുകച്ചുരുളുകൾ മൂടിയ ആകാശം. മനുഷ്യൻ പ്രാണനായി നിലവിളിച്ചോടുന്നു. അടിമുടിയാളുന്ന തീയ്ക്ക് നടുവിൽ ഒരു ബസും അതിൽ 22 സ്കൂൾ കുട്ടികളും പെട്ടുപോകുന്നു. അവരുടെ അധ്യാപികയും ബസ് ഡ്രൈവറും ചേർന്ന് നടത്തുന്ന അസാമാന്യമായ രക്ഷാപ്രവർത്തനത്തിന്റെ കഥ - 'ദി ലോസ്റ്റ്‌ ബസ്'.

2018-ൽ കാലിഫോർണിയയെ വിഴുങ്ങിയ ‘ക്യാമ്പ് ഫയർ’ എന്ന ഭീകരമായ കാട്ടുതീയുടെ യഥാർത്ഥ സംഭവങ്ങളെ ആസ്പദമാക്കിയുള്ള സിനിമയാണിത്. പോൾ ഗ്രീൻഗ്രാസ് സംവിധാനം നിർവഹിച്ച ചിത്രത്തിൽ ഓസ്കാർ ജേതാവായ മാത്യു മക്കോനാഗേ ആണ് നായകകഥാപാത്രമായ കെവിനെ അവതരിപ്പിച്ചത്. സ്കൂൾ ബസ് ഡ്രൈവറായ കെവിന്റെ വ്യക്തിജീവിതം വളരെ ആഴത്തിൽ പ്രേക്ഷകനിലേക്ക് എത്തിച്ചാണ് സിനിമ വികസിക്കുന്നത്. കാട്ടുതീ ഉണ്ടാവുന്നതും അത് നഗരത്തെ വിഴുങ്ങുന്നതും നിയന്ത്രണാതീതമാകുന്നതും വിശദമായി സിനിമയിലുണ്ട്. അവിടുന്നാണ് കെവിനിലേക്കും മേരിയെന്ന അധ്യാപികയിലേക്കും സിനിമ വലുതാകുന്നത്.

ബസ് നിറയെ സ്കൂൾ കുട്ടികളുമായി അവർ അപ്രതീക്ഷിതമായി ഈ ദുരന്തത്തിനിടയിൽ അകപ്പെടുന്നു. കാട്ടുതീ അതിവേഗം പാരഡൈസ് പട്ടണത്തെ വിഴുങ്ങുമ്പോൾ, രക്ഷപ്പെടാനുള്ള വഴികളെല്ലാം ഇല്ലാതാകുന്നു. ഗതാഗതക്കുരുക്കിൽപ്പെട്ട റോഡുകളിലൂടെയും, കത്തികരിയുന്ന മരങ്ങൾക്കിടയിലൂടെയും, തകരുന്ന വഴികളിലൂടെയും കുട്ടികളെ സുരക്ഷിതമായി പുറത്തെത്തിക്കാനുള്ള ശ്രമങ്ങളാണ് സിനിമയുടെ ഇതിവൃത്തം.

യാതൊരു ഹീറോയിസവും ഇല്ലാതെ, ഒരു ദുരന്തമുഖത്ത് സാധാരണക്കാരായ രണ്ട് പേർ നടത്തുന്ന അസാധാരണ പോരാട്ടത്തിന്റെ കഥയാണ് 'ലോസ്റ്റ്‌ ബസ്'. കണ്ടിരിക്കുന്ന പ്രേക്ഷകനിലും ഭീതി നിറയ്ക്കാൻ, ശ്വാസംമുട്ടിയ്ക്കാൻ സിനിമയ്ക്ക് ആവുന്നുണ്ട്. ചിലപ്പോഴൊക്കെ തീയുടെ ഉള്ളിൽ നിന്ന് പുറത്തുകടക്കാൻ പ്രേക്ഷകനും വല്ലാതെ ആഗ്രഹിക്കുമെന്നിടത്താണ് കഥപറച്ചിൽ മികവിലെത്തുന്നത്.

ഛായാഗ്രഹണം, പശ്ചാത്തല സംഗീതം, എഡിറ്റിങ് എന്നിവയിലെ പെർഫെക്ഷനും ചിത്രത്തിന്റെ നിലവാരമുയർത്തി. ക്ലൈമാക്സിലെ ബിജിഎം ഗംഭീരം. ഒരു സർവൈവൽ ഡ്രാമയിൽ പ്രകടനങ്ങളിലെ മികവാണ് സിനിമയുടെ വിധി നിർണയിക്കുന്നത്. ഇവിടെ ഇമോഷൻസിനെ കൃത്യമായി പ്രേക്ഷകനിലേക്ക് എത്തിക്കാൻ പ്രകടനത്തിലെ കൈയടക്കത്തിലൂടെ എല്ലാവർക്കും കഴിയുന്നു. 'ലോസ്റ്റ്‌ ബസ്' ഒരനുഭവമാണ്. നല്ല വിഷ്വൽ, സൗണ്ട് ക്വാളിറ്റിയിൽ ആസ്വദിച്ചാൽ പെട്ടെന്നൊന്നും മറക്കാനിടയില്ലാത്ത സിനിമ. ആപ്പിൾ ടിവിയിലും ആമസോൺ പ്രൈം വീഡിയോയിലും ചിത്രം കാണാം.