ജെഎസ്കെ ഓ​ഗസ്റ്റ് 15 മുതൽ സീ-5ൽ

പേരിനെച്ചൊല്ലിയുള്ള വിവാ​ദത്തിലൂടെ വാർത്തകളിൽ നിറഞ്ഞ,സുരേഷ് ​ഗോപി നായകനായ 'ജാനകി വി വേഴ്സസ് സ്റ്റേറ്റ് ഓഫ് കേരള(ജെഎസ്കെ)' ഓ​ഗസ്റ്റ് 15ന് സീ-5(Zee-5)ൽ സ്ട്രീം ചെയ്തുതുടങ്ങും. മലയാളത്തിനു പുറമേ തമിഴ്,തെലുങ്ക്,കന്നഡ,ഹിന്ദി ഭാഷകളിലും ജെഎസ്കെ കാണാം. പേരുവിവാ​ദം ചൂടുപിടിച്ചുനില്കെ തന്നെയാണ് സീ-5 ചിത്രത്തിന്റെ ഒടിടി അവകാശം സ്വന്തമാക്കിയത്. റിലീസ് ചെയ്ത് 28 ദിവസത്തിനുശേഷം സ്ട്രീമിങ് എന്നതായിരുന്നു കരാർ.

മലയാളത്തിൽ വലിയ പ്രോജക്ടുകളുമായി കൂടുതൽ സജീവമാകാനൊരുങ്ങുന്നതിന്റെ ഭാ​ഗമായാണ് 'ജാനകി വി വേഴ്സസ് സ്റ്റേറ്റ് ഓഫ് കേരള'യുടെ ഒ.ടി.ടി അവകാശം സീ-5 സ്വന്തമാക്കിയത്. വെബ്സീരീസുകളുൾപ്പെടെ പുതിയ പദ്ധതിയുടെ ഭാ​ഗമായുണ്ടാകും.

'ജാനകി വേഴ്സസ് സ്റ്റേറ്റ് ഓഫ് കേരള എന്നായിരുന്നു ചിത്രത്തിന്റെ പേര്. ഇത് മാറ്റാതെ പ്രദർശനാനുമതി നല്കില്ലെന്ന് സെൻസർബോർഡ് വ്യക്തമാക്കിയതോടെയാണ് വിവാദങ്ങൾക്ക് തുടക്കമായത്. സിനിമാ സംഘടനകളെല്ലാം ഇതിൽ പ്രതിഷേധമുയർത്തുകയും ചെയ്തു.

നിർമാതാക്കളായ കോസ്മോസ് എന്റർടെയ്ൻമെന്റ് ഹൈക്കോടതിയെ സമീപിച്ചതിനെത്തുടർന്ന് ഹർജി പരി​ഗണിച്ച ജസ്റ്റിസ് എൻ.ന​ഗരേഷ് സിനിമ കാണുന്നതുവരെയുള്ള സംഭവവികാസങ്ങളുണ്ടായി. വാദപ്രതിവാദങ്ങൾക്കൊടുവിൽ സിനിമയുടെ പേരിലെ ജാനകി എന്നത് ജാനകി വി എന്നാക്കാൻ നിർമാതാക്കൾ സമ്മതിച്ചു. അതോടെയാണ് സെൻസർബോർഡ് പ്രദർശനാനുമതി നല്കിയത്. ഇതിനിടെയാണ് ചിത്രത്തിന്റെ ഒ.ടി.ടി അവകാശം വിറ്റുപോയത്. നേരത്തെ സുരേഷ് ​ഗോപിയുടെ 'പാപ്പൻ'എന്ന സിനിമയുടെ ഒ.ടി.ടി അവകാശവും സീ-5 ആണ് വാങ്ങിയത്.