'അശ്ലീലസിനിമ കാണാറുണ്ടോ,ആൺസുഹൃത്തുണ്ടോ?'; ജാനകി വേഴ്സസ് സെൻസർബോർഡിന് പിന്നിലെ കാരണങ്ങൾ

ജാനകി വേഴ്സസ് സ്റ്റേറ്റ് ഓഫ് കേരള(ജെഎസ്കെ) എന്ന സിനിമയുടെ പേര് മാറ്റാതെ പ്രദർശനാനുമതി നല്കാനാകില്ലെന്ന സെൻസർബോർഡിന് തീരുമാനത്തിന് കാരണമായത് അതിലെ ചില കോടതിരം​ഗങ്ങൾ. ലൈം​ഗികാതിക്രമത്തിന് ഇരയായ ജാനകി എന്ന പെൺകുട്ടിയാണ് ജെഎസ്കെയിലെ നായിക. കേസിന്റെ ക്രോസ് വിസ്താരവേളയിൽ ജാനകിയോട് 'അശ്ലീലസിനിമ കാണാറുണ്ടോ,ആൺസുഹൃത്തുണ്ടോ,ലഹരിമരുന്നുകൾ ഉപയോ​ഗിക്കാറുണ്ടോ' തുടങ്ങിയ പ്രകോപനപരമായ ചോ​ദ്യങ്ങൾ ഉന്നയിക്കുന്നുണ്ടെന്ന് സെൻസർബോർഡ് ഹൈക്കോടതിയിൽ സമർപ്പിച്ച സത്യവാങ്മൂലത്തിൽ പറയുന്നു.

ചിത്രത്തിന് പ്രദർശനാനുമതി നിഷേധിച്ചതിനെതിരേ നിർമാതാക്കളായ കോസ്മോസ് എന്റർടെയ്ൻമെന്റ് നല്കിയ ഹർജിയിന്മേലുളള വാദത്തിനിടെയാണ് സെൻസർബോർഡിനുവേണ്ടി ചീഫ് എക്സിക്യൂട്ടീവ് ഓഫീസർ രാജേന്ദ്രസിങ് രേഖാമൂലം വിശദീകരണം നല്കിയത്. ചിത്രത്തിന്റെ പേരുമാറ്റുന്നത് കഥാ​ഗതിയെ ബാധിക്കില്ലെന്ന് ഇതിൽ പറയുന്നു.

ലൈം​ഗികാതിക്രമത്തിനിരയായി നീതി തേടുന്ന പെൺകുട്ടിക്ക് ജാനകി എന്ന പേരുനല്കിയത് മതവികാരം വ്രണപ്പെടുത്തുകയും പൊതുജീവിതത്തിൽ അലോസരമുണ്ടാക്കുകയും ചെയ്യും. പീഡനത്തിനിരയായ പെൺകുട്ടിയെ ഒരു മതവിഭാ​ഗത്തിൽ പെട്ടയാൾ സഹായിക്കുകയും മറ്റൊരു വിഭാ​ഗത്തിൽ പെട്ടയാൾ അപമാനകരമായ ചോദ്യങ്ങളുന്നയിച്ച് ക്രോസ് വിസ്താരം നടത്തുകയും ചെയ്യുന്നത് സമുദായ സംഘർഷത്തിന് വഴിയൊരുക്കുമെന്നും സത്യവാങ്മൂലത്തിൽ പറയുന്നു.

മലയാളത്തിനുപുറമേ ഹിന്ദി,തമിഴ്,കന്നഡ,തെലുങ്ക് ഭാഷകളിൽ ചിത്രം റിലീസ് ചെയ്യുന്നതിലൂടെ രാജ്യമെങ്ങും ഈ വിഷയമെത്തും. പ്രദർശനാനുമതി നല്കിയാൽ അത് ക്രമസമാധാന പ്രശ്നങ്ങളുണ്ടാക്കും. ശരാശരി ധാർമികതയുള്ള മനുഷ്യന്റെ കാഴ്ചപ്പാടിലൂടെയാണ് ഇത്തരം സിനിമകളെ സമീപിക്കേണ്ടത്. മുമ്പ് ദൈവങ്ങളുടെ പേരുന്നയിച്ച സിനിമകളുടെ കഥ ഇത്തരത്തിലായിരുന്നില്ല. വിവാദങ്ങളുടെ പശ്ചാത്തലത്തിൽ 'സെക്സി ​ദുർ​ഗ' എന്ന ചിത്രത്തിന്റെ പേര് 'എസ്.ദുർ​ഗ' എന്നാക്കി മാറ്റിയ സംഭവും സെൻസർ ബോർഡ് വിശദീകരണത്തിൽ എടുത്തുപറഞ്ഞു.

മത,വംശ വിദ്വേഷകരമായ കാര്യങ്ങൾ പാടില്ലെന്ന നിർ​ദേശം ലംഘിച്ചതിനാലാണ് സർട്ടിഫിക്കറ്റ് നല്കാത്തതെന്ന് നിർമാതാക്കളുടെ ഹർജിയുടെ വാദത്തിനിടെ ഹൈക്കോടതിയെ സെൻസർബോർഡ് അറിയിച്ചിരുന്നു. കാരണങ്ങൾ വ്യക്തമാക്കാൻ കോടതി നിർദേശിച്ചു. തുടർന്നാണ് സെൻസർബോർഡ് സത്യവാങ്മൂലം നല്കിയത്.

ചിത്രത്തിൽ ജാനകിയെ അവതരിപ്പിക്കുന്നത് 'പ്രേമ'ത്തിലൂടെ ശ്രദ്ധേയയായ അനുപമ പരമേശ്വരനാണ്. അഭിഭാഷകന്റെ കഥാപാത്രമാണ് കേന്ദ്രമന്ത്രി സുരേഷ് ​ഗോപിയുടേത്.