'വരവി'ന്റെ ഫസ്റ്റ് ലുക്ക് വരവ് ജോജുവിന്റെ പിറന്നാൾ ദിനത്തിൽ

ഷാജി കൈലാസ് -ജോജു ജോർജ്-എ.കെ.സാജൻ കൂട്ടുകെട്ടിലൊരുങ്ങുന്ന 'വരവി'ന്റെ ഫസ്റ്റ് ലുക്ക് പോസ്റ്റർ ജോജുവിന്റെ ജന്മദിനമായ ഒക്ടോബർ 22ന് വൈകീട്ട് ആറിന് പുറത്തിറക്കും. വൻതാരനിരയെ അണിനിരത്തി ഷാജി കൈലാസ് സംവിധാനം ചെയ്യുന്ന ഈ ചിത്രം നിർമിക്കുന്നത് ഓൾ​ഗ പ്രൊഡക്ഷൻസിന്റെ ബാനറിൽ നൈസി റജിയാണ്.

മുരളി ഗോപി, അർജുൻ അശോകൻ,ദീപക് പറമ്പോൽ, ബാബുരാജ്, ബൈജു സന്തോഷ്,അസീസ് നെടുമങ്ങാട്,ബോബി കുര്യൻ,ശ്രീജിത്ത് രവി,അഭിമന്യു ഷമ്മി തിലകൻ, ബിജു പപ്പൻ, കോട്ടയം രമേശ്, ബാലാജി ശർമ്മ, ചാലി പാല, സുകന്യ,വാണി വിശ്വനാഥ്, വിൻസി അലോഷ്യസ് സാനിയ അയ്യപ്പൻ തുടങ്ങി അഭിനേതാക്കളുടെ വമ്പൻനിരയാണ് ചിത്രത്തിൽ. വർഷങ്ങൾക്ക് ശേഷം സുകന്യ മലയാളസിനിമയിലേക്ക് തിരിച്ചെത്തുന്ന എന്ന പ്രത്യകതയും 'വരവി'നുണ്ട്.

ആക്ഷൻ ത്രില്ലറായ 'വരവ്' പോളി എന്ന പോളച്ചന്റെ ജീവിതപോരാട്ടത്തിന്റെ കഥയാണ് പറയുന്നത്. ജോജുവാണ് പോളച്ചനാകുന്നത്. 'ചിന്താമണി കൊലക്കേസ്', 'റെഡ് ചില്ലീസ്','ദ്രോണ' എന്നീ ഹിറ്റുകൾക്ക് ശേഷം ഷാജി കൈലാസിനായി എ.കെ.സാജൻ തിരക്കഥയൊരുക്കുന്ന ചിത്രമാണ് 'വരവ്'.

തെന്നിന്ത്യയിലെ പ്രശസ്ത ഛായാ​ഗ്രാഹകൻ എസ്.ശരവണനാണ് ക്യാമറ. സാം സി.എസ് ആണ് സം​ഗീതം. എഡിറ്റിങ് ഷമീർ മുഹമ്മദ് നിർവഹിക്കുന്നു. അര ഡസനോളം വരുന്ന 'വരവി'ലെ ആക്ഷൻ രംഗങ്ങൾ ദക്ഷിണേന്ത്യയിലെ ഏറ്റവും മികച്ച ആക്ഷൻ കോറിയോഗ്രാഫർമാരായ കലൈ കിങ്സ്റ്റൺ, ഫീനിക്സ് പ്രഭു, സ്റ്റണ്ട് സെൽവ, കനൽക്കണ്ണൻ എന്നിവർ ഒരുക്കുന്നു.

കോ പ്രൊഡ്യൂസർ - ജോമി ജോസഫ്, കലാസംവിധാനം-സാബു റാം,മേക്കപ്പ്- സജി കാട്ടാക്കട, കോസ്റ്റ്യൂം- സമീറ സനീഷ്,ചീഫ് അസോസിയേറ്റ് ഡയറക്ടർ-സ്യമന്തക് പ്രദീപ്,പ്രൊഡക്ഷൻ കൺട്രോളർ - വിനോദ് മംഗലത്ത്.പ്രൊഡക്ഷൻ എക്സിക്യൂട്ടീവ്- പ്രതാപൻ കല്ലിയൂർ, പ്രൊഡക്ഷൻ മാനേജർമാർ - ശിവൻ പൂജപ്പുര, അനിൽ അൻഷാദ്,സ്റ്റിൽസ് - ഹരി തിരുമല,പിആർഒ-വാഴൂർ ജോസ്