'മമ്മൂട്ടിയുടെ അഭിനയം പ്രതിഭാസം, ഒരുതരം ട്രാൻസ്'- ആത്മസുഹൃത്തിന്റെ അനുഭവം

മമ്മൂട്ടിയുടെ അഭിനയം അദ്ഭുതപ്രതിഭാസമെന്ന് ആത്മസുഹൃത്തും അഭിനേതാവുമായ തകഴി രാജശേഖരൻ. അദ്ദേഹത്തിനൊപ്പം അഭിനയച്ചതിന്റെ അനുഭവം ഓർമിച്ച് സിം​​ഗപ്പുർ മലയാളിയായ രാജശേഖരൻ എഴുതുന്നു:'മമ്മൂട്ടി അഭിനയകഷ്ടപ്പാട് ഒന്നും കാണിക്കുന്നില്ല. പക്ഷേ മുഖത്തെ പേശികളുടെ ചെറിയ ചലനങ്ങൾപോലും നൂറുമടങ്ങ് പ്രഭാവത്തോടെയാണ് ക്യാമറയിൽ പതിയുന്നത്.' രാജശേഖരന്റെ ഫേസ്ബുക്ക് കുറിപ്പിന്റെ പൂർണരൂപം:

അഭിനയചക്രവർത്തിക്ക് അഭിനന്ദനങ്ങൾ. അദ്ദേഹവുമായി ഒരുമിച്ചു ക്യാമറക്ക് മുൻപിൽ ആദ്യമായി മുഖം കാണിക്കാൻ ഭാഗ്യമുണ്ടായ ഈയുള്ളവന് അദ്ദേഹത്തോട് അതിയായ കടപ്പാട് ഉണ്ട്. വളരെ വർഷങ്ങളുടെ സൗഹൃദം മുതൽക്കൂട്ടായിട്ടുണ്ടെങ്കിലും ഇടപഴകാനുള്ള എല്ലാ സ്വാതന്ത്ര്യമുണ്ടായിട്ടും ആദ്യമായി ക്യാമറക്ക് മുന്നിൽ സി.ഐ ജെയിംസിനോട് ഡയലോഗ് പറഞ്ഞപ്പോൾ ഞാൻ പരിഭ്രമിച്ചു. റീ ടേക്ക് വേണ്ടി വന്നപ്പോൾ ഒരു പരിശീലകനെപ്പോലെ പഠിപ്പിച്ചു തന്നു. ഞാൻ 'കഷ്ടപ്പെട്ട്' അഭിനയിച്ചപ്പോൾ അദ്ദേഹം പറഞ്ഞു: 'അത്രക്ക് വേണ്ട, ബിഹേവ് ചെയ്താൽ മതി. ശരിയാണ്. അദ്ദേഹം വളരെ മയത്തോടെ കാര്യം പറയുന്നു. വലിയ 'അഭിനയ കഷ്ടപ്പാട്'ഒന്നും കാണിക്കുന്നില്ല. ഞാൻ പോയി മോണിറ്ററിൽ നോക്കി. മുഖത്തെ പേശികളുടെ ചെറിയ ചലനങ്ങൾ പോലും 100 മടങ്ങ് പ്രഭാവത്തോടെ ക്യാമറയിൽ പതിഞ്ഞിരിക്കുന്നു. കണ്ണുകൾ സംസാരിക്കുന്നു! അന്നുമുതൽ അദ്ദേഹത്തിന്റെ അഭിനയം ഒരു അദ്ഭുതപ്രതിഭാസമായിട്ടാണ് ഇയുള്ളവൻ കാണുന്നത്. ഒരു തരം 'ട്രാൻസ്!' കഥാപാത്രങ്ങളെ വ്യത്യസ്തങ്ങളാക്കാനും ബോഡി ലാം​ഗ്വേജ് സാംശീകരിക്കുന്നതിലുമൊക്കെ അദ്ദേഹം നടത്തുന്ന ഒരു ​ഗവേഷണവും നിരീക്ഷണവും കൗതുകം ഉണർത്തും. അവാർഡുകൾക്ക് മഹിമ കൂട്ടാൻ മമ്മൂക്ക ഇനിയും തന്റെ കഴിവുകൾ തേച്ചുമിനുക്കിക്കൊണ്ടിരിക്കും. അന്നൊക്കെ അദ്ദേഹത്തിനൊപ്പം വഴിയരികിൽ ഉണ്ടാകും.മഹാനടന്, ഈ മഹാമനുഷ്യന് വീണ്ടും അഭിനന്ദനങ്ങൾ..