തമിഴും മലയാളവും അറിയാമോ?; മമ്മൂട്ടി കമ്പനിയുടെ പത്താമത്തെ ചിത്രത്തിൽ നായികയാകാം

മമ്മൂട്ടി കമ്പനിയുടെ ബാനറിൽ മെഗാസ്റ്റാർ മമ്മൂട്ടി നിർമ്മിക്കുന്ന പത്താം ചിത്രത്തിലേക്ക് നായികയെ തേടുന്നു. ചിത്രത്തിലേക്ക് നായികയെ തേടികൊണ്ടുള്ള കാസ്റ്റിങ് കോളും ഔദ്യോഗികമായി പുറത്തു വിട്ടു. തമിഴ് ഭാഷ നല്ല ഒഴുക്കോടെ സംസാരിക്കാൻ സാധിക്കുന്ന 30 - 35 വയസ്സ് പ്രായ പരിധിയിലുള്ളവരെയാണ് നായികാ വേഷം ചെയ്യാനായി അണിയറ പ്രവർത്തകർ തേടുന്നത്.

മലയാളവും തമിഴും ഒരേപോലെ ഒഴുക്കോടെ സംസാരിക്കാൻ കഴിയുന്നവർക്കാണ് മുൻഗണന. താല്പര്യമുള്ളവർ തങ്ങളുടെ ഫുൾ സൈസ് ഫോട്ടോഗ്രാഫ്, ബയോഡാറ്റ, ഒരു സെൽഫ് ഇൻട്രൊഡക്ഷൻ വീഡിയോ (തമിഴിൽ), ഒരു മിനിറ്റ് ദൈർഘ്യമുള്ള പെർഫോമൻസ് വീഡിയോ എന്നിവ casting@mammoottykampanyproduction10.com എന്ന ഇമെയിൽ വിലാസത്തിലേക്ക് ജൂലായ് 31 നു മുമ്പ് അയക്കാൻ ആണ് കാസ്റ്റിങ് കോളിൽ പറയുന്നത്.

നൻപകൽ നേരത്ത് മയക്കം, റോഷാക്ക്, കാതൽ - ദ് കോർ, കണ്ണൂർ സ്‌ക്വാഡ്, ടർബോ, ഡൊമിനിക് ആൻഡ് ദി ലേഡീസ് പേഴ്സ്, കളംകാവൽ, പദയാത്ര എന്നിവയാണ് മമ്മൂട്ടി കമ്പനിയുടെ ബാനറിൽ ഇതിനു മുമ്പ് നിർമ്മിച്ച ചിത്രങ്ങൾ. പ്രേക്ഷക- നിരൂപക പ്രശംസ നേടിയ ചിത്രങ്ങൾ നിർമ്മിച്ച് കൊണ്ട് വലിയ മലയാള സിനിമയിലെ മികച്ച ചിത്രങ്ങളുടെ അമരക്കാരായാണ് മമ്മൂട്ടി കമ്പനി അറിയപ്പെടുന്നത്.