'ചത്താ പച്ച' തിയേറ്ററുകളിലെത്തിക്കാൻ വമ്പന്മാർ; വേഫെറർ,ധർമ,മൈത്രി,പി.വി.ആർ..!

റീൽ വേൾഡ് എന്റർടൈൻമെന്റിന്റെ ബാനറിൽ ഒരുങ്ങുന്ന 'ചത്താ പച്ച: ദ് റിംഗ് ഓഫ് റൗഡീസ്' റിലീസിനുമുമ്പേ തന്ന മലയാളസിനിമാലോകത്ത് വമ്പൻ ചലനങ്ങൾ സൃഷ്ടിക്കുന്നു. ധർമ്മ പ്രൊഡക്ഷൻസ്, മൈത്രി മൂവി മേക്കേഴ്സ്, പി‌വി‌ആർ ഐനോക്സ്, വേഫെറർ ഫിലിംസ് തുടങ്ങിയ ഇന്ത്യയിലെ മുൻനിര ബാനറുകളും വിതരണ സ്ഥാപനങ്ങളും ഒരുമിച്ച് കൈകോർക്കുന്ന ഈ ചിത്രം മലയാളത്തിൽ നാഴികക്കല്ലായിമാറും. ദി പ്ലോട്ട് പിക്ചേഴ്സ് ആണ് ഈ ചിത്രത്തിന്റെ അന്താരാഷ്ട്ര റിലീസ് കൈകാര്യം ചെയ്യുന്നത്.

ചിത്രത്തിൻ്റെ ക്രിയേറ്റീവ് പ്രൊഡ്യൂസറും കൂടെയായ ഷിഹാൻ ഷൗക്കത്തിനോടൊപ്പം റിതേഷ്, രമേശ് എസ്. രാമകൃഷ്ണൻ എന്നിവർ ചേർന്ന് നിർമിക്കുന്ന ചിത്രം സംവിധാനം ചെയ്യുന്നത് പുതുമുഖ സംവിധായകനായ അദ്വൈത് നായർ ആണ്. റെസ്ലിങിന്റെ പശ്ചാത്തലത്തിൽ ഒരുങ്ങുന്ന 'ചത്താ പച്ച'യുടെ ടീസർ സോഷ്യൽ മീഡിയയിൽ വലിയ തരംഗം തന്നെയാണ് സൃഷ്ടിച്ചിരിക്കുന്നത്. പുറത്തിറങ്ങി മണിക്കൂറുകൾക്കുള്ളിൽ തന്നെ ലക്ഷക്കണക്കിന് പേരാണ് ടീസർ കണ്ടത്. മലയാളം, തമിഴ്, തെലുങ്ക്, ഹിന്ദി, കന്നഡ എന്നീ ഭാഷകളിൽ ഒരേസമയം പുറത്തിറങ്ങിയ ഈ ടീസർ, എല്ലാ ഭാഷകളിലുമുള്ള സിനിമാസ്വാദകരുടെ ശ്രദ്ധ നേടുകയും ചെയ്തു.

മലയാളത്തിലെ വമ്പൻ നിർമാണ കമ്പനികളിൽ ഒന്നായ ദുൽക്കർ സൽമാന്റെ വേഫെയറർ ഫിലിംസ് ആണ് കേരളത്തിൽ 'ചത്താ പച്ച'യുടെ റിലീസിന് നേതൃത്വം വഹിക്കുന്നത്. തമിഴ്നാട്ടിലെയും കർണാടകയിലെയും തിയേറ്ററുകളിൽ ചിത്രം എത്തിക്കുന്നത് ഇന്ത്യയിലെ തന്നെ ഏറ്റവും വലിയ മൾട്ടിപ്ലക്സ് ഡിസ്ട്രിബ്യൂട്ടർ ആയ പിവിആർ ഐനോക്സ് പിക്ചേഴ്സ് ആണ്. ആന്ധ്രയിലും തെലുങ്കാനയിലും പുഷ്പ എന്ന വമ്പൻ സിനിമയുടെ പിന്നിലെ മൈത്രി മൂവി മേക്കേഴ്‌സ് ആണ് ചിത്രം ഡിസ്ട്രിബ്യൂട്ട് ചെയ്യാൻ ഒരുങ്ങുന്നത്. ഇതോടൊപ്പം ഇന്ത്യൻ സിനിമയിലെ തന്നെ ഏറ്റവും വലിയ പ്രൊഡക്ഷൻഹൗസുകളിലൊന്നായ കരൺ ജോഹറിന്റെ ധർമ്മ പ്രൊഡക്ഷൻസ് ആണ് 'ചത്താ പച്ച'യെ ഉത്തരേന്ത്യയിലെ തിയേറ്ററുകളിൽ എത്തിക്കുന്നത്. മലയാള സിനിമയ്ക്കൊപ്പം ധർമ്മ പ്രൊഡക്‌ഷൻസിന്റെ ആദ്യ പങ്കാളിത്തം കൂടിയാണ് ഇത്. പ്ലോട്ട് പിക്ചേഴ്സ് ചിത്രം ആഗോള തലത്തിൽ നൂറിലധികം രാജ്യങ്ങളിൽ എത്തിക്കുന്നതോടെ 'ചത്താ പച്ച' യുടെ യാത്ര അതിർത്തികൾ കടന്നുള്ള പ്രേക്ഷകാസ്വാദനതിന് വഴിയൊരുക്കും.

മലയാള സിനിമയിലേക്ക് ഇതാദ്യമായി ശങ്കർ - എഹ്സാൻ - ലോയ് സം​ഗീതവിസ്മയങ്ങൾ രംഗപ്രവേശം ചെയ്യുന്നതും പ്രേക്ഷകർ ആവേശത്തോടെ കാത്തിരിക്കുന്ന മറ്റൊരു ഹൈലൈറ്റാണ്. ചിത്രത്തിൻ്റെ സംഗീത അവകാശം നേടിയിരിക്കുന്നതാകട്ടെ ഇന്ത്യയിലെ മ്യൂസിക്കൽ പവർഹൗസായ ടീ സീരീസ് ആണ്. അർജുൻ അശോകൻ, റോഷൻ മാത്യു, വിശാഖ് നായർ, ഇഷാൻ ഷൗക്കത്ത് എന്നിവരാണ് പ്രധാന വേഷങ്ങളിൽ എത്തുന്നത്. സനൂപ് തൈക്കൂടത്തിന്റേതാണ് തിരക്കഥ. ‌

ആനന്ദ് സി ചന്ദ്രന്റെ സിനിമാട്ടോഗ്രാഫി, ജോമോൻ ടി. ജോണിന്റെയും സുദീപ് ഇളമണിന്റെയും അഡിഷണൽ സിനിമാട്ടോഗ്രഫി എന്നിവയും ചിത്രത്തിന്റെ മികവു കൂട്ടുന്നു. പ്രവീൺ പ്രഭാകർ(എഡിറ്റിങ്), റോണെക്‌സ് സേവ്യർ(മേക്കപ്പ്) മെൽവി ജെ(കോസ്റ്റ്യൂം) കലൈ കിംഗ്‌സൺ(ആക്ഷൻ കൊറിയോഗ്രാഫി), വിനായക് ശശികുമാർ(ഗാനരചന), മുജീബ് മജീദ്(ബാക്ക്ഗ്രൗണ്ട് സ്കോർ), എന്നിങ്ങനെ മികച്ച ടെക്നിക്കൽ ടീം തന്നെയാണ് ചിത്രത്തിന് പിന്നിൽ. 2026 ജനുവരിയിൽ റിലീസിനായി തയ്യാറെടുക്കുന്ന ചിത്രം മലയാളം, ഹിന്ദി, തെലുങ്ക്, കന്നഡ, തമിഴ് ഭാഷകളിൽ തിയേറ്ററുകളിലെത്തും.