നീതിക്കായി പോരാടുന്ന പോലീസ് ഉദ്യോഗസ്ഥന്റെ കഥയുമായി ശിവരാജ്കുമാറിന്റെ ‘ബെയിൽ’

ശിവരാജ്കുമാറിനെ പ്രധാന കഥാപാത്രമാക്കി പവൻ വഡെയാർ സംവിധാനം ചെയ്യുന്ന ആക്ഷൻ ഡ്രാമ ‘ബെയിൽ’ ട്രെയിലറിലൂടെ ശ്രദ്ധ നേടുന്നു. രണ്ടര മിനിറ്റോളം ദൈർഘ്യമുള്ള ട്രെയിലർ, നീതിക്കായി പോരാടുന്ന പോലീസ് ഉദ്യോഗസ്ഥന്റെ പരിചിതവും എന്നാൽ ശക്തവുമായ കഥാപാത്രത്തിലൂടെയാണ് മുന്നേറുന്നത്.

വർഷങ്ങളായി കുറ്റവാളികളെയും നിയമത്തിന്റെ മറുവശത്തുള്ളവരെയും നേരിട്ട ഒരു പോലീസ് ഉദ്യോഗസ്ഥന്റെ കഥാപാത്രമാണ് ശിവരാജ്കുമാറിന്റേത്. ആവശ്യമുള്ളപ്പോൾ സംയമനം പാലിക്കുകയും അതിരുവിട്ടാൽ ശക്തമായി പ്രതികരിക്കുകയും ചെയ്യുന്ന ഉദ്യോഗസ്ഥനായാണ് താരത്തെ ട്രെയിലറിൽ അവതരിപ്പിക്കുന്നത്.

കുറ്റവും നീതിയും എല്ലായ്പ്പോഴും കൃത്യമായ അതിർവരമ്പുകളാൽ വേർതിരിക്കപ്പെടുന്നില്ലെന്ന സൂചനയും ട്രെയിലർ നൽകുന്നു. ശക്തരായ എതിരാളികളെ നേരിടാനും അപകടസാധ്യതകൾ അവഗണിച്ച് കേസിന്റെ പിന്നാലെ പോകാനും തയ്യാറാകുന്ന പോലീസ് ഉദ്യോഗസ്ഥനെയാണ് ശിവരാജ്കുമാർ അവതരിപ്പിക്കുന്നത്.

എന്നാൽ പോലീസ് സ്റ്റേഷനും ആക്ഷൻ രംഗങ്ങൾ അരങ്ങേറുന്ന തെരുവുകളും മാത്രമല്ല ചിത്രത്തിന്റെ ലോകം. യൂണിഫോം അഴിച്ചുവയ്ക്കുന്ന ഉദ്യോഗസ്ഥന്റെ വ്യക്തിജീവിതത്തിലേക്കും ട്രെയിലർ കടന്നുചെല്ലുന്നു. കുടുംബത്തിനും കഥയിൽ നിർണായക സ്ഥാനമുണ്ടെന്ന സൂചന നൽകുന്ന വീട്ടകങ്ങളിലെ രംഗങ്ങളും ശാന്തമായ സംഭാഷണങ്ങളും ട്രെയിലറിൽ കാണാം.

വ്യത്യസ്ത ഴോണറുകളിലൂടെ സഞ്ചരിച്ചിട്ടുള്ള പവൻ വഡെയാർ ഇത്തവണ വിശാലമായ ക്യാൻവാസിലാണ് ചിത്രം ഒരുക്കുന്നതെന്നാണ് ട്രെയിലർ നൽകുന്ന സൂചന. സായ് കുമാർ, ജയറാം, രമേഷ് ഇന്ദിര, യോ​ഗേഷ്, ദീക്ഷിത് ഷെട്ടി, സഞ്ജന ആനന്ദ് എന്നിവരും ശിവരാജ്കുമാറിനൊപ്പം പ്രധാന വേഷങ്ങളിലുണ്ട്.

ട്രെയിലറിൽ ഇവർക്കെല്ലാം ചെറിയ നിമിഷങ്ങൾ ലഭിക്കുന്നുണ്ടെങ്കിലും പല കഥാപാത്രങ്ങളും തമ്മിലുള്ള ബന്ധം എന്താണെന്ന് അണിയറപ്രവർത്തകർ പൂർണമായി വെളിപ്പെടുത്തിയിട്ടില്ല. അതുതന്നെയാണ് ട്രെയിലറിന്റെ ആകർഷണവും. നോട്ടങ്ങളിലൂടെയും ഏറ്റുമുട്ടലുകളിലൂടെയും സംഭാഷണങ്ങളിലൂടെയും ചില സംഘർഷങ്ങളുടെ സൂചനകൾ നൽകുന്നുണ്ട്. എന്നാൽ കഥയിലെ പ്രധാന സംഘർഷങ്ങൾ എന്താണെന്നതിനെക്കുറിച്ച് വ്യക്തമായ സൂചന നൽകാതെ കൗതുകം നിലനിർത്തുകയാണ് ട്രെയിലർ.

ആക്ഷൻ രംഗങ്ങൾക്ക് വേഗം പകരുന്നത് എഡിറ്റിങ്ങിനൊപ്പം ബി. അജനീഷ് ലോക്നാഥിന്റെ പശ്ചാത്തലസംഗീതവുമാണ്. പ്രത്യേകിച്ച് ആക്ഷൻ രംഗങ്ങളിൽ സംഗീതം ചിത്രത്തിന്റെ തീവ്രത വർധിപ്പിക്കുന്നു. കന്നഡ പ്രേക്ഷകർക്ക് ഏറെ പരിചിതമായ ശിവരാജ്കുമാറിന്റെ സ്ക്രീൻ ഇമേജിനോട് ചേർന്നാണ് സംഭാഷണങ്ങളും ഒരുക്കിയിരിക്കുന്നത്.

അധികാരവും ആക്ഷനും ധാർമിക നിലപാടുകളുമുള്ള കഥാപാത്രങ്ങളിലേക്ക് പലതവണ തിരിച്ചെത്തിയിട്ടുള്ള ശിവരാജ്കുമാറിന്റെ കരിയറിലെ മറ്റൊരു പോലീസ് കഥാപാത്രമാണ് ‘ബെയിലിലേത്’. എന്നാൽ ആ അധികാരത്തിന്റെ പിന്നിലെ മനുഷ്യനെക്കൂടി അവതരിപ്പിക്കാനാണ് ചിത്രം ശ്രമിക്കുന്നതെന്ന സൂചനയാണ് ട്രെയിലർ നൽകുന്നത്.

കെവിഎൻ പ്രൊഡക്ഷൻസിന്റെ ബാനറിൽ വെങ്കട്ട് കെ. നാരായണയാണ് ചിത്രം നിർമിക്കുന്നത്. സരിഗമ സൗത്ത് ആണ് ചിത്രത്തിന്റെ ഓഡിയോ അവകാശം സ്വന്തമാക്കിയിരിക്കുന്നത്. ഗാന്ധിജയന്തി ദിനമായ ഒക്ടോബർ 2ന് ‘ബെയിൽ’ ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.