കാതറീനും ഹീത്ത് ക്ലിഫും അവരുടെ നിമിഷങ്ങളുമായി വിശ്വമഹാപ്രണയകാവ്യത്തിന്റെ ട്രെയിലർ

എമിലി ബ്രോണ്ടിയുടെ ലോക ക്ലാസിക് നോവലായ 'വതറിങ് ഹൈറ്റ്‌സി'നെ ആധാരമാക്കി അതേപേരിലിറങ്ങുന്ന സിനിമയുടെ ട്രെയിലർ പുറത്തിറങ്ങി. മാര്‍ഗോട്ട് റോബിയും ജേക്കബ് എലോര്‍ഡിയും, കാതറിൻ ഏൺഷാ, ഹീത്ത് ക്ലിഫ് എന്നീ നായികാനായകന്മാരായി പകര്‍ന്നാടിയ പ്രണയകാവ്യം എമറാൾഡ് ഫെന്നല്‍ ആണ് സംവിധാനം ചെയ്യുന്നത്. ലോകമെമ്പാടുമുള്ളവര്‍ ആകാംഷയോടെ കാത്തിരിക്കുന്ന, നോവലിന്റെ ചലച്ചിത്രാവിഷ്‌കാരം അടുത്ത പ്രണയദിനത്തില്‍ (2026 ഫെബ്രുവരി 14ന്) തിയറ്ററുകളില്‍ റിലീസ് ചെയ്യും. വാര്‍ണര്‍ ബ്രദേഴ്‌സ് ആണ് ചിത്രത്തിന്റെ നിര്‍മാണം.

ആവേശത്തോടെയാണ് ട്രെയിലര്‍ ലോകമെമ്പാടുമുള്ള ആരാധകരും പ്രണയികളും ഏറ്റെടുത്തത്. ചാര്‍ളി എക്സ്സിഎക്സിന്റെ 'ചെയിന്‍സ് ഓഫ് ലവ്' എന്ന ആല്‍ബത്തിലെ ഗാനം ഉള്‍പ്പെടുത്തിയ ട്രെയിലറില്‍, കാതറിന്റെയും ഹീത്ത്ക്ലിഫിന്റെയും പ്രണയമുഹൂര്‍ത്തങ്ങളും അവരുടെ ജീവിതത്തില്‍ സംഭവിക്കുന്ന നാടകീയസംഭവങ്ങളുടെ സൂചനകളും ഉള്‍ക്കൊള്ളുന്നു. 'ഹീത്ത്ക്ലിഫ്, നീ ധനികനായിരുന്നെങ്കില്‍ എന്തു ചെയ്യുമായിരുന്നു?' ട്രെയിലറില്‍ കാതറിന്‍ ചോദിക്കുന്നു. 'എല്ലാ ധനികരും ചെയ്യുന്നതുപോലെ ഞാനും ചെയ്യും. ഒരു വലിയ വീട്ടില്‍ താമസിക്കുക, എന്റെ വേലക്കാരോട് ക്രൂരമായി പെരുമാറുക, കല്യാണം കഴിക്കുക...'എന്നായിരുന്നു ഹീത്ത്ക്ലിഫിന്റെ മറുപടി.

1847-ല്‍ ആണ് 'വതറിങ് ഹൈറ്റ്‌സ്' പ്രസിദ്ധീകരിക്കുന്നത്. ആദ്യം വായനക്കാര്‍ സ്വീകരിച്ചില്ലെങ്കിലും പിന്നീട് നോവല്‍ ജനപ്രിയമായി മാറുകയായിരുന്നു. എമിലി ബ്രോണ്ടി എഴുതിയ ഒരേയൊരു നോവലാണ് 'വതറിങ് ഹൈറ്റ്‌സ്'. അവരുടെ മാസ്റ്റര്‍പീസ് എന്നറിയപ്പെടുന്ന രചനയും ഇതു തന്നെയാണ്. രണ്ട് കുടുംബങ്ങളും അതിനിടയില്‍ വരുന്ന അപരിചിതനായ ഒരു വ്യക്തിയുമാണ് ഈ നോവലിന്റെ പ്രമേയത്തിനാധാരം.

2020-ല്‍ പുറത്തിറങ്ങിയ പ്രോമിസിങ് യങ് വുമണ്‍, 2023-ല്‍ പുറത്തിറങ്ങിയ സാള്‍ട്ട്‌ബേണ്‍ എന്നീ ചിത്രങ്ങളിലൂടെ പ്രശസ്തിയാര്‍ജിച്ച ചലച്ചിത്രകാരിയാണ് എമറാള്‍ഡ് ഫെന്നല്‍.