ടൈ​ഗർ ഷ്രോഫിനെ വെടിവച്ചവർ രൺബീർ കപുറിന്റെ വീടും നിരീക്ഷിച്ചു?

ടൈഗർ ഷ്രോഫിനുനേരെയുണ്ടായ വെടിവയ്പ്പിനെക്കുറിച്ചുള്ള സംഭവത്തിലെ അന്വേഷണത്തിനിടെ ബോളിവുഡ് താരം രൺബീർ കപുറിന്റെ പേരും ചർച്ചയാകുന്നു. കേസിലെ പ്രതികൾ മുംബൈയിലെ ബാന്ദ്രയിലുള്ള രൺബീർ കപുറിന്റെ വസതിയിൽ നിരീക്ഷണം നടത്തിയെന്നാണ് ദേശീയ മാധ്യമങ്ങളിലെ പുതിയ റിപ്പോർട്ടുകൾ. ഇത് താരത്തിന്റെ സുരക്ഷയെക്കുറിച്ചുള്ള ആശങ്കകൾക്ക് ഇടയാക്കിയിട്ടുണ്ട്.

ടൈഗർ ഷ്രോഫിനുനേരെ കഴിഞ്ഞ ദിവസം ജൂഹുവിലുണ്ടായ വെടിവയ്പിനെക്കുറിച്ച് മുംബൈ പൊലീസ് അന്വേഷണം തുടരുകയാണ്. കേസിലെ പ്രതികൾക്ക് ലോറൻസ് ബിഷ്‌ണോയ് സംഘവുമായി ബന്ധമുണ്ടോയെന്ന കാര്യവും അന്വേഷണസംഘം പരിശോധിക്കുന്നുണ്ട്. പ്രതികളുടെ നീക്കങ്ങൾ, ആയുധങ്ങൾ ലഭിച്ച വഴികൾ, സംഭവത്തിൽ മറ്റാർക്കെങ്കിലും പങ്കുണ്ടോയെന്ന കാര്യങ്ങൾ എന്നിവയും അന്വേഷിച്ചുവരികയാണ്. ഇതുവരെ നിരവധി പേരെ അറസ്റ്റ് ചെയ്തിട്ടുണ്ട്.

കഴിഞ്ഞ ഫെബ്രുവരിയിൽ ബോളിവുഡ് താരം രൺവീർ സിങ്ങിന് പണം ആവശ്യപ്പെട്ട് ലോറൻസ് ബിഷ്ണോയ് സംഘത്തിന്റെ സന്ദേശം ലഭിച്ചതായി റിപ്പോർട്ടുകൾ പുറത്തുവന്നിരുന്നു. പത്തു കോടി രൂപ ആവശ്യപ്പെട്ടാണ് രൺവീറിനു ഭീഷണിസന്ദേശം ലഭിച്ചത്. ര​ൺ​വീ​റി​ന്‍റെ മാ​നേ​ജ​രു​ടെ വാ​ട്‌​സാ​പ് നമ്പരിലേക്ക് അമേരിക്കൻ നമ്പറിൽനിന്നാണ് ഭീ​ഷ​ണി സ​ന്ദേ​ശം എ​ത്തി​യ​ത്.

അതേസമയം, രൺബീർ കപുർ തന്റെ പുതിയ ചിത്രമായ 'രാമായണ'യുടെ പ്രചാരണ പരിപാടികളുമായി തിരക്കിലാണ്. ഹൈദരാബാദ്, കൊൽക്കത്ത, ചെന്നൈ തുടങ്ങിയ നഗരങ്ങളിൽ നടന്ന പരിപാടികളിൽ താരം പങ്കെടുത്തിരുന്നു. വൻ പ്രതീക്ഷയോടെ ഒരുങ്ങുന്ന ചിത്രത്തിന്റെ പ്രചാരണം പുരോഗമിക്കുന്നതിനിടെയാണ് താരത്തിന്റെ വസതിയുമായി ബന്ധപ്പെട്ട പുതിയ റിപ്പോർട്ടുകൾ പുറത്തുവന്നത്.

വാർത്തകൾ പുറത്തുവന്നതോടെ രൺബീറിന്റെ സുരക്ഷയെക്കുറിച്ച് ആരാധകരും ആശങ്ക പ്രകടിപ്പിക്കുന്നുണ്ട്. താരത്തിന് കൂടുതൽ സുരക്ഷ ഉറപ്പാക്കണമെന്ന ആവശ്യവുമായി നിരവധി പേർ സമൂഹമാധ്യമങ്ങളിലൂടെ രം​ഗത്തുവന്നു.