'ഒപ്പ'ത്തിന് ഒപ്പമെത്താൻ സാധിക്കാതെ 'ഹൈവാൻ' ബോക്സ്ഓഫീസിൽ കിതയ്ക്കുന്നു

അക്ഷയ് കുമാറും സെയ്ഫ് അലി ഖാനും പ്രധാന വേഷങ്ങളിലെത്തിയ പുതിയ ചിത്രം 'ഹൈവാന്‍' തിയേറ്ററുകളില്‍ തിരിച്ചടി നേരിടുന്നു. വലിയ പ്രതീക്ഷകളോടെ തിയേറ്ററുകളിലെത്തിയ ചിത്രത്തിന് ആദ്യ രണ്ട് ദിവസങ്ങളില്‍ നിന്ന് വെറും 5.5 കോടി രൂപ മാത്രമാണ് ഇന്ത്യയില്‍ നിന്ന് നെറ്റ് കളക്ഷനായി നേടാന്‍ സാധിച്ചത്. പ്രിയദര്‍ശന്‍ സംവിധാനം ചെയ്ത ത്രില്ലര്‍ ചിത്രത്തിന് പ്രേക്ഷകരെ ആകര്‍ഷിക്കാന്‍ സാധിക്കാത്തതാണ് ബോക്‌സ് ഓഫീസിലെ നിരാശാജനകമായ പ്രകടനത്തിന് കാരണം.

2008-ല്‍ പുറത്തിറങ്ങിയ 'തഷാന്‍' എന്ന ചിത്രത്തിനുശേഷമാണ് അക്ഷയ് കുമാറും സെയ്ഫ് അലി ഖാനും വീണ്ടും ഒരുമിക്കുന്നത്. റിലീസ് ചെയ്ത ആദ്യ ദിനം മൂന്നു കോടി രൂപ മാത്രം നേടിയ ചിത്രം രണ്ടാം ദിനത്തില്‍ 2.5 കോടി രൂപയിലേക്ക് കൂപ്പുകുത്തുകയായിരുന്നു. കോവിഡ് കാലഘട്ടത്തിനുശേഷം പുറത്തിറങ്ങിയ അക്ഷയ് കുമാര്‍ ചിത്രങ്ങളില്‍ ഏറ്റവും കുറഞ്ഞ ഓപ്പണിങ് കളക്ഷന്‍ നേടുന്ന സിനിമകളിലൊന്നായി ഇതോടെ 'ഹൈവാന്‍' മാറി.

സൂപ്പര്‍ഹിറ്റ് മലയാള ചിത്രമായ 'ഒപ്പ'ത്തിന്റെ ഹിന്ദി റീമേക്കാണ് 'ഹൈവാന്‍'. മുമ്പ് അക്ഷയ് കുമാറും പ്രിയദര്‍ശനും ഒന്നിച്ച 'ഭൂത് ബംഗ്ല' ആദ്യദിനം 28.7 കോടി രൂപ നേടുകയും ആഗോളതലത്തില്‍ 271 കോടി രൂപയോളം കളക്ട് ചെയ്യുകയും ചെയ്തിരുന്നു. എന്നാല്‍ അതില്‍ നിന്ന് വ്യത്യസ്തമായി 'ഹൈവാന്‍' തിയേറ്ററുകളില്‍ വലിയ തണുപ്പന്‍ പ്രതികരണമാണ് സൃഷ്ടിക്കുന്നത്.

തിയേറ്ററുകളില്‍ തുടരുന്ന മറ്റ് വന്‍കിട ചിത്രങ്ങളില്‍ നിന്നുള്ള ശക്തമായ മത്സരവും 'ഹൈവാനെ' ദോഷകരമായി ബാധിച്ചിട്ടുണ്ട്. വരും ദിവസങ്ങളിലും ബോക്‌സ് ഓഫീസില്‍ വലിയ മുന്നേറ്റമുണ്ടാക്കാന്‍ ചിത്രത്തിന് സാധിച്ചേക്കില്ലെന്നാണ് സിനിമാ ട്രാക്കര്‍മാരുടെയും ബോക്‌സ് ഓഫീസ് വിശകലന വിദഗ്ധരുടെയും പ്രവചനം.