ടോളിവുഡ് സൂപ്പര്‍താരം രാംചരണ്‍ നായകനാകുന്ന പുതിയ ചിത്രത്തിന്റെ ഔദ്യോഗിക പൂജാ ചടങ്ങുകള്‍ ഹൈദരാബാദില്‍ നടന്നു. 'ആര്‍സി 17' എന്ന് താത്കാലികമായി പേരിട്ടിരിക്കുന്ന ബിഗ് ബജറ്റ് ചിത്രത്തിന്റെ പൂജാ ചടങ്ങ് ഏറെ പ്രത്യേകതകള്‍ നിറഞ്ഞതായിരുന്നു. മെഗാസ്റ്റാര്‍ ചിരഞ്ജീവി ചടങ്ങില്‍ മുഖ്യാതിഥിയായി എത്തിയാണ് സിനിമയ്ക്ക് തുടക്കമിട്ടത്.
ചിത്രത്തിന്റെ പൂജാ ചടങ്ങുകളുടെ ഭാഗമായി ചിരഞ്ജീവി ഭദ്രദീപം തെളിയിക്കുകയും ആദ്യ ക്ലാപ്പടിച്ച് ആശംസകള്‍ നേരുകയും ചെയ്തു. തെലുങ്ക് സിനിമാലോകത്തെ പ്രമുഖ സംവിധായകരും നിര്‍മാതാക്കളും ഉള്‍പ്പെടെ നിരവധി പേര്‍ ചടങ്ങില്‍ സന്നിഹിതരായിരുന്നു.
ചിത്രത്തിന്റെ മറ്റൊരു പ്രധാന പ്രത്യേകത, പ്രശസ്ത സംഗീത സംവിധായകന്‍ അനിരുദ്ധ് രവിചന്ദര്‍ സംഗീതമൊരുക്കുന്നു എന്നതാണ്. ദേവി ശ്രീ പ്രസാദിനു പകരമായി അനിരുദ്ധ് ചേരുന്നത് ആരാധകര്‍ക്കിടയില്‍ വലിയ ആവേശമാണ് സൃഷ്ടിച്ചിരിക്കുന്നത്.
'രംഗസ്ഥലം' എന്ന ഹിറ്റ് ചിത്രത്തിനുശേഷം രാംചരണും സംവിധായകന്‍ സുകുമാറും വീണ്ടും ഒന്നിക്കുന്ന ചിത്രം കൂടിയാണിത്. 'യു ക്യാന്‍ ഇമാജിന്‍' എന്ന ടാഗ് ലൈനോടെയെത്തുന്ന ചിത്രം ബിഗ് ബജറ്റിലാണ് ഒരുങ്ങുന്നത്.
മൈത്രി മൂവി മേക്കേഴ്‌സ്, സുകുമാര്‍ റൈറ്റിങ്സ്, ടി-സീരീസ് ഫിലിംസ് എന്നിവര്‍ ചേര്‍ന്ന് നിര്‍മിക്കുന്ന ചിത്രത്തിന്റെ ആദ്യഘട്ട ഷൂട്ടിങ് ഹൈദരാബാദിലെ റാമോജി ഫിലിം സിറ്റിയില്‍ ഉടന്‍ ആരംഭിക്കും. ചിത്രത്തിലെ മറ്റു താരങ്ങളുടെയും സാങ്കേതിക പ്രവര്‍ത്തകരുടെയും വിവരങ്ങള്‍ വരും ദിവസങ്ങളില്‍ പുറത്തുവിടും.