ദളപതി വിജയ്യുമായുള്ള സൗഹൃദവുമായി ബന്ധപ്പെട്ട് സോഷ്യൽ മീഡിയയിൽ സൈബർ ആക്രമണങ്ങൾ കൊടുമ്പിരിക്കൊള്ളുമ്പോഴും കുലുക്കമില്ലാതെ തൃഷ. ചെന്നൈയിൽ ഒരു വിവാഹ വിരുന്നിൽ വിജയ്ക്കൊപ്പം തൃഷ എത്തിയതോടെയാണ് കോളിവുഡിൽ ഗോസിപ്പുകളുടെ പൂരത്തിനു തുടക്കമായത്. വിജയ്യുടെ കുടുംബജീവിതത്തിലെ അസ്വാരസ്യങ്ങൾക്കു തൃഷയാണ് കാരണമെന്ന തരത്തിലുള്ള ക്രൂരമായ സോഷ്യൽ മീഡിയ പ്രചാരണങ്ങൾക്കെതിരെ മാസ് മറുപടിയുമായി തൃഷ എത്തിയിരിക്കുകയാണ്.
ആന പറക്കുമെന്ന് നിങ്ങൾ പറഞ്ഞാലും ഞാൻ സമ്മതിക്കുമെന്നാണ് ഇൻസ്റ്റഗ്രാമിലൂടെ നിഗൂഢമായ വീഡിയോ പങ്കുവച്ച് തൃഷയുടെ മാസ് മറുപടി: 'എന്റെ സമാധാനമാണ് എനിക്ക് വലുത്. ആന പറക്കുമെന്ന് നിങ്ങൾ പറഞ്ഞാൽ അത് ശരിയാണെന്ന് പറഞ്ഞ്, ചിരിച്ചു കൊണ്ടു നടന്നു നീങ്ങാൻ ഞാൻ പഠിച്ചിരിക്കുന്നു. സമയം കളയാൻ എനിക്കു താത്പര്യമില്ല.' എന്ന വാക്കുകൾ വിമർശകരുടെ വായടപ്പിക്കാൻ ലക്ഷ്യമിട്ടുള്ളതാണ്. സമാധാനമാണ് എല്ലാ ശരികളേക്കാളും വലുതെന്നും താരം അടിവരയിട്ടു പറഞ്ഞു.
വിവാദങ്ങൾ ഒരു വശത്ത് പുകയുമ്പോഴും, 'പ്രണയമില്ലാതെ ജീവിതത്തിന് അർഥമില്ല' എന്ന മറ്റൊരു പോസ്റ്റും താരം പങ്കുവച്ചു. ഇത് ആരാധകരെ വീണ്ടും കുഴപ്പിച്ചു. ആ പോസ്റ്റിനു താഴെ 'സത്യം' എന്നു താരം കുറിച്ചത് ആർക്ക് വേണ്ടിയാണെന്ന ചർച്ചയിലാണ് ഇപ്പോൾ ആരാധകർ.
നീണ്ട 15 വർഷത്തെ ഇടവേളയ്ക്ക് ശേഷം ലോകേഷ് കനകരാജിന്റെ 'ലിയോ'യിലൂടെയാണ് വിജയും തൃഷയും സ്ക്രീനിൽ വീണ്ടും ഒന്നിച്ചത്. ഗില്ലിയും തിരുപ്പാച്ചിയും കണ്ടു വളർന്ന ആരാധകർ ഈ കോമ്പോയെ ഏറ്റെടുത്തെങ്കിലും, ജീവിതത്തിലെ ഇവരുടെ സൗഹൃദത്തെ ചുറ്റിയുള്ള വിവാദങ്ങൾ ഒടുങ്ങുന്നില്ല. വിവാദങ്ങളോട് വിജയ് ഇതുവരെ പ്രതികരിച്ചിട്ടില്ലെങ്കിലും, തൃഷയുടെ ഓരോ ചലനവും ഇപ്പോൾ സോഷ്യൽ മീഡിയയുടെ നിരീക്ഷണത്തിലാണ്.