വടിവേലുവിനെ നായകനാക്കി ശക്തമായ കോടതിചിത്രവുമായി എത്തുകയാണ് സംവിധായകൻ എ.ബി.ബിനിൽ. ശ്രീനാഥ് ഭാസി നായകനായി എത്തി പ്രേക്ഷക ശ്രദ്ധ നേടിയ 'പൊങ്കാല എന്ന ചിത്രത്തിന്റെ സംവിധായകനാണ് ബിനിൽ. ആദ്യ മലയാള ചിത്രത്തിന് ശേഷം തമിഴിലേക്ക് ചുവടുവയ്പ്.
സാധാരണ മാസ് എന്റർടെയ്നറുകളിൽ നിന്ന് വ്യത്യസ്തമായി ' പോർമുഴക്കം ' ഒരു ഗൗരവമേറിയ നിയമ ത്രില്ലറാണ്. ചിത്രത്തിൽ വടിവേലു സത്യസന്ധനും ധൈര്യശാലിയുമായ പബ്ലിക് പ്രോസിക്യൂട്ടറായി അഭിനയിക്കുന്നു.
വടിവേലുവിനെ കൂടാതെ സമുദ്രക്കനിയും ചിത്രത്തിൽ പ്രധാന വേഷത്തിലെത്തുന്നു. ശക്തമായ രാഷ്ട്രീയ പശ്ചാത്തലമുള്ള ഒരു കൊലക്കേസിൽ, സിസ്റ്റത്തിന്റെയും അധികാരത്തിന്റെയും സമ്മർദ്ദങ്ങൾക്കിടയിൽ നീതി നിലനിർത്താൻ പോരാടുന്ന ഒരു അഭിഭാഷകന്റെ കഥയാണ് ചിത്രം പറയുന്നത്.
മണിലാൻഡ് ഗോൾഡ് പ്രൊഡക്ഷന്റെ ബാനറിൽ സി.ജി ലാലുവാണ് ഈ ബിഗ് ബജറ്റ് ചിത്രം നിർമിക്കുന്നത്. മറ്റ് അഭിനേതാക്കളെയും സാങ്കേതിക പ്രവർത്തകരെയും പ്രഖ്യാപിച്ചശേഷം ഷൂട്ടിങ് ആരംഭിക്കും.