സൂപ്പർസ്റ്റാർ രജനികാന്തിന്റെ ‘ജയിലർ 2’ തമിഴ് സിനിമാലോകം ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ്. എന്നാൽ ചിത്രത്തിന് ലഭിച്ചുകൊണ്ടിരിക്കുന്ന വൻ പ്രീ-റിലീസ് ബിസിനസിനൊത്ത തരംഗം നിലവിലെ പ്രമോഷനുകളിൽ സൃഷ്ടിക്കാനായിട്ടില്ലെന്നാണ് ട്രേഡ് വൃത്തങ്ങളുടെ വിലയിരുത്തൽ. നെൽസൺ ദിലീപ്കുമാർ സംവിധാനം ചെയ്ത ആദ്യ ചിത്രം ‘ജയിലർ’ വൻ വിജയമായി മാറുകയും ആഗോളതലത്തിൽ ഏകദേശം 600–650 കോടി രൂപ ഗ്രോസ് കളക്ഷൻ നേടുകയും ചെയ്തിരുന്നു.
അനിരുദ്ധ് രവിചന്ദർ സംഗീതം ഒരുക്കുന്ന ‘ജയിലർ 2’ന് ഏകദേശം 600 കോടി രൂപയുടെ പ്രീ-റിലീസ് ബിസിനസാണ് നടക്കുന്നതെന്നാണ് റിപ്പോർട്ടുകൾ. ചിത്രത്തിന്റെ ആഗോള പ്രീ-ബിസിനസ് ലക്ഷ്യം ഏകദേശം 620–650 കോടി രൂപ ഗ്രോസാണെന്നും ട്രേഡ് വൃത്തങ്ങൾ പറയുന്നു. ഇതോടെ ചിത്രത്തിന് മുന്നിലുള്ള ബോക്സ് ഓഫീസ് പ്രതീക്ഷയും വളരെ ഉയർന്നതാണ്.
തമിഴ് സിനിമ ഇതുവരെ കൈവരിച്ചിട്ടില്ലാത്തതും ഏറെ ചർച്ച ചെയ്യപ്പെട്ടതുമായ 1000 കോടി രൂപയുടെ ആഗോള കളക്ഷൻ എന്ന നാഴികക്കല്ലിലേക്ക് ‘ജയിലർ 2’ എത്തുമോ എന്നതാണ് ഇപ്പോഴത്തെ പ്രധാന ചോദ്യം. എന്നാൽ ആദ്യ ചിത്രത്തിനുണ്ടായിരുന്ന തരത്തിലുള്ള ആവേശം ഇതുവരെ രണ്ടാം ഭാഗത്തിന്റെ പ്രൊമോഷനിൽ പ്രകടമായിട്ടില്ലെന്നാണ് വിലയിരുത്തൽ.
ചിത്രത്തിലെ രണ്ട് സിംഗിളുകൾ ഇതിനകം പുറത്തിറങ്ങിയിട്ടുണ്ട്. എന്നാൽ ഏറ്റവും ഒടുവിൽ പുറത്തിറങ്ങിയ 'വൺ സൺ വൺ മൂൺ' എന്ന ഗാനത്തിന് സംഗീതാസ്വാദകരിൽ നിന്ന് സമ്മിശ്ര പ്രതികരണമാണ് ലഭിക്കുന്നത്. ‘ജയിലർ’ ഒന്നാംഭാഗത്തിലെ ഹിറ്റ് ഗാനങ്ങൾ സൃഷ്ടിച്ച തരംഗവുമായി താരതമ്യം ചെയ്യുമ്പോൾ പുതിയ ഗാനത്തിന് അതേ സ്വീകാര്യത ലഭിച്ചിട്ടില്ലെന്നും റിപ്പോർട്ടുകളുണ്ട്.
ഒക്ടോബർ 15നാണ് ‘ജയിലർ 2’ തിയേറ്ററുകളിലെത്തുന്നത്. റിലീസിന് മുന്നോടിയായി പ്രൊമോഷൻ കൂടുതൽ ശക്തമാക്കാൻ അണിയറപ്രവർത്തകർക്ക് ഇനിയും സമയമുണ്ട്. രജനികാന്തിന്റെ സാന്നിധ്യം ചിത്രത്തിന്റെ ഏറ്റവും വലിയ ആകർഷണങ്ങളിലൊന്നാണ്. അതേസമയം, റിലീസിന് മുമ്പ് കൂടുതൽ ശ്രദ്ധേയമായ പ്രൊമോഷണൽ കണ്ടന്റുകളിലൂടെ ചിത്രത്തിന്റെ ഹൈപ്പ് ഉയർത്തേണ്ടതുണ്ടെന്നാണ് ട്രേഡ് വൃത്തങ്ങളുടെ വിലയിരുത്തൽ.