ലൈലാക് നിറമുള്ള ബ്യൂട്ടിപാർലറും 'ഇലവങ്കോട് ദേശം' ഓർമകളും

ഡാഡി 'മഹാന​ഗരം' എടുത്ത് ഒരുവർഷം കഴിഞ്ഞപ്പോൾ ഞങ്ങളുടെ ജീവിതം അക്ഷരാർഥത്തിൽ 'സൗന്ദര്യം' നിറഞ്ഞതായി എന്നുപറയാം. മമ്മി തിരുവനന്തപുരത്ത് ഒരു ബ്യൂട്ടിപാർലർ തുടങ്ങി. ശരിക്കുപറഞ്ഞാൽ മമ്മി വെറുതെ ഇരുന്ന് മടുത്തപ്പോൾ തുടങ്ങിയതാണ്. മമ്മി ഒരു പാട്ടുകാരിയായിരുന്നല്ലോ. പാട്ടുകാരിയെന്ന നിലയിലുള്ള കരിയറാണ് മമ്മി ആ​ഗ്രഹിച്ചതും. പക്ഷേ അത് സംഭവിച്ചില്ല. വിവാഹശേഷം ഡാഡിയുടെ സിനിമകളിൽ പാടിയെന്നല്ലാതെ പൂർണമായും പാട്ടിൽ മുഴുകാൻ മമ്മി ശ്രമിച്ചില്ല. കുടുംബം എന്നാൽ കൂടുമ്പോൾ ഇമ്പം ഉള്ളതെന്ന് പലപ്പോഴും കേട്ടിട്ടുള്ള വാചകമാണ്. കുടുംബത്തിന്റെ ഇമ്പമായിരിക്കണം മമ്മി കൂടുതൽ ആ​ഗ്രഹിച്ചത്. ‍ഞങ്ങളെ വളർത്തുന്നതിനും ഡാഡിയെന്ന കലാകാരന് പിന്തുണയാകുന്നതിനും വേണ്ടി മമ്മി സ്വന്തം കലാജീവിതം ഉപേക്ഷിക്കുകയായിരുന്നു. അതൊരു വലിയ ത്യാ​ഗവുമായിരുന്നു. പക്ഷേ ഡാഡി ഒരിക്കലും മമ്മി പാടാൻ പോകുന്നതിന് എതിരുപറഞ്ഞില്ല. എങ്കിലും മമ്മിക്കിഷ്ടം നേരത്തെപറഞ്ഞതുപോലെ വീടെന്ന മനോഹരമായ​ഗാനമായിരുന്നു. അതിനെ ചിട്ടപ്പെടുത്തുന്നതിലും കൂടുതൽ മനോഹരമാക്കുന്നതിലും സന്തോഷം കണ്ടെത്തുകയായിരുന്നു മമ്മി.

പക്ഷേ ഞങ്ങൾ മുതിർന്നപ്പോൾ സ്വഭാവികമായും മമ്മിക്ക് വീട്ടിൽ പ്രത്യേകിച്ച് ഒന്നും ചെയ്യാനില്ലാതെയായി. 'മഹാന​ഗരം' സമയത്തൊക്കെ ഞാനും സഹോദരനും അത്യാവശ്യം പക്വതയുള്ളവരും തനിച്ച് എന്തുകാര്യവും നോക്കാൻ പ്രാപ്തിയുള്ളവരുമായിക്കഴിഞ്ഞിരുന്നു. അപ്പോൾ ഡാഡിയാണ് മമ്മിയോട് പറഞ്ഞത്, 'എന്തെങ്കിലും സ്വന്തമായി തുടങ്ങാൻ'. സ്വയം ഒരുങ്ങാനും മറ്റുള്ളവരെ ഒരുക്കാനും ഒരുപാട് ഇഷ്ടമുള്ളയാളാണ് മമ്മി. നീണ്ടമുടിയുള്ള മമ്മി അതിൽ പല ഭം​ഗിയുള്ള പരീക്ഷണങ്ങളും നടത്തുമായിരുന്നു. 'മഹാന​ഗര'ത്തിന്റെ ഡബ്ബിങ് സമയത്ത് ഡാഡിക്കൊപ്പം മമ്മിയും ചെന്നൈയിലേക്ക് പോകും. അവിടെവെച്ചാണ് ഡാഡി മമ്മിയോട് പറഞ്ഞത് 'മക്കളൊക്കെ വലുതായി...ഇനി എന്തിലെങ്കിലുമൊക്കെ ആക്ടീവാകൂ...എന്തിലാണ് താത്പര്യം എന്നുപറഞ്ഞോളൂ...' എന്ന്. അപ്പോൾ മമ്മി പറഞ്ഞു: 'എനിക്കൊരു ബ്യൂട്ടിപാർലർ ഇട്ടുതന്നാൽ മതി...'

ഒരുങ്ങുന്നതിലും ഒരുക്കുന്നതിലുമുള്ള മമ്മിയുടെ താത്പര്യം ഡാഡിയും തിരിച്ചറിഞ്ഞിരുന്നു. മമ്മിക്കുള്ളിൽ ഒരു സ്റ്റൈലിസ്റ്റ് ഉണ്ടെന്ന് സിനിമകളുടെ സൗന്ദര്യശാസ്ത്രം മുഴുവൻ അറിയാമായിരുന്ന ഡാഡി പണ്ടേ കണ്ടെത്തി. അതുകൊണ്ട് ബ്യൂട്ടിപാർലർ എന്ന ആശയത്തോട് ഡാഡിക്കും യോജിപ്പായിരുന്നു. മമ്മിക്ക് അത് നന്നായി കൊണ്ടുപോകാനാകുമെന്ന് മനസ്സിലാക്കിയ ഡാഡി പിന്നെ എല്ലാകാര്യത്തിനും മമ്മിക്കൊപ്പം നിന്നു. 'മഹാന​ഗര'ത്തിന്റെ ഡബ്ബിങ് സമയത്തുതന്നെ മമ്മി ചെന്നൈയിലുള്ള പ്രശസ്തയായ ഒരു ബ്യൂട്ടീഷന് കീഴിൽ ക്രാഷ്കോഴ്സ് ചെയ്തു. തിരിച്ച് തിരുവനന്തപുരത്തുവന്ന് ഡാഡിയും മമ്മിയും ചേർന്ന് മരുതംകുഴിയിൽ 'സ്പ്ലെൻഡർ' എന്ന പേരിൽ ബ്യൂട്ടിപാർലർ തുടങ്ങി.

മമ്മൂട്ടിയങ്കിളിന്റെ സാന്നിധ്യത്തിൽ ഭാര്യ സുലുവാന്റിയായിരുന്നു ഉദ്ഘാടനം. അതിനുള്ള ക്ഷണക്കത്ത് ഡാഡി തന്നെ കടലാസിൽ പ്രത്യേകമായി ഡിസൈൻ ചെയ്തെടുത്തു. ഓണത്തിനും ക്രിസ്മസിനും ന്യൂ ഇയറിനുമൊക്കെ സ്വന്തമായി ഡിസൈൻ ചെയ്തെടുത്ത ​ഗ്രീറ്റിങ് കാർഡുകളായിരുന്നു ഡാഡി സുഹൃത്തുക്കൾക്ക് അയച്ചിരുന്നത്. അതുപോലെ മമ്മിയുടെ ബ്യൂട്ടിപാർലറിന്റെ ഉദ്ഘാടനത്തിന്റെ കത്തും ഡാഡിയുടെ ആശയത്തിലുള്ളതായിരുന്നു. ലൈലാക് ആയിരുന്നു 'സ്പ്ലെൻഡറി'ന്റെ തീം കളറായി ഡാഡി തിരഞ്ഞെടുത്തത്. പേരെഴുതിയ ബോർഡും അകത്തെ ഭിത്തികളും കസേരകളുമെല്ലാം ലൈലാക് നിറത്തിലുള്ളതായിരുന്നു. ഉദ്ഘാടനത്തിനുള്ള ക്ഷണക്കത്തും അതേനിറത്തിൽ തന്നെ. അങ്ങനെ മമ്മിക്കായി ലൈലാക് പുഷ്പങ്ങൾ വിരിഞ്ഞുനില്കുന്ന ഉദ്യാനം പോലെയാണ് സ്പ്ലെൻഡറിനെ ഡാഡി അണിയിച്ചൊരുക്കിയത്. 'ലൈലാകമേ...പൂ ചൂടുമോ..' എന്ന പാട്ടുകേൾക്കുമ്പോഴൊക്കെ ഞാൻ മമ്മിയുടെ ബ്യൂട്ടിപാർലറിന്റെ ഉൾവശത്തെക്കുറിച്ച് ഓർക്കും.

മമ്മൂട്ടിയങ്കിളും സുലുവാന്റിയും ഉദ്ഘാടനത്തിനുവന്നു. പിന്നെ മുരളിയങ്കിൾ, ​ഗണേഷ് കുമാറങ്കിൾ..അങ്ങനെ കുറിച്ച് സിനിമാക്കാരും രാഷ്ട്രീയനേതാക്കളും മമ്മിയുടെയും ഡാഡിയുടെയും സുഹൃത്തുക്കളും. ബ്യൂട്ടിപാർലർ തുടങ്ങിയതോടെ ഡാഡി വരുത്തിയിരുന്ന ഫെമിന പോലുള്ള പ്രസിദ്ധീകരണങ്ങൾ മമ്മിക്കും പ്രയോജനപ്പെട്ടു. ഞാനും സഹോദരനും കൂടുതൽ മോഡേണായി വസ്ത്രംധരിച്ചും അണിഞ്ഞൊരുങ്ങിയും നടക്കാൻ തുടങ്ങി. എന്റെ സഹോദരന്റേത് ചുരുണ്ടമുടിയായിരുന്നു. അവൻ അന്ന് അത് ബ്ലീച്ച് ചെയ്തു. ഇതിനൊക്കെ ഡാഡി ഒരെതിർപ്പും പറഞ്ഞില്ല. അന്ന് 'കാമ്പസ്' ആയിരുന്നു തിരുവനന്തപുരത്തെ പ്രശസ്തമായ ഡ്രസ് ഷോപ്പ്. കുറച്ച് എക്സ്പെൻസീവ് ആണ് അവിടെ. ഞാൻ സ്കൂളിൽ പോകുന്ന വഴിയാണ് ആ കട. വൈകീട്ട് സ്കൂൾ വിട്ടുവരുമ്പോൾ മാനൻക്വിനുകളിൽ ഇട്ടുവെച്ചിരിക്കുന്ന ഏതെങ്കിലും ഡ്രസ് നോക്കിവയ്ക്കും. എന്നിട്ട് വീട്ടിൽ വന്ന് കടയിലേക്ക് വിളിച്ചുപറയും, 'അതെടുത്തുവയ്ക്കണം,കുറച്ചുകഴിയുമ്പോൾ വരും' എന്ന്. ഞങ്ങൾ അന്നുതന്നെ അതുപോയി വാങ്ങിക്കും. ഇതിനൊക്കെയും ഡാഡിയും കൂടെ നിന്നു. വേണം എന്നു പറഞ്ഞതെല്ലാം ഡാഡി എനിക്ക് വാങ്ങിത്തന്നു.

ഡാഡിയുടെ സിനിമാസൗഹൃദങ്ങൾ മമ്മിയുടെ ബ്യൂട്ടിപാർലറിന് കൂടുതൽ പ്രശസ്തിനേടിക്കൊടുത്തു. സിനിമാക്കാരുടെ ഭാര്യമാർ,ഏഷ്യനെറ്റിൽ നിന്നുള്ളവർ ഒക്കെ സ്ഥിരം ബ്യൂട്ടിപാർലറിൽ വരും. അതുപോലെ തിരുവനന്തപുരത്തെ പ്രശസ്തമായ കല്യാണങ്ങൾക്കും മമ്മിയായിരുന്നു ബ്രൈഡൽ മേക്കപ്പ് അപ്പ്. ചെന്നൈയിൽ പോയിട്ട് വരുമ്പോൾ മമ്മിയുടെ ബ്യൂട്ടിപാർലറിനാവശ്യമായ സാധനങ്ങൾ വാങ്ങിക്കൊണ്ടുവരാൻ ഡാഡി എപ്പോഴും ശ്രദ്ധിച്ചു. അതുപോലെ തിരുവനന്തപുരത്തുനിന്നും എറണാകുളത്ത് ബ്രോഡ് വേയിൽ നിന്നും ഡാഡി തന്നെ മേക്കപ്പ് സാധനങ്ങൾ വാങ്ങിക്കൊടുക്കും. ദുബായിയിലൊക്കെയുള്ള സുഹൃത്തുക്കൾ നാട്ടിലേക്ക് വരുമ്പോൾ ഡാഡി, എന്താണ് മമ്മിക്ക് ആവശ്യമുള്ളത് എന്നു ചോദിച്ചറിഞ്ഞ് അവരോട് പറഞ്ഞ് അവിടെനിന്ന് വരുത്തിക്കും. കെ.ജി.ജോർജ് എന്ന സംവിധായകന്റെ കാർക്കശ്യമൊന്നും ഭർത്താവ് എന്ന നിലയിൽ ഡാഡി ഒരിക്കലും കാണിച്ചില്ല. മമ്മിയുടെ ബ്യൂട്ടിപാർലറിന്റെ ഏറ്റവും വലിയ സപ്പോർട്ട് ഡാഡി തന്നെയായിരുന്നു. മമ്മിക്ക് താത്പര്യമുള്ളതെന്താണോ അതിന് ഡാഡിയും കൂടെയുണ്ടായിരുന്നു.

അതുപോലെ തന്നെ ക്ഷണം കിട്ടുന്ന എല്ലാ ചടങ്ങുകൾക്കും അവർ ഒരുമിച്ച് പോകും. നടന്മാരായ ​ഗണേഷ്കുമാറിന്റെയും അശോകന്റെയും ബൈജുവിന്റെയും കല്യാണത്തിന് ഡാഡിയും മമ്മിയും ഇങ്ങനെ ഒരുമിച്ച് പങ്കെടുത്തത് ഓർക്കുന്നു. ഫിലിം ഫെയർ അവാർഡ് പോലെ, ഏതൊക്ക അവാർഡ് നൈറ്റിലേക്ക് ക്ഷണിച്ചാലും ഡാഡി മമ്മിയുമൊത്താണ് പോകുക. രണ്ടുപേർക്കും കൂടിയാണ് മിക്കവാറും സംഘാടകർ ടിക്കറ്റ് അയയ്ക്കുക. ചെന്നൈയിലേക്കും ബോംബെയിലേക്കുമൊക്കെ ഇങ്ങനെ അവർ സ്ഥിരമായി യാത്രചെയ്തു.

കുട്ടിക്കാലം തൊട്ടേ സിനിമാക്കാരെ കണ്ടുശീലിച്ചതിനാൽ എനിക്കും സഹോദരനും ഇത്തരം പരിപാടികളുടെ ​ഗ്ലിറ്റ്സ് ആന്റ് ​ഗ്ലാം ഒന്നും വലിയ കാര്യമായി അനുഭവപ്പെട്ടിരുന്നില്ല. മുറ്റത്തെ മുല്ലയ്ക്ക് മണമില്ല എന്ന് പറയുന്നതുപോലെ ഒന്നിലും ഒരു വൗ ഫാക്ടർ ഉള്ളതായിട്ട് തോന്നിയില്ല. അതുകൊണ്ട് ഞങ്ങൾ ഡാഡിക്കും മമ്മിക്കുമൊപ്പം അവാർഡ് നൈറ്റുകൾക്കും കല്യാണങ്ങൾക്കുമൊന്നും പോകാൻ താത്പര്യം കാണിക്കാതെ മാറിനിന്നു. അതുകൊണ്ട് സിനിമാഫീൽഡിലുള്ളവർക്ക് പലർക്കും ഞങ്ങളെ അറിയില്ലായിരുന്നു. കെ.ജി.ജോർജിന് രണ്ടുമക്കളുണ്ട് എന്നറിയാം എന്നല്ലാതെ അവർ ആരാണ്,എന്താണ് ചെയ്യുന്നത്, എന്നൊന്നും ആർക്കും അറിഞ്ഞുകൂടാ. ഞങ്ങളുടെ രൂപം പോലും ആരും കണ്ടിട്ടില്ല. പക്ഷേ കുറക്കേഴിഞ്ഞപ്പോൾ ഡാഡി തന്നെ പറഞ്ഞു,'നിങ്ങൾ ഇങ്ങനെ ഒഴിഞ്ഞുമാറിയിരിക്കരുത്,പലരും ചോദിക്കുന്നുണ്ട് നിങ്ങളെക്കുറിച്ച്' എന്ന്. അങ്ങനെ ഒരു ഇരുപത് വയസ്സ് ഒക്കെയായപ്പോഴാണ് ഞങ്ങൾ ഡാഡിക്കും മമ്മിക്കുമൊപ്പം ഫങ്ഷനുകൾക്ക് പോയിത്തുടങ്ങിയത്.

മമ്മിയുടെ ബ്യൂട്ടിപാർലറിന്റെ ബലത്തിൽ കൂടുതൽ മോഡേണായി നടന്ന എനിക്ക് 'ഇലവങ്കോട് ദേശം' എന്ന ഡാഡിയുടെ സിനിമയുടെ ഷൂട്ടിങ് മറക്കാനാകില്ല. 'മഹാന​ഗര'ത്തിന്റെ നിർമാണത്തിനുശേഷമുണ്ടായ ഒരുവർഷത്തെ ഇടവേളയ്ക്ക് ശേഷം 1998-ൽ ഡാഡി സംവിധാനം ചെയ്ത സിനിമയായിരുന്നു അത്. ചെർപ്പുളശ്ശേരിയിലെ ഒരു മനയിലാണ് ഷൂട്ടിങ്. പാലക്കാട്ട് അന്ന് വലിയ ഹോട്ടലുകളൊന്നുമില്ല. അതുകൊണ്ട് ചെറിയൊരു ഇടത്താണ് താമസം. സെറ്റും അതുപോലെ തന്നെ തീരെ സൗകര്യം കുറഞ്ഞ സ്ഥലത്ത്. അതിലെ പ്രധാന സീനുകളിൽ ചിത്രീകരിച്ചതാകട്ടെ തെന്മലയിലെ കാട്ടിലും. ചൂടും പ്രാണിശല്യവുമൊക്കെയായി ആകെ പ്രയാസപ്പെട്ടു. മോഡേൺ ലൈഫിൽ നിന്ന് നേരെ ഒരു റോളർകോസ്റ്റർ റൈഡിലെപോലെ മറ്റൊരു അന്തരീക്ഷത്തിലേക്ക്. കുറച്ചുദിവസത്തേക്കായിരുന്നുവെങ്കിലും അതിനോട് പൊരുത്തപ്പെടാൻ പ്രയാസപ്പെട്ടു.

'ഇലവങ്കോട് ദേശ'ത്തിന്റെ സെറ്റിൽ വെച്ചാണ് ഖുശ്ബു,തമിഴ് നടൻ രാജീവ് തുടങ്ങിയവരെ പരിചയപ്പെട്ടത്. രണ്ടുപേരും പിന്നെ ഞങ്ങളുടെ അടുത്ത കുടുംബസുഹൃത്തുക്കളെപ്പോലെയായി. ഖുശ്ബു തിരുവനന്തപുരത്ത് വരുമ്പോഴൊക്കെ ഞങ്ങളുടെ വീട്ടിൽ വരുമായിരുന്നു. അമ്മയുണ്ടാക്കുന്ന മീൻകറിയൊക്കെ അവർക്ക് വലിയ ഇഷ്ടമായിരുന്നു. അതുപോലെ മാന്യത കൊണ്ട് അമ്പരപ്പിച്ചുകളഞ്ഞയാളായിരുന്നു രാജീവ്. തമിഴ്നാട്ടിൽ നിന്നുള്ളവർ മുതിർന്ന ആൾക്കാരോട് കാണിക്കുന്ന അധികബഹുമാനം അദ്ദേഹം ഡാഡിക്കും മമ്മിക്കും എപ്പോഴും കൊടുത്തു. എല്ലാ വിശേഷാവസരങ്ങളിലും വീട്ടിലേക്ക് ​ഗ്രീറ്റിങ് കാർഡുകളയച്ചു.

സിനിമയുടെ ഷൂട്ടിങ് കഴിഞ്ഞാൽ സാധനങ്ങളൊക്കെ സാധാരണ നിർമാതാക്കളുടെ ​ഗോഡൗണുകളിലേക്കോ വീട്ടിലേക്കോ ആകും കൊണ്ടുപോകുന്നത്. എൻ.ആർ.ഐ ആൾക്കാരുടെ ഒരു ​ഗ്രൂപ്പ് ആയിരുന്നു 'ഇലവങ്കോട് ദേശ'ത്തിന്റെ നിർമാതാക്കൾ. അതുകൊണ്ട് സെറ്റിൽ ഷൂട്ടിങ് കഴിഞ്ഞ് ബാക്കിവന്ന സാധനങ്ങളൊക്കെ ഞങ്ങളുടെ വീട്ടിലേക്കാണ് കൊണ്ടുവന്നത്. അവിടെ അപ്പോൾ തന്നെ 'മഹാന​ഗര'ത്തിന്റെ സെറ്റ് പ്രോപ്പർട്ടികൾ ധാരാളമായിട്ടുണ്ടായിരുന്നു. അതുകൂടാതെ ഉപയോ​ഗിച്ച പാത്രങ്ങളും വസ്ത്രങ്ങളും ടിഫിൻ കാരിയറുകളുമൊക്കെ. അതിന്റെ കൂട്ടത്തിലേക്ക് 'ഇലവങ്കോട് ദേശ'ത്തിന്റേതു കൂടിയായപ്പോൾ ഒരു മ്യൂസിയം പോലെയായി ഞങ്ങളുടെ വീട്. 'ഇലവങ്കോട് ദേശ'ത്തിലെ വസ്ത്രങ്ങളും സെറ്റ് പ്രോപ്പർട്ടികളുമൊക്കെ പഴയരീതിയിലുള്ളതായിരുന്നു. എനിക്കും സഹോദരനും അത് കളിപ്പാട്ടങ്ങൾ പോലെയായി. അതിലെ കഥാപാത്രങ്ങളുടെ വസ്ത്രങ്ങളണിഞ്ഞ് ഞങ്ങൾ രാജാവും റാണിയുമായി. കളിവാളുകൾ കൊണ്ട് അങ്കംവെട്ടി.

(തുടരും)