Beats

'റഹ്മാൻ പോലും പഴഞ്ചൻ': പുതുതലമുറയുടെ സംഗീതാഭിരുചിയെ വിമർശിച്ച് സാം സി.എസ്

പപ്പപ്പ ഡസ്‌ക്‌

പുതുതലമുറയുടെ മാറിവരുന്ന സംഗീതാഭിരുചികളെക്കുറിച്ചുള്ള സംഗീതസംവിധായകൻ സാം സി.എസിന്റെ പരാമർശങ്ങൾ ചർച്ചയാകുന്നു. എ.ആർ. റഹ്മാന്റെയും ഇളയരാജയുടെയും സംഗീതം കേട്ടുവളർന്ന തനിക്ക് ഇപ്പോഴത്തെ ഉച്ചത്തിലുള്ള ഹൈ എനർജി സംഗീതശൈലിയുമായി എളുപ്പത്തിൽ പൊരുത്തപ്പെടാൻ കഴിയുന്നില്ലെന്നാണ് അദ്ദേഹം പറയുന്നത്.

ഒരു അഭിമുഖത്തിലാണ് സാം സി.എസ്. തന്റെ അഭിപ്രായങ്ങൾ പങ്കുവെച്ചത്. ഇന്നത്തെ യുവാക്കൾ ഉച്ചത്തിലുള്ള ശബ്ദങ്ങൾ ശീലമാക്കിയിരിക്കുകയാണെന്നും ഈ അഭിരുചിക്ക് അനുസരിച്ചാണ് സമകാലികരായ പല സംഗീതസംവിധായകരും ഇപ്പോൾ സംഗീതമൊരുക്കുന്നതെന്നും അദ്ദേഹം പറഞ്ഞു. എ.ആർ. റഹ്മാനെപ്പോലുള്ള ഇതിഹാസ സംഗീതജ്ഞരെപ്പോലും പ്രേക്ഷകർ പഴഞ്ചനെന്ന് വിശേഷിപ്പിക്കാൻ തുടങ്ങിയതിൽ നിരാശയുണ്ടെന്നും സാം വ്യക്തമാക്കി.

സാം സി.എസ്

വ്യക്തിപരമായി ഈ സംഗീതശൈലി ഇഷ്ടമല്ലെങ്കിലും നിലവിലെ പ്രവണതയോട് താനും പതുക്കെ പൊരുത്തപ്പെടാൻ തുടങ്ങിയിട്ടുണ്ടെന്നും അദ്ദേഹം കൂട്ടിച്ചേർത്തു. ഈ പരാമർശങ്ങൾ സംഗീതത്തിലെ ഈണം, നിലവാരം, സമകാലിക ഗാനങ്ങളുടെ കുറഞ്ഞ ആയുസ്സ് തുടങ്ങിയ വിഷയങ്ങളെക്കുറിച്ചുള്ള ചർച്ചകൾക്കും വഴിതുറന്നിട്ടുണ്ട്.

ഇളയരാജ,എ.ആർ.റഹ്മാൻ

അതേസമയം, എ.ആർ. റഹ്മാന്റെയും ഇളയരാജയുടെയും സംഗീതത്തിന് ഇന്നും പ്രസക്തിയുണ്ടെന്നാണ് സാം സി.എസിന്റെ വിലയിരുത്തൽ. കാലത്തെ അതിജീവിക്കുന്ന, ഓർമയിൽ നിൽക്കുന്ന സംഗീതത്തിന് എന്നും പ്രേക്ഷകർക്കിടയിൽ സ്ഥാനമുണ്ടെന്നതിന്റെ തെളിവാണിതെന്നും അദ്ദേഹം ചൂണ്ടിക്കാട്ടുന്നു.

സാമിന്റെ പുതിയ പരാമർശങ്ങൾ മറ്റൊരു ചോദ്യവും ഉയർത്തുന്നു: ഇന്നത്തെ സംഗീതസംവിധായകർ മികച്ച ഈണങ്ങൾ സൃഷ്ടിക്കുന്നതിനേക്കാൾ അടുത്ത വൈറൽ ഹിറ്റിന് പിന്നാലെയാണോ പോകുന്നത്?