ദുൽഖർ സൽമാൻ നായകനാകുന്ന ബിഗ് ബജറ്റ് ചിത്രം 'ഐ ആം ഗെയിം' റിലീസിന് തൊട്ടുമുമ്പ് റെക്കോഡ് നേട്ടത്തിൽ. ചിത്രത്തിന്റെ മ്യൂസിക് റൈറ്റ്സ് പ്രമുഖ മ്യൂസിക് കമ്പനിയായ സീ മ്യൂസിക് 12.5 കോടി രൂപയ്ക്ക് സ്വന്തമാക്കി. മലയാള സിനിമാ ചരിത്രത്തിലെ തന്നെ ഏറ്റവും ഉയർന്ന തുകയ്ക്കുള്ള മ്യൂസിക് റൈറ്റ്സ് കരാറാണിത്. ചിത്രത്തിന്റെ ഒഫിഷ്യൽ പ്രൊമോ സോങ്ങ് ആയ 'ഹൈ സ്റ്റേക്സ്' അല്പം മുമ്പ് പുറത്തിറങ്ങിയതോടെ ഗാനങ്ങളുയർത്തുന്ന ആവേശം ഉച്ചസ്ഥായിയിലായി.
'ആർഡിഎക്സ്' എന്ന സൂപ്പർഹിറ്റ് ചിത്രത്തിനു ശേഷം നഹാസ് ഹിദായത്ത് സംവിധാനം ചെയ്യുന്ന 'ഐ ആം ഗെയിം' ദുൽഖർ സൽമാന്റെ കരിയറിലെ 40-ാമത്തെ ചിത്രമാണ്. വൻ ബജറ്റിൽ ഒരുങ്ങുന്ന ആക്ഷൻ ത്രില്ലർ ദുൽഖറിന്റെ ഉടമസ്ഥതയിലുള്ള വേഫെറർ ഫിലിംസും ജോം വർഗീസും ചേർന്നാണ് നിർമിക്കുന്നത്. സെപ്റ്റംബർ മൂന്നിന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും ചിത്രം പ്രദർശനത്തിനെത്തും.
ജേക്സ് ബിജോയ് സംഗീത സംവിധാനം നിർവഹിച്ച ചിത്രത്തിലെ ഗാനങ്ങൾ ഇതിനോടകം തന്നെ തരംഗമായിക്കഴിഞ്ഞു. ചിത്രത്തിലെ ആദ്യ ഗാനമായ 'മഴവില്ലായേ', അടുത്തിടെ പുറത്തിറങ്ങിയ 'ലൂസർ' എന്നീ ഗാനങ്ങൾ സോഷ്യൽ മീഡിയയിൽ വലിയ ശ്രദ്ധ നേടി. നീരജ് മാധവ്, റെബിൾ എന്നിവരുടെ റാപ്പ് വരികൾക്കൊപ്പം ദുൽഖർ സൽമാൻ തന്നെ ആലപിച്ച ഗാനമാണ് 'ലൂസർ'. കഴിഞ്ഞ ദിവസം കാക്കനാട് കിൻഫ്ര ഇന്റർനാഷണൽ എക്സിബിഷൻ സെന്ററിൽ നടന്ന പ്രീ-റിലീസ്, മ്യൂസിക് ലോഞ്ച് ചടങ്ങിൽ ദുൽഖർ ഈ ഗാനം തത്സമയം ആലപിച്ചിരുന്നു.
വെറും ഭാഗ്യത്തെ മാത്രം ആശ്രയിക്കാതെ കൃത്യമായ അൽഗോരിതത്തിന്റെ സഹായത്തോടെ ചൂതാട്ടം നടത്തുന്ന ഡാൻ ജോൺ എന്ന കഥാപാത്രമായാണ് ദുൽഖർ എത്തുന്നത്. തന്റെ കണക്കുകൂട്ടലുകൾ തെറ്റിപ്പോകുമ്പോൾ നേരിടേണ്ടി വരുന്ന അപ്രതീക്ഷിത സംഭവവികാസങ്ങളിലൂടെയാണ് ചിത്രത്തിന്റെ കഥ മുന്നോട്ടുപോകുന്നത്. നഹാസിന്റെ കഥയ്ക്ക് സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. സജീർ ബാബ, ആദർശ് സുകുമാരൻ, ഷബാസ് റഷീദ് എന്നിവരാണ് സംഭാഷണങ്ങൾ എഴുതിയത്.
ആന്റണി വർഗീസ്, തമിഴ് നടനും സംവിധായകനുമായ മിഷ്കിൻ, കയാദു ലോഹർ, കതിർ, പാർഥ് തിവാരി, സംയുക്ത വിശ്വനാഥൻ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. ഓഗസ്റ്റ് 20-ന് ഓണം റിലീസായി എത്തേണ്ടിയിരുന്ന ചിത്രം പിന്നീട് സെപ്റ്റംബർ മൂന്നിലേക്ക് മാറ്റിവെക്കുകയായിരുന്നു.