മലയാളത്തിലേക്ക് പുതിയൊരു ടൈം ട്രാവൽ സിനിമ കൂടി. ശ്രീനാഥ് ഭാസി പ്രധാനവേഷത്തിലെത്തുന്ന 'ഒറിജിനൽ'. ഒക്ടോബർ 23ന് ചിത്രം തിയേറ്ററുകളിലെത്തും. ട്രെയിലർ ലോഞ്ച് കാക്കനാട് രാജഗിരി കോളേജിൽ ബുധനാഴ്ച നടന്നിരുന്നു. റിലീസിന് മുന്നോടിയായി നടന്ന ചടങ്ങിൽ താരങ്ങൾക്കൊപ്പം വിദ്യാർഥികളും ചേർന്നാണ് ട്രെയിലർ ലോഞ്ച് ചെയ്തത്.
സിനിമയെ നേരിട്ട് യുവപ്രേക്ഷകരിലേക്ക് എത്തിക്കുന്ന ഈ വേറിട്ട ആശയം ക്യാമ്പസിലും സാമൂഹ്യമാധ്യമങ്ങളിലും വലിയ ആവേശമാണ് സൃഷ്ടിച്ചത്. ശ്രീനാഥ് ഭാസി, ഫെമിന ജോർജ്, സ്റ്റിനി ഫ്രാൻസിസ്, സുബിൻ ടാർസൻ, ഗായിക കവിത കാളിയപ്പൻ, ഗാനരചയിതാവ് മുത്തു, സംവിധായകൻ റമീസ് എന്നിവർ ചടങ്ങിൽ പങ്കെടുത്തിരുന്നു. കവിത കാളിയപ്പനും മുത്തുവും ശ്രീനാഥ് ഭാസിയും ഗാനങ്ങൾ ആലപിച്ചത് ക്യാമ്പസിൽ വലിയ ആവേശം സൃഷ്ടിച്ചു.
'നമ്മൾ സമയവുമായി കളിച്ചാൽ, സമയം എന്തായാലും തിരിച്ച് കളിക്കും' എന്ന ഡയലോഗാണ് ട്രെയിലറിന്റെ ഹൈലൈറ്റ്. 'ഇഫ് യൂ മെസ് വിത്ത് ടൈം, ഇറ്റ് ടെൻഡ്സ് ടു മെസ് ബാക്ക്' എന്ന ഡയലോഗിനൊപ്പം ഉദ്വേഗം നിറഞ്ഞ മുഹൂർത്തങ്ങളും കൗതുകമുണർത്തുന്ന രംഗങ്ങളുമാണ് ട്രെയിലറിൽ ഉൾപ്പെടുത്തിയിരിക്കുന്നത്. അടുത്തതായി എന്താണ് സംഭവിക്കാൻ പോകുന്നത് എന്ന ആകാംക്ഷ പ്രേക്ഷകരിൽ സൃഷ്ടിക്കുന്ന തരത്തിലാണ് ട്രെയിലർ ഒരുക്കിയിരിക്കുന്നത്.
യുവാവായ റിജിന്റെ സിനിമാമോഹവും അയാളുടെ ജീവിതത്തിൽ സംഭവിക്കുന്ന വ്യത്യസ്തമായ സംഭവവികാസങ്ങളുമാണ് ചിത്രത്തിന്റെ പ്രമേയം. ടൈം ട്രാവൽ, ഫാന്റസി, ഹാസ്യം, ത്രില്ലർ, വൈകാരിക മുഹൂർത്തങ്ങൾ എന്നിവ സമന്വയിപ്പിക്കുന്ന ചിത്രത്തിന്റെ ലോകത്തെ കൂടുതൽ പരിചയപ്പെടുത്തുന്നതാണ് ട്രെയിലർ. നേരത്തെ പുറത്തിറങ്ങിയ ടീസറിനും ഗാനങ്ങൾക്കും പിന്നാലെയാണ് ചിത്രത്തിന്റെ കഥയിലേക്കുള്ള കൂടുതൽ സൂചനകൾ നൽകിക്കൊണ്ട് ട്രെയിലർ എത്തിയിരിക്കുന്നത്.
റമീസ് എഴുതി സംവിധാനം ചെയ്യുന്ന ചിത്രത്തിൽ അഭിരാം രാധാകൃഷ്ണൻ, രാജേഷ് മാധവൻ, സാഫ് ബോയ്, ബിനു പപ്പു, ഫെമിന ജോർജ്, ശ്രീകാന്ത് വെട്ടിയാർ, ഗോകുലൻ, അനീഷ് ജി, സലീം ഹസൻ, ദിനേശ് പ്രഭാകർ, രാജേഷ് പറവൂർ, ഷമീർ (ചൂരൽ), സുബിൻ ടാർസൻ, അരുൺ പ്രദീപ്, ലാല മലപ്പുറം, സ്റ്റിനി ഫ്രാൻസിസ്, ഹാരിസ് സലീം, വിരു വിവേക് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ചിത്രത്തിന്റെ സംഗീതാവകാശം തിങ്ക് മ്യൂസിക് സ്വന്തമാക്കിയിട്ടുണ്ട്. ഹോം സ്ക്രീൻ എന്റർടെയ്ൻമെന്റ്സാണ് ജി.സി.സി. വിതരണ പങ്കാളി.
മാസ് മീഡിയ, സിക്കു ഫിലിംസ് എന്നീ ബാനറുകളിൽ ഒരുങ്ങുന്ന ചിത്രത്തിന്റെ സഹനിർമ്മാണം ഹർഷദ് വഹിക്കുന്നു. ഫഹദ് ഫത്‌ലി ഛായാഗ്രഹണം നിർവഹിക്കുന്നു. ഷഫീഖ് മുഹമ്മദ് അലിയാണ് എഡിറ്റർ. കലാസംവിധാനം- അർഷാദ് നാക്കോത്ത്, രജീഷ് കെ. സൂര്യ, വിഷ്വൽ എഫക്ട്സ്- മൈൻഡ്സ്റ്റൈൻ സ്റ്റുഡിയോസ്, എക്സിക്യൂട്ടീവ് പ്രൊഡ്യൂസർ,കാസ്റ്റിങ്- അഷ്റ മുഹമ്മദ്, സൗണ്ട് ഡിസൈൻ- സച്ചിൻ സുധാകരൻ, ഹരിഹരൻ എം. (സിങ്ക് സിനിമ) മേക്കപ്പ്- റോണെക്സ് സേവ്യർ, വസ്ത്രാലങ്കാരം- സമീറ സനീഷ് ആക്ഷൻ കൊറിയോഗ്രഫി-പി.സി. സ്റ്റണ്ട്സ് കോൺസെപ്റ്റ്- ജിപിൻ ഗോപി, പ്രൊഡക്ഷൻ കൺട്രോളർ- ജാവേദ് ചെമ്പ്, ഡി.ഐ- കളർ പ്ലാനറ്റ്, മാർക്കറ്റിങ് ആൻഡ് കമ്മ്യൂണിക്കേഷൻസ്-ഡോ. സംഗീത ജനചന്ദ്രൻ(സ്റ്റോറീസ് സോഷ്യൽ), ഡിസ്ട്രിബ്യൂഷൻ ഹെഡ്-പ്രദീപ് മേനോൻ.