മലയാള സിനിമാപ്രേമികൾ ആവേശത്തോടെ കാത്തിരിക്കുന്ന പൃഥ്വിരാജ്-വൈശാഖ് ചിത്രം 'ഖലീഫ'യുടെ ചിത്രീകരണത്തിന് ദുബായിൽ ശുഭപര്യവസാനം. വമ്പൻ ക്യാൻവാസിൽ ഒരുങ്ങുന്ന മാസ് ആക്ഷൻ ചിത്രത്തിന്റെ അവസാന ഷെഡ്യൂളാണ് കഴിഞ്ഞ ദിവസം ദുബായിൽ പൂർത്തിയായത്.
ചിത്രം വരാനിരിക്കുന്ന ഓണം റിലീസായി ഓഗസ്റ്റ് 20-ന് തിയേറ്ററുകളിൽ പൂരക്കാഴ്ചയൊരുക്കാൻ എത്തും. 'രാജീവന് പിന്നാലെ ആമിർ അലി എത്തും, നോബഡിക്ക് പിന്നാലെ സ്മഗ്ലർ വരും' എന്ന മാസ് ഡയലോഗോടെ പൃഥ്വിരാജ് തന്നെയാണ് സോഷ്യൽ മീഡിയയിലൂടെ പാക്കപ്പ് വിവരം ആരാധകരെ അറിയിച്ചത്.
'മാമ്പറയ്ക്കൽ ആമിർ അലി' എന്ന പവർഫുൾ കഥാപാത്രമായാണ് പൃഥ്വിരാജ് സ്ക്രീനിൽ തകർത്താടാൻ വരുന്നത്. എന്നാൽ ആരാധകരെ ഡബിൾ എനർജിയിലാക്കുന്ന മറ്റൊരു സർപ്രൈസ് വാർത്ത ചിത്രത്തിൽ അതിഥി വേഷത്തിൽ സാക്ഷാൽ മോഹൻലാലും എത്തുന്നു എന്നതാണ്. പപ്പപ്പ ഡോട് കോം ആണ് ഈ വിവരം ആദ്യം പുറത്തുവിട്ടത്. 'മാമ്പറയ്ക്കൽ അഹമ്മദ് അലി' എന്ന കഥാപാത്രമായാണ് മോഹൻലാൽ വരുന്നത്. രണ്ടു ഭാഗങ്ങളായി പ്ലാൻ ചെയ്തിരിക്കുന്ന ഖലീഫയുടെ രണ്ടാം ഭാഗത്തിൽ മോഹൻലാലായിരിക്കും നായകൻ. രണ്ടാം ഭാഗത്തിലും പൃഥ്വിരാജ് ഒരു പ്രധാന വേഷത്തിൽ ഒപ്പമുണ്ടാകും.
'കടുവ'യ്ക്ക് ശേഷം ജിനു എബ്രഹാമിന്റെ തിരക്കഥയിൽ വൈശാഖ് സംവിധാനം ചെയ്യുന്ന ചിത്രം സ്വർണക്കള്ളക്കടത്തിന്റെ കാണാപ്പുറങ്ങളാണ് ചർച്ച ചെയ്യുന്നത്. ബോളിവുഡ് താരം നീൽ നിതിൻ മുകേഷ് ആദ്യമായി മലയാളത്തിൽ അഭിനയിക്കുന്ന ചിത്രം കൂടിയാണ് ഖലീഫ. ജോമോൻ ടി. ജോണിന്റെ ക്യാമറയും ജേക്സ് ബിജോയിയുടെ തിയേറ്റർ ഇളക്കിമറിക്കുന്ന പശ്ചാത്തല സംഗീതവും ചിത്രത്തിന് മാറ്റുകൂട്ടും. ചമൻ ചാക്കോയാണ് എഡിറ്റിങ്. ഹോളിവുഡ് സ്റ്റൈൽ ആക്ഷൻ രംഗങ്ങൾ ഒരുക്കുന്നത് പ്രശസ്ത ഫൈറ്റ് മാസ്റ്റർ യാനിക്ക് ബെൻ ആണ്.