ഇന്നും ഇന്ത്യൻ മനസുകളിലെ സ്വപ്നജോഡികളാണ് കജോളും ഷാരൂഖും! ആത്മാവിനുമാത്രം അറിയാൻ കഴിയുന്ന വികാരങ്ങൾ അഭ്രപാളിയിൽനിന്ന് പ്രേക്ഷകരിലേക്കു പകർന്ന താരങ്ങൾ. അതെ, ഇരുവരും ചേർന്നു അനശ്വരമാക്കിയ 'ദിൽവാലെ ദുൽഹാനിയ ലേ ജായേംഗെ' (ഡിഡിഎൽജെ) എന്ന മാസ്മരിക ചിത്രത്തിന് ഒക്ടോബർ 20ന് മുപ്പതാണ്ടു തികഞ്ഞു. നിങ്ങൾ ഒരു ബോളിവുഡ് ആരാധകനോ ആരാധികയോ ആണെങ്കിൽ, 'ദിൽവാലെ ദുൽഹാനിയ ലേ ജായേംഗെ' നിങ്ങളുടെ ഇഷ്ട ചിത്രമായിരിക്കും. മൂന്ന് പതിറ്റാണ്ടുകൾക്ക് ശേഷവും യഥാർഥ പ്രണയം എന്താണെന്ന് എന്നതിന് രാജും (ഷാരൂഖ് ഖാൻ) സിമ്രാനും (കജോൾ) നല്കുന്ന നിർവചനം ഹൃദയങ്ങളിൽനിന്ന് ഹൃദയങ്ങളിലേക്കു തുടരുകയാണ്.
'ദിൽവാലെ ദുൽഹാനിയ ലേ ജായേംഗെ' പ്രദർശനത്തിന്റെ മുപ്പതുവർഷം തികഞ്ഞവേളയിൽ കജോൾ മാധ്യമങ്ങളോട് ചിത്രത്തക്കുറിച്ച് വിശദമായി സംസാരിച്ചു. സിമ്രാൻ എന്ന കഥാപാത്രത്തെ അവതരിപ്പിച്ച താരം, ചിത്രം പിന്നിട്ട നാഴികക്കല്ലിനെ 'അതിശയകരം' എന്നാണ് വിശേഷിപ്പിച്ചത്. 'ഒരു തലമുറയ്ക്ക് ഗൃഹാതുരത്വമുണർത്തുന്ന അനുഭവവുമായി 'ഡിഡിഎൽജെ' മാറി. യുവത്വത്തിന്റെ നിർമലതയും ആദ്യ പ്രണയത്തിന്റെ സത്യസന്ധതയും അടിസ്ഥാനമാക്കിയാണ് ആ ക്ലാസിക് നിർമിച്ചിരിക്കുന്നത്. '- കജോൾ പറഞ്ഞു.
എന്താണ് കജോളിന് ഡിഡിഎൽജെ? ആരാണ് സിമ്രാൻ?
'ഡിഡിഎൽജെ'യുടെ സ്വാധീനം അതിനു ശേഷം വന്ന എല്ലാ റൊമാന്റിക് സിനിമകളിലും ഉണ്ട്. കാരണം സൃഷ്ടിക്കപ്പെട്ടത് ചരിത്രമാണ്. അതൊരിക്കലും നമ്മെ വിട്ടുപോകുന്നില്ല. എനിക്ക്, സിമ്രാൻ അവസാനിക്കാൻ വിസമ്മതിക്കുന്ന ഒരു അധ്യായമാണ്. ഈ രാജ്യത്തുടനീളമുള്ള ദശലക്ഷക്കണക്കിന് പെൺകുട്ടികളെയാണ് സിമ്രാൻ പ്രതിനിധീകരിക്കുന്നത് - മാതാപിതാക്കൾ പറയുന്നത് ചെയ്യാൻ ആഗ്രഹിക്കുന്ന, ഒരു കൈയിൽ പാരമ്പര്യം വഹിക്കുന്ന, മറുകൈയിൽ സ്വാതന്ത്ര്യത്തിനായി കൈനീട്ടുന്ന പെൺകുട്ടികൾ... 'ജാ സിമ്രാൻ, ജാ' എന്ന ഡയലോഗ് പറയുമ്പോഴെല്ലാം, ധൈര്യത്തിനും സ്‌നേഹത്തിനും ഒരുമിച്ച് നിലനിൽക്കാൻ കഴിയുമെന്ന വിശ്വാസത്തെ അത് സൂചിപ്പിക്കുന്നു...
ഈ രാജ്യത്തുടനീളമുള്ള ദശലക്ഷക്കണക്കിന് പെൺകുട്ടികളെയാണ് സിമ്രാൻ പ്രതിനിധീകരിക്കുന്നത് - മാതാപിതാക്കൾ പറയുന്നത് ചെയ്യാൻ ആഗ്രഹിക്കുന്ന, ഒരു കൈയിൽ പാരമ്പര്യം വഹിക്കുന്ന, മറുകൈയിൽ സ്വാതന്ത്ര്യത്തിനായി കൈനീട്ടുന്ന പെൺകുട്ടികൾ..
ചിത്രം കാലത്തെ അതിജീവിക്കുമെന്ന് കരുതിയിരുന്നോ?
പതിനാറ് വയസിൽ ഈ സിനിമയെ ആരാധിച്ചിരുന്ന പ്രേക്ഷകർ ഇപ്പോൾ അവരുടെ കുട്ടികളോടൊപ്പം ഇത് കാണുന്നു. ഇന്ത്യൻ സിനിമ പ്രണയത്തെ എങ്ങനെ സ്വപ്നം കാണുന്നു എന്നതിന്റെ മാതൃകയായി ഇത് മാറിയിരിക്കുന്നു. വെളുത്ത വസ്ത്രം ധരിച്ച, താൻ സ്‌നേഹിക്കുന്ന ഒരാളിലേക്ക് ഓടുന്ന ആ പെൺകുട്ടിയായി എന്നെ ഇപ്പോഴും കാണുന്ന പ്രേക്ഷകരോട് ഞാൻ എന്നും നന്ദിയുള്ളവളാണ്.
ഷാരൂഖ് ഖാനുമായുള്ള അനായാസമായ കെമിസ്ട്രിയെക്കുറിച്ച്?
ചിത്രത്തിന്റെ ആദ്യ ടേക്ക് മുതൽ അനായാസമായാണ് ഞങ്ങൾ ചെയ്തത്. അതുകൊണ്ടാണ് സ്‌ക്രീനിൽ മാജിക് വളരെ സ്വാഭാവികമായി തോന്നുന്നത്. ഞങ്ങൾ അഭിനയിക്കുകയല്ല ചെയ്തത്. കഥാപാത്രങ്ങളെ ശരിക്കും അറിയുകയായിരുന്നു. ഞങ്ങളുടെ കോംബോ പരസ്പര ബഹുമാനം കൈമാറുന്നതായിരുന്നു. ഏറ്റവും വൈകാരികമോ തീവ്രമോ ആയ രംഗങ്ങളിൽ പോലും ഞങ്ങൾ സ്വാഭാവികമായി പ്രതികരിക്കുകയായിരുന്നു.
'ഡിഡിഎൽജെ' പൂർണതയുള്ള ചിത്രമാണെന്ന് വിശ്വസിക്കുന്നുണ്ടോ?
തികഞ്ഞ സിനിമ എന്നൊന്നുണ്ടെന്ന് ഞാൻ കരുതുന്നില്ല. പൂർണതയുള്ള സിനിമ എന്താണെന്ന് ആർക്കെങ്കിലും അറിയാമെന്ന് ഞാൻ കരുതുന്നില്ല! പക്ഷേ, ഇപ്പോഴും ചിത്രം കാണാൻ ധാരാളം പേർ എത്തുന്നു. കണ്ടവർതന്നെ വർഷങ്ങളായി വീണ്ടുമെത്തുന്നു. 'ഡിഡിഎൽജെ'യുടെ മുപ്പതു വർഷം അതിശയകരമാണ്! അഭിനേതാക്കൾ ഒരു സിനിമയുടെ ജോലി പൂർത്തിയാക്കിക്കഴിഞ്ഞാൽ, അതിനെ സജീവമായി നിലനിർത്തുന്നത് പ്രേക്ഷകരാണ്. ആദിത്യ ചോപ്ര സംവിധാനം ചെയ്ത റൊമാന്റിക് ഡ്രാമയുടെ കാര്യത്തിലും അതാണ് സംഭവിച്ചത്. 'ഇതൊന്നും ഞങ്ങളുടെ നിയന്ത്രണത്തിലല്ല. ഞങ്ങൾ മുപ്പതു വർഷം മുമ്പ് ഞങ്ങളുടെ ജോലി പൂർത്തിയാക്കി. ജയപരാജയങ്ങൾ പ്രേക്ഷകരെ ആശ്രയിച്ചിരിക്കുന്നുവെന്ന് ഞാൻ കരുതുന്നു. 'ഡിഡിഎൽജെ' അവർക്ക് ഇഷ്ടപ്പെട്ടു. അവരുടെ ജീവിതത്തിന്റെ ഭാഗമായിമാറി.
വിജയത്തിൽ സംവിധായകൻ ആദിത്യ ചോപ്രയുടെ പങ്ക്?
സിനിമയെ സൃഷ്ടിക്കുന്ന വ്യക്തിയുടെ ബോധ്യം സിനിമ എങ്ങനെയായിരിക്കുമെന്നതുമായി വളരെയധികം ബന്ധപ്പെട്ടിരിക്കുന്നുവെന്ന് ഞാൻ കരുതുന്നു. ഇത് ബോധ്യത്തോടെയും അഭിനിവേശത്തോടെയും നിർമിച്ചതാണ്. ആ രണ്ടു കാര്യങ്ങളും എല്ലായ്‌പ്പോഴും ക്യാമറയിൽ മനോഹരമായി പ്രതിഫലിപ്പിക്കപ്പെടുന്നു എന്ന് ഞാൻ കരുതുന്നു.