രൺവീർ സിങ്ങും ആദിത്യ ധറും ഫോട്ടോകടപ്പാട്-ഇൻസ്റ്റ​ഗ്രാം
Bollywood

ഇനി ലക്ഷ്യം എന്ത്? 'ധുരന്ധറി'ന് പിന്നാലെ രൺവീർ സിങ്ങും ആദിത്യ ധറും വീണ്ടും

പപ്പപ്പ റിപ്പോര്‍ട്ടര്‍

'ധുരന്ധർ' നേടിയ വൻ വിജയത്തിന് പിന്നാലെ നടൻ രൺവീർ സിങ്ങും സംവിധായകൻ ആദിത്യ ധറും വീണ്ടും ഒന്നിക്കുന്നതായി റിപ്പോർട്ടുകൾ. ഇരുവരും വീണ്ടും ഒരുമിക്കുന്നുവെന്ന തരത്തിൽ നേരത്തെ ചില വാർത്തകൾ പുറത്തുവന്നിരുന്നെങ്കിലും പിന്നീട് അവ തള്ളിക്കളയപ്പെട്ടിരുന്നു. എന്നാൽ ഈ കൂട്ടുകെട്ട് വീണ്ടും യാഥാർഥ്യമാകുമെന്നാണ് ബോളിവുഡ് വൃത്തങ്ങളിൽനിന്നുള്ള പുതിയ സൂചനകൾ വ്യക്തമാക്കുന്നത്. 2028ന്റെ അവസാനത്തോടെ ചിത്രം തിയേറ്ററുകളിലെത്തിക്കാനാണ് ലക്ഷ്യമിടുന്നതെന്നും റിപ്പോർട്ടുകളുണ്ട്.

'ധുരന്ധറി'ലൂടെ രൺവീർ സിങ്ങും ആദിത്യ ധറും വലിയ പ്രേക്ഷകശ്രദ്ധയും പ്രശംസയും നേടിയിരുന്നു. അതുകൊണ്ടുതന്നെ ഇരുവരുടെയും അടുത്ത ചിത്രത്തെക്കുറിച്ചുള്ള ചർച്ചകളും സിനിമാലോകത്ത് സജീവമാണ്. എന്നാൽ ആദിത്യ ധറിനൊപ്പം പുതിയ ചിത്രത്തിലേക്ക് കടക്കുന്നതിന് മുൻപ് രൺവീറിന് പൂർത്തിയാക്കാനുള്ള മറ്റൊരു പ്രധാന പ്രോജക്ട് കൂടിയുണ്ട്.

രൺവീർ സിങ്ങും ആദിത്യ ധറും 'ധുരന്ധർ' ഷൂട്ടിങ്ങിനിടെ

സോംബി പശ്ചാത്തലത്തിലുള്ള ആക്ഷൻ ഡ്രാമയായി ഒരുങ്ങുന്ന 'പ്രളയ്' എന്ന ചിത്രത്തിലാണ് രൺവീർ ഇപ്പോൾ അഭിനയിക്കുന്നത്. വ്യത്യസ്തമായ പ്രമേയവും ആക്ഷൻ രംഗങ്ങളും കൊണ്ട് ശ്രദ്ധേയമാകുമെന്ന് പ്രതീക്ഷിക്കുന്ന ചിത്രത്തിലൂടെ മറ്റൊരു വേറിട്ട വേഷത്തിലാകും താരം എത്തുക.

രൺവീർ സിങ്ങും ആദിത്യ ധറും 'ധുരന്ധർ' ഷൂട്ടിങ്ങിനിടെ

'പ്രളയ്'യുടെ ചിത്രീകരണം പൂർത്തിയാക്കിയ ശേഷമായിരിക്കും രൺവീർ ആദിത്യ ധറിന്റെ പുതിയ പ്രോജക്ടിൽ പങ്കുചേരുകയെന്നാണ് സൂചന. ചിത്രത്തിന്റെ പ്രമേയം, വിഭാഗം, മറ്റ് അഭിനേതാക്കൾ, സാങ്കേതിക പ്രവർത്തകർ തുടങ്ങിയ വിവരങ്ങളൊന്നും ഇതുവരെ പുറത്തുവിട്ടിട്ടില്ല.

'ധുരന്ധർ' സൃഷ്ടിച്ച വലിയ സ്വാധീനത്തിന്റെ പശ്ചാത്തലത്തിൽ ഇരുവരുടെയും അടുത്ത ചിത്രത്തെക്കുറിച്ചുള്ള പ്രതീക്ഷകളും ഏറെയാണ്. റിപ്പോർട്ടുകൾ യാഥാർഥ്യമായാൽ 2028ന്റെ അവസാനത്തോടെ ഈ വിജയക്കൂട്ടുകെട്ടിന്റെ പുതിയ ചിത്രം ബിഗ് സ്ക്രീനിലെത്തും.