തെന്നിന്ത്യൻ സൂപ്പർതാരം ധനുഷിന്റെ പ്രണയത്തെക്കുറിച്ചുള്ള തുറന്നുപറച്ചിൽ ആണ് ഇപ്പോൾ ആരാധകർക്കിട‍യിൽ ചർച്ച. പുതിയ ചിത്രമായ 'തേരേ ഇഷ്ക് മേം' എന്ന ചിത്രത്തിന്‍റെ ട്രെയിലർ റിലീസ് പരിപാടിയിലാണ് പ്രണയത്തെക്കുറിച്ച് താരം തന്‍റെ അഭിപ്രായം തുറന്നുപറഞ്ഞത്. ആനന്ദ് എൽ. റായ് സംവിധാനം ചെയ്ത് ധനുഷും കൃതി സനോണും പ്രധാന വേഷങ്ങളിൽ എത്തുന്ന 'തേരേ ഇഷ്ക് മേം' റൊമാന്‍റിക്-ആക്ഷൻ ഡ്രാമയാണ്. കഴിഞ്ഞദിവസമാണ് ചിത്രത്തിന്‍റെ ട്രെയിലർ പുറത്തിറങ്ങിയത്.
ചടങ്ങിൽ ധനുഷിനോടും കൃതി സനോണിനോടും പ്രണയത്തെക്കുറിച്ചുള്ള അവരുടെ കാഴ്ചപ്പാടിനെക്കുറിച്ച് ചോദിച്ചു. മറുപടി പറയാൻ ഇരുവരും മടിച്ചു. കുറച്ചു കഴിഞ്ഞപ്പോൾ ധനുഷ് പറഞ്ഞു, 'എനിക്കറിയില്ല.' താങ്കൾക്ക് അത് എളുപ്പം വിശദീകരിക്കാൻ കഴിയുമെന്ന് തമാശരൂപേണ ആരോ പ്രതികരിച്ചപ്പോൾ ധനുഷിന്റെ മറുപടി ഇങ്ങനെയായിരുന്നു: 'പ്രണയം അമിതപ്രാധാന്യം നല്കപ്പെട്ട വികാരമാണെന്ന് ഞാൻ കരുതുന്നു.
' ധനുഷിന്റെ ഓൺസ്‌ക്രീൻ കഥാപാത്രമായ ശങ്കർ അതിനോട് യോജിക്കില്ലെന്ന് കൃതി പറഞ്ഞപ്പോൾ, 'ഞാൻ അദ്ദേഹത്തെപ്പോലെയല്ലെന്ന് നേരത്തെ പറഞ്ഞിരുന്നല്ലോ...' എന്നും താരം കൂട്ടിച്ചേർത്തു. താരത്തിന്‍റെ മറുപടികേട്ട് എല്ലാവരും കൈയടിക്കുകയും ആഘോഷിക്കുകയും ചെയ്തു.
ധനുഷിന്‍റെയും ഇതിഹാസതാരം രജനികാന്തിന്‍റെ മകൾ ഐശ്വര്യ രജനികാന്തിന്‍റെയും വിവാഹം 2004 ൽ ചെന്നൈയിലാണു നടന്നത്. ഇവരുടേത് പ്രണയവിവാഹമായിരുന്നു. 18 വർഷത്തെ ദാമ്പത്യത്തിനു ശേഷം, വേർപിരിയാനുള്ള തീരുമാനം ഇരുവരും ഒരുമിച്ചാണ് അറിയിച്ചത്.