ഇനി ഉലകസം​ഗീതം; ജേക്സ് ബിജോയ് യുടെ അടുത്ത ചിത്രം കമൽ ഹാസനോടൊപ്പം

മലയാളത്തിൽ തൊട്ടതെല്ലാം പൊന്നാക്കിയ സം​ഗീത സംവിധായകൻ ജേക്സ് ബിജോയ് തന്റെ എഴുപത്തിയഞ്ചാമത് ചിത്രത്തിലൂടെ ചരിത്രംകുറിക്കുന്നു. സാക്ഷാൽ കമൽ ഹാസൻ നായകനാകുന്ന ചിത്രമാണ് ജേക്സിന്റെ സം​ഗീതയാത്രയിലെ നാഴികക്കല്ലായി മാറുക. മലയാളത്തിൽ കളക്ഷൻ റെക്കോർഡുകൾ തിരുത്തിക്കുറിച്ച 'ലോക:'യും 'തുടരും എന്നിവ കണ്ടശേഷം കമൽ ഹാസൻ ജേക്സ് ബിജോയിയെ അഭിനന്ദിച്ചിരുന്നു. പ്രശസ്ത ആക്ഷൻ കൊറിയോഗ്രാഫർമാരായ അൻപ് അറിവ് സഹോദരങ്ങളാണ് ജേക്സ് സം​ഗീതസംവിധാനം ചെയ്യുന്ന കമൽ ചിത്രത്തിന്റെ സംവിധാനം.

കമൽ ഹാസനെ പോലെയുള്ള ഒരു ലെജൻഡിന്റെ ചിത്രത്തിനായി സംഗീത സംവിധാനം നിർവഹിക്കുന്നതിൽ ഏറെ അഭിമാനമുണ്ടെന്ന് ജേക്സ് ബിജോയ് പറഞ്ഞു. തന്റെ ജീവിതത്തിന്റെ പകുതിയിലേറെയും തമിഴ്‌നാട്ടിൽ ചെലവഴിച്ച വ്യക്തികൂടിയാണ് ജേക്സ്. യേർക്കാട്ടിലെ സ്‌കൂൾ കാലഘട്ടം മുതൽ തന്റെ കരിയറിന് വഴിത്തിരിവായ വഴിതെളിയിച്ച ചെന്നൈജീവിതം വരെയുള്ള കാലം ഇന്നും എന്നും മനസ്സിൽ സൂക്ഷിക്കുന്ന ജേക്സ് ബിജോയ്‌ക്ക് ഇത് അഭിമാനനേട്ടം കൂടിയാണ്

.കമൽ ഹാസൻ- അൻപറിവ് ചിത്രത്തിന്റെ ഷൂട്ടിങ് വിശദാംശങ്ങളും, മറ്റ് അണിയറപ്രവർത്തകരുടെ വിവരങ്ങളും വരും നാളുകളിൽ ഔദ്യോഗികമായി പ്രഖ്യാപിക്കും. പിആർഒ- പ്രതീഷ് ശേഖർ.