കീര്‍ത്തിക്ക് പിറന്നാൾ സമ്മാനമായി 'SVC 59' പുതിയ പോസ്റ്റര്‍

ടോളിവുഡ് സൂപ്പര്‍താരം വിജയ് ദേവരകൊണ്ടയും മലയാളിതാരം കീര്‍ത്തി സുരേഷും ഒന്നിക്കുന്ന 'SVC59' എന്നു താത്കാലികമായി പേരിട്ടിരിക്കുന്ന ചിത്രത്തിന്റെ പുതിയ പോസ്റ്റര്‍ റിലീസ് ചെയ്തു. കീര്‍ത്തിയുടെ പിറന്നാള്‍ ദിനത്തോടനുബന്ധിച്ചാണ് പുതിയ പോസ്റ്റര്‍ പുറത്തിറക്കിയത്.

'അവളുടെ പ്രണയം കവിതയും, ആത്മാവ് സംഗീതവുമാണ്'- എന്ന തലക്കെട്ടില്‍ ആകര്‍ഷകമായ ദൃശ്യങ്ങളിലൂടെ പ്രേക്ഷകരുടെ ശ്രദ്ധ പിടിച്ചുപറ്റിയ പോസ്റ്റര്‍, സിനിമയുടെ തീവ്രതയും ഗ്രാമീണ ആക്ഷന്‍ ഡ്രാമയുടെ പശ്ചാത്തലവും സൂചിപ്പിക്കുന്നു.

ശ്രീ വെങ്കിടേശ്വര ക്രിയേഷന്‍സിന് കീഴില്‍ ദില്‍ രാജുവും ശിരീഷും ചേര്‍ന്നാണ് ഈ പാന്‍ ഇന്ത്യന്‍ ആക്ഷന്‍ ചിത്രം നിര്‍മിക്കുന്നത്. 'രാജാ വാരു റാണി ഗാരു' എന്ന സിനിമയിലൂടെ ചലച്ചിത്രലോകത്ത് ഗംഭീര ചുവടുവയ്പു നടത്തിയ രവി കിരണ്‍ കോലയാണ് ചിത്രത്തിന്റെ സംവിധാനം നിര്‍വഹിക്കുന്നത്. ഹൈദരാബാദില്‍ ചിത്രീകരണം ആരംഭിച്ച 'SVC59' അഞ്ച് ഭാഷകളില്‍ പുറത്തിറങ്ങും.