അനിശ്ചിതത്വംഅവസാനിച്ചു, പ്രഖ്യാപനമായി; 'തലൈവർ 173' സിബി ചക്രവർത്തി സംവിധാനം ചെയ്യും

സൂപ്പർസ്റ്റാർ രജനികാന്തിനെ നായകനാക്കി ഉലകനായകൻ കമൽ ഹാസൻ നിർമിക്കുന്ന സിനിമ സിബി ചക്രവർത്തി സംവിധാനം ചെയ്യും. 'തലൈവർ 173' എന്ന് താത്കാലികമായി പേര് നൽകിയിരിക്കുന്ന ചിത്രം 2027 പൊങ്കൽ റിലീസായാണ് ആഗോള തലത്തിൽ പ്രദർശനത്തിനെത്തുക എന്നാണ് സൂചന.

ചിത്രം പ്രഖ്യാപിക്കപ്പെട്ടപ്പോൾ മുതൽ സംവിധായകനെച്ചൊല്ലി അഭ്യൂഹങ്ങൾ ഉയർന്നിരുന്നു. ലോകേഷ് കനകരാജ്,നെൽസൺ തുടങ്ങിയവരുടെ പേരുകളാണ് ആദ്യം ഉയർന്നുകേട്ടത്. പക്ഷേ ഒടുവിൽ സുന്ദർ സിയെ ആണ് സംവിധായകനായി പ്രഖ്യാപിച്ചത്. പക്ഷേ അദ്ദേഹം അപ്രതീക്ഷിതമായി പ്രോജക്ടിൽ നിന്ന് പിന്മാറി. അതോടെ ചിത്രത്തിന്റെ സംവിധായകൻ ആരാകും എന്ന ചോ​ദ്യം വീണ്ടും ഉയർന്നു. ധനുഷിന്റെ പേരാണ് ഏറ്റവും ഒടുവിൽ കേട്ടത്. പക്ഷേ ഔദ്യോ​ഗികപ്രഖ്യാപനത്തോടെ ഇതുസംബന്ധിച്ച അനിശ്ചിതത്വത്തിന് അവസാനമായിരിക്കുകയാണ്.

തെരി, മെർസൽ എന്നീ ചിത്രങ്ങളിൽ ആറ്റ്ലിയുടെ സംവിധാന സഹായി ആയിരുന്ന സിബി ചക്രവർത്തി, 2022 ൽ റിലീസ് ചെയ്ത 'ഡോൺ' എന്ന ശിവകാർത്തികേയൻ ചിത്രത്തിലൂടെയാണ് സ്വതന്ത്ര സംവിധായകനായി അരങ്ങേറ്റം കുറിച്ചത്. ബ്ലോക്ക്ബസ്റ്റർ ഹിറ്റായ ആ ചിത്രത്തിന് ശേഷം സിബി ഒരുക്കാൻ പോകുന്ന രണ്ടാമത്തെ ചിത്രമാണ് 'തലൈവർ 173'.

ആദ്യമായാണ് കമൽ ഹാസൻ നിർമിക്കുന്ന ചിത്രത്തിൽ രജനികാന്ത് നായകനായി എത്തുന്നത്. അനിരുദ്ധ് രവിചന്ദർ സംഗീതമൊരുക്കുന്ന ചിത്രത്തിന്റെ ടാഗ്‌ലൈൻ 'എവെരി ഫാമിലി ഹാസ് എ ഹീറോ' എന്നാണ്. നിലവിൽ നെൽസൺ ഒരുക്കുന്ന ജയിലർ 2 ൽ അഭിനയിക്കുന്ന രജനികാന്ത്, അതിന്റെ ചിത്രീകരണം പൂർത്തിയാക്കിയ ശേഷമായിരിക്കും 'തലൈവർ 173' ൽ ജോയിൻ ചെയ്യുക. തമിഴ് സിനിമയിലെ നാഴികക്കല്ലായി മാറിയേക്കാവുന്ന ഇതിന്റെ ചിത്രീകരണം ഈ വർഷം ആദ്യ പാദത്തിൽ തന്നെ ആരംഭിക്കും.

രാജ് കമൽ ഫിലിംസ് ഇന്റർനാഷനലിന്റെ ബാനറിൽ കമൽ ഹാസൻ നിർമ്മിക്കുന്ന റെഡ് ജയന്റ് മൂവീസ് ആണ് ചിത്രം പ്രദർശനത്തിന് എത്തിക്കുന്നത്. കമൽ ഹാസന്റെ ഉടമസ്ഥതയിലുള്ള രാജ് കമൽ ഫിലിംസ് ഇന്റർനാഷണൽ അടുത്തിടെ 44 വർഷങ്ങൾ പൂർത്തിയാക്കിയിരുന്നു. അതിന്റെ ആഘോഷങ്ങളുടെ ഭാ​ഗമായിക്കൂടിയായാണ് ഈ വമ്പൻ ചിത്രം പ്രഖ്യാപിച്ചിരിക്കുന്നത്. ആർ മഹേന്ദ്രനൊപ്പം ചേർന്നാണ് കമൽ ഹാസൻ ചിത്രം നിർമിക്കുന്നത്.

അഞ്ചു പതിറ്റാണ്ടുകളായി തുടരുന്ന രജനികാന്ത്- കമൽ ഹാസൻ സുഹൃദ് ബന്ധത്തിന്റെയും സാഹോദര്യത്തിന്റെയും നേർകാഴ്ചയായാണ് ചിത്രം ഒരുങ്ങുക. ചിത്രത്തെക്കുറിച്ചുള്ള കൂടുതൽ വിവരങ്ങൾ വൈകാതെ പുറത്തു വിടും. പിആർഒ- വൈശാഖ് സി വടക്കേവീട്, ജിനു അനിൽകുമാർ.