'നെൽസൺ അദ്ഭുതങ്ങൾ സൃഷ്ടിച്ചു, ജയിലർ 3ക്ക് ഇപ്പോൾ തന്നെ റെഡി': രമ്യ കൃഷ്ണൻ

രജനികാന്ത് - നെല്‍സണ്‍ കൂട്ടുകെട്ടില്‍ തിയേറ്ററുകളില്‍ എത്തിയ 'ജയിലര്‍ 2' വന്‍ വിജയത്തിലേക്ക് കുതിക്കുമ്പോള്‍, ചിത്രത്തെക്കുറിച്ചുള്ള ആവേശകരമായ പ്രതികരണവുമായി നടി രമ്യ കൃഷ്ണന്‍ രംഗത്ത്. ചിത്രത്തില്‍ രജനികാന്തിന്റെ നായികയായ 'വിജി പാണ്ഡ്യന്‍' എന്ന കഥാപാത്രത്തെ അവതരിപ്പിച്ച രമ്യ കൃഷ്ണന്‍, തിയേറ്ററുകളില്‍ ആരാധകര്‍ നല്‍കുന്ന പിന്തുണ കണ്ട് 'ജയിലര്‍ 3'ക്ക് ഇപ്പോള്‍ തന്നെ റെഡിയാണെന്നാണ് പ്രതികരിച്ചത്.

ആദ്യഭാഗത്തിന്റെ വിജയത്തെ എങ്ങനെ മറികടക്കുമെന്ന ആശങ്കയുണ്ടായിരുന്നുവെന്നും, എന്നാല്‍ സംവിധായകന്‍ നെല്‍സണ്‍ അദ്ഭുതങ്ങള്‍ സൃഷ്ടിച്ചിട്ടുണ്ടെന്നും താരം പറഞ്ഞു. ചിത്രത്തിലെ ആവേശകരമായ മുഹൂര്‍ത്തങ്ങള്‍ക്ക് തിയേറ്ററുകളില്‍ പ്രതീക്ഷിച്ചതിനേക്കാള്‍ മികച്ച പ്രതികരണമാണ് ലഭിക്കുന്നതെന്നും, രജനികാന്ത് ചിത്രത്തില്‍ തകര്‍പ്പന്‍ പ്രകടനമാണ് കാഴ്ചവെച്ചിരിക്കുന്നതെന്നും അവര്‍ കൂട്ടിച്ചേര്‍ത്തു.

സണ്‍ പിക്‌ചേഴ്‌സിന്റെ ബാനറില്‍ കലാനിധി മാരന്‍ നിര്‍മിച്ച ചിത്രത്തില്‍ രജനികാന്തിനും രമ്യ കൃഷ്ണനുമൊപ്പം മോഹന്‍ലാല്‍, ശിവരാജ്കുമാര്‍, എസ്.ജെ. സൂര്യ, വിദ്യാ ബാലന്‍, സുരാജ് വെഞ്ഞാറമൂട് തുടങ്ങി വന്‍ താരനിരയാണ് അണിനിരന്നിരിക്കുന്നത്. അനിരുദ്ധിന്റെ സംഗീതവും ചിത്രത്തിന് വലിയ രീതിയിലുള്ള ഹൈപ്പ് നല്‍കുന്നുണ്ട്. ആദ്യ ഷോ കഴിഞ്ഞതു മുതല്‍ മികച്ച പ്രതികരണങ്ങളോടെ ചിത്രം ബോക്‌സ് ഓഫീസില്‍ മുന്നേറുകയാണ്.