അപ്പോക്കലിപ്റ്റിക് ആക്ഷൻ ലോകം പരിചയപ്പെടുത്തി പാ. രഞ്ജിത്തിന്റെ ‘വേൾഡ് ഓഫ് വേട്ടുവം’

പ്രമുഖ സംവിധായകൻ പാ. രഞ്ജിത്ത് സംവിധാനം ചെയ്യുന്ന ‘വേട്ടുവം’ എന്ന പാൻ ഇന്ത്യൻ അപ്പോക്കലിപ്റ്റിക് ആക്ഷൻ ചിത്രത്തിന്റെ ലോകം പ്രേക്ഷകർക്ക് പരിചയപ്പെടുത്തുന്ന ‘വേൾഡ് ഓഫ് വേട്ടുവം’ വീഡിയോ പുറത്തിറങ്ങി. ലേൺ ആൻഡ് ടീച്ച് പ്രൊഡക്ഷൻ, നീലം പ്രൊഡക്ഷൻസ് എന്നീ ബാനറുകൾ സംയുക്തമായാണ് ചിത്രം നിർമിക്കുന്നത്. ചിത്രത്തിന്റെ ഫസ്റ്റ് ലുക്ക് ഇന്ന് വൈകുന്നേരം പുറത്തിറക്കും.

‘വേൾഡ് ഓഫ് വേട്ടുവം’ വീഡിയോ തമിഴിനൊപ്പം ഹിന്ദി, തെലുങ്ക്, മലയാളം, കന്നഡ ഭാഷകളിലും പുറത്തിറക്കിയിട്ടുണ്ട്. പാൻ ഇന്ത്യൻ തലത്തിൽ ചിത്രത്തിന്റെ ലോകം പ്രേക്ഷകരിലേക്ക് എത്തിക്കുന്നതിനായി വിവിധ ഭാഷകളിലെ പ്രമുഖ താരങ്ങളാണ് ചിത്രത്തിന് ശബ്ദം നൽകിയിരിക്കുന്നത്. ഹിന്ദി പതിപ്പിന് പങ്കജ് ത്രിപാഠി, തെലുങ്ക് പതിപ്പിന് റാണ ദഗ്ഗുബാട്ടി, മലയാളം പതിപ്പിന് സൗബിൻ ഷാഹിർ, കന്നഡ പതിപ്പിന് കിച്ച സുദീപ് എന്നിവരാണ് ശബ്ദം നൽകിയിരിക്കുന്നത്. തമിഴ് പതിപ്പിന് സംവിധായകൻ പാ. രഞ്ജിത്ത് തന്നെയാണ് ശബ്ദം നൽകിയത്.

അപ്പോക്കലിപ്റ്റിക് പശ്ചാത്തലത്തിൽ വമ്പൻ ആക്ഷൻ രംഗങ്ങളോടെ ഒരുക്കുന്ന ‘വേട്ടുവം’, വ്യത്യസ്ത വിഭാഗങ്ങൾക്കിടയിലെ ആധിപത്യത്തിനായുള്ള പോരാട്ടവും സംഘർഷങ്ങളും അതിൽ നിന്നുണ്ടാകുന്ന അപ്രതീക്ഷിത സംഭവവികാസങ്ങളുമാണ് പ്രധാനമായും അവതരിപ്പിക്കുന്നത്. വ്യത്യസ്തമായ ഒരു ലോകത്തിന്റെ ദൃശ്യാവിഷ്കാരം, ഗംഭീരമായ ദൃശ്യങ്ങൾ, ശക്തമായ ആക്ഷൻ രംഗങ്ങൾ എന്നിവ ചിത്രത്തിന്റെ പ്രധാന ആകർഷണങ്ങളാണ്.

ചിത്രത്തിലെ ആക്ഷൻ രംഗങ്ങൾ അടിമുറൈ, മാൽഖംബ് തുടങ്ങിയ പരമ്പരാഗത ആയോധനകലകളെ അടിസ്ഥാനമാക്കിയാണ് രൂപകല്പന ചെയ്തിരിക്കുന്നത്. ഇതിനായി ചിത്രത്തിലെ അഭിനേതാക്കൾ പ്രത്യേകമായി മാർഷൽ ആർട്സ് പരിശീലനം നേടിയിട്ടുണ്ട്. ആര്യ, ദിനേഷ്, ഷബീർ, ശോഭിത ധൂലിപാല, കലൈയരസൻ തുടങ്ങിയ പ്രമുഖ താരങ്ങൾ പ്രധാന വേഷങ്ങളിലെത്തുന്ന ചിത്രം, വിശാലമായ കഥാലോകവും ആവേശകരമായ ആക്ഷനും കൊമേഴ്സ്യൽ ഘടകങ്ങളും സമന്വയിപ്പിച്ചാണ് ഒരുക്കുന്നത്.

പ്രധാന അണിയറപ്രവർത്തകർ ഛായാഗ്രഹണം- രൂപേഷ് ഷാജി, എഡിറ്റിങ്- ആർ. കെ. സെൽവ,സംഗീതം- ജി. വി. പ്രകാശ് കുമാർ,കലാസംവിധാനം- എസ്. എസ്. മൂർത്തി ദിലീപ് സ്റ്റണ്ട് ഡയറക്ടർ- സുബ്ബരായൻ. ‘വേട്ടുവം’ തമിഴ്, തെലുങ്ക്, മലയാളം, കന്നഡ, ഹിന്ദി ഭാഷകളിൽ പാൻ ഇന്ത്യൻ ചിത്രമായി റിലീസ് ചെയ്യും.