

ഇന്ത്യൻ ക്രിക്കറ്റ് ഇതിഹാസവും ചെന്നൈ സൂപ്പർ കിങ്സിന്റെ മുൻ നായകനുമായ എം.എസ്. ധോനി അന്താരാഷ്ട്ര, ഐപിഎൽ കരിയർ അവസാനിപ്പിച്ച് വിരമിക്കൽ പ്രഖ്യാപിച്ചതിന് പിന്നാലെ, താരത്തിന് ആദരവുമായി തെന്നിന്ത്യൻ സിനിമാലോകവും രംഗത്ത്. തമിഴ് സിനിമാരംഗത്തെ പ്രമുഖ താരങ്ങളും അണിയറപ്രവർത്തകരുമാണ് ധോനിക്ക് വിടവാങ്ങൽ ആശംസകളുമായി എത്തിയത്.
നടൻ കാർത്തി, സംഗീതസംവിധായകൻ ജി.വി. പ്രകാശ് കുമാർ, സംവിധായകൻ വെങ്കട് പ്രഭു, ധനുഷ് തുടങ്ങി നിരവധി പ്രമുഖർ സോഷ്യൽ മീഡിയയിലൂടെ ധോനിയുമായുള്ള ഓർമകളും സ്നേഹവും പങ്കുവെച്ചു. 'കളിക്കളത്തിലും പുറത്തും നിങ്ങളുടെ വിനയവും ലാളിത്യവും ഒരു തലമുറയെ തന്നെ സ്വാധീനിച്ചിട്ടുണ്ട്. ഈ യാത്ര എവിടെയെത്തിയാലും നിങ്ങൾ എക്കാലവും ഞങ്ങളുടെ 'തല' തന്നെയായിരിക്കും' എന്നാണ് കാർത്തി കുറിച്ചത്.
ധോനിയുടെ കളിക്കളത്തിലെയും പുറത്തെയും മുഹൂർത്തങ്ങൾ കോർത്തിണക്കിയ ഒരു വീഡിയോ പങ്കുവെച്ചുകൊണ്ടാണ് സംഗീതസംവിധായകൻ ജി.വി. പ്രകാശ് കുമാർ ആശംസകൾ നേർന്നത്. ഒപ്പം തമിഴ് സിനിമാപ്രവർത്തകരായ വെങ്കട് പ്രഭു, ധനുഷ് തുടങ്ങിയവരും ക്രിക്കറ്റ് ലോകത്തിന് നൽകിയ എല്ലാത്തിനും ധോനിക്ക് നന്ദി അറിയിക്കുകയും അദ്ദേഹത്തിന്റെ വിരമിക്കൽ വാർത്തയോട് വൈകാരികമായി പ്രതികരിക്കുകയും ചെയ്തു. ചെന്നൈ സൂപ്പർ കിങ്സിനൊപ്പം മഞ്ഞ ജേഴ്സിയിൽ ധോനി തീർത്ത സമാനതകളില്ലാത്ത ഓർമകളെയും ആരാധകർ സ്നേഹത്തോടെ സ്മരിക്കുകയാണ്.