

ശിവകാർത്തികേയൻ നായകനാകുന്ന പുതിയ ചിത്രമായ 'സെയോനി'ൽ ഉലകനായകൻ കമൽഹാസൻ അതിഥി വേഷത്തിൽ എത്തിയേക്കുമെന്ന് റിപ്പോർട്ടുകൾ. ക്ലാസിക് ചിത്രമായ 'വിരുമാണ്ടി'യിലെ ലുക്കിൽ തന്നെ കമൽഹാസൻ പ്രത്യക്ഷപ്പെടുമെന്നാണ് കോളിവുഡിൽനിന്നുള്ള റിപ്പോർട്ട്.
കമൽഹാസന്റെ രാജ് കമൽ ഫിലിംസ് ഇന്റർനാഷണലിന്റെ ബാനറിലാണ് ചിത്രം നിർമിക്കുന്നത്. ശിവകുമാർ മുരുഗേശൻ സംവിധാനം ചെയ്യുന്ന ആക്ഷൻ ചിത്രത്തിൽ ഭാഗ്യശ്രീ ബോർസെയാണ് നായിക. മധുരയുടെ ഗ്രാമീണ പശ്ചാത്തലത്തിൽ ഒരുങ്ങുന്ന 'സെയോനി'ൽ ശിവകാർത്തികേയൻ മുൻ ആർമി ഉദ്യോഗസ്ഥനായാണ് വേഷമിടുന്നത്.
ചിത്രത്തിന്റെ പ്രാരംഭ ഘട്ടം മുതൽ തന്നെ കമൽഹാസന്റെ കൾട്ട് ചിത്രമായ 'വിരുമാണ്ടി'യുമായുള്ള സാദൃശ്യങ്ങളും ചർച്ചയായിരുന്നു. ഇതിന് പിന്നാലെയാണ് കമൽഹാസൻ തന്റെ ഐക്കോണിക് ലുക്കിൽ ചിത്രത്തിൽ കാമിയോ റോളിൽ എത്തുമെന്ന വാർത്തകൾ സിനിമാ ലോകത്ത് സജീവമായിരിക്കുന്നത്. എന്നാൽ ഇതുസംബന്ധിച്ച് ഉലകനായകനോ, അണിയറപ്രവർത്തകരോ പ്രതികരണമൊന്നും നടത്തിയിട്ടില്ല.