ആദ്യ വാരത്തില്‍ തന്നെ 250 കോടി കടന്ന് 'ജനനായകന്റെ' കുതിപ്പ്

തമിഴകത്തിന്റെ പ്രിയപ്പെട്ട സൂപ്പര്‍താരം വിജയ്‌യുടെ അവസാന ചിത്രമായ 'ജനനായകന്‍' ആദ്യ വാരത്തില്‍ തന്നെ ലോകമെമ്പാടുമായി 250 കോടി രൂപയുടെ ഗ്രോസ് കളക്ഷന്‍ സ്വന്തമാക്കി. എച്ച്. വിനോദ് സംവിധാനം ചെയ്ത ചിത്രം ജൂലായ് 23-നാണ് തിയേറ്ററുകളില്‍ എത്തിയത്. രാഷ്ട്രീയത്തിലേക്ക് സജീവമായി ഇറങ്ങുന്നതിന് മുമ്പുള്ള വിജയ്‌യുടെ അവസാന സിനിമ എന്ന നിലയില്‍ വലിയ പ്രതീക്ഷകളോടെയാണ് ചിത്രം പ്രേക്ഷകരിലേക്ക് എത്തിയത്.

ഇന്ത്യയിലും വിദേശ രാജ്യങ്ങളിലും മികച്ച കളക്ഷനാണ് ചിത്രം നേടുന്നത്. വിജയ്‌യുടെ സിനിമ ജീവിതത്തിലെ മികച്ച നിമിഷങ്ങളും മാസ് രംഗങ്ങളും മികച്ച സംഭാഷണങ്ങളുമാണ് ആരാധകരെ തിയേറ്ററുകളിലേക്ക് ആകര്‍ഷിക്കുന്നത്. കെവിഎന്‍ പ്രൊഡക്ഷന്‍സിന്റെ ബാനറില്‍ വെങ്കട്ട് കെ. നാരായണയാണ് ബിഗ് ബജറ്റ് ചിത്രം നിര്‍മിച്ചിരിക്കുന്നത്. പൂജ ഹെഗ്ഡേ നായികയായി എത്തുന്ന ചിത്രത്തില്‍ പ്രതിനായകനായി ബോബി ഡിയോള്‍ എത്തുന്നു. മമിത ബൈജു, ഗൗതം വാസുദേവ് മേനോന്‍, പ്രകാശ് രാജ്, നരേന്‍ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

ആദ്യ ആഴ്ച പിന്നിടുമ്പോഴും മികച്ച തിയേറ്റര്‍ പ്രതികരണം തുടരുന്നതിനാല്‍ വരും ദിവസങ്ങളില്‍ ചിത്രം കൂടുതല്‍ കളക്ഷന്‍ റെക്കോഡുകള്‍ ഭേദിക്കുമെന്ന പ്രതീക്ഷയിലാണ് അണിയറപ്രവര്‍ത്തകര്‍.