ഡൊറോത്തിയിലെ സ്വവർ​ഗലൈം​ഗികതയിൽ കലിതുള്ളി തമിഴകം;കാർത്തിക് സുബ്ബരാജിന് കടുത്തവിമർശനം

കാർത്തിക് സുബ്ബരാജിന്റെ ഏറ്റവും പുതിയ ചിത്രമായ ‘ഡൊറോത്തി’ തമിഴ് സിനിമയിൽ ഈ വർഷം ഏറ്റവും കൂടുതൽ ചർച്ച ചെയ്യപ്പെടുന്ന റിലീസുകളിലൊന്നായി മാറുകയാണ്. കീർത്തി സുരേഷ്, സനന്ത്, ഋഷികാന്ത് എന്നിവർ പ്രധാന വേഷങ്ങളിലെത്തുന്ന ചിത്രം സെപ്റ്റംബർ 25നാണ് തിയേറ്ററുകളിലെത്തിയത്. ടൊറന്റോ അന്താരാഷ്ട്ര ചലച്ചിത്രമേളയിലായിരുന്നു ചിത്രത്തിന്റെ പ്രീമിയർ. ഇളയരാജയാണ് ചിത്രത്തിന് സംഗീതം ഒരുക്കിയിരിക്കുന്നത്.

1990കളിലെ ജാതീയ സംഘർഷങ്ങളുടെ പശ്ചാത്തലത്തിലാണ് ‘ഡൊറോത്തി’യുടെ കഥ പറയുന്നത്. അടുത്ത സുഹൃത്തുക്കളായ കാർത്തിയുടെയും സുബ്ബുവിന്റെയും ജീവിതത്തിലേക്ക് കീർത്തി സുരേഷ് അവതരിപ്പിക്കുന്ന ഡൊറോത്തി എത്തുന്നതോടെയാണ് കഥയിൽ വഴിത്തിരിവുണ്ടാകുന്നത്. എന്നാൽ പ്രമേയത്തിനപ്പുറം ചിത്രത്തിലെ എൽജിബിടിക്യു നിലപാടുകളാണ് ഇപ്പോൾ വലിയ ചർച്ചകൾക്ക് വഴിവച്ചിരിക്കുന്നത്.

രണ്ട് പുരുഷ കഥാപാത്രങ്ങൾ തമ്മിലുള്ള അടുപ്പവും ചുംബന രംഗങ്ങളും ഉൾപ്പെടെയുള്ള ചില രംഗങ്ങൾ സോഷ്യൽ മീഡിയയിൽ വലിയ പ്രതികരണങ്ങൾക്ക് ഇടയാക്കിയിട്ടുണ്ട്. തമിഴ് പ്രേക്ഷകരിലെ ഒരു വിഭാഗം ചിത്രത്തിനെതിരെ രംഗത്തെത്തി. തമിഴ് സംസ്കാരത്തെ മോശമായി അവതരിപ്പിക്കുകയാണ് കാർത്തിക് സുബ്ബരാജ് എന്ന തരത്തിലുള്ള വിമർശനങ്ങളും ഉയർന്നിട്ടുണ്ട്.

അതേസമയം, സെൻസിറ്റീവായ ഒരു വിഷയത്തെ സത്യസന്ധമായി അവതരിപ്പിച്ചതിന് ‘ഡൊറോത്തി’യെ പ്രശംസിച്ച് നിരവധി പേരും രംഗത്തെത്തിയിട്ടുണ്ട്. ചിത്രത്തിന്റെ സമീപനത്തെ പിന്തുണയ്ക്കുന്നവരും ഏറെയാണ്. മുഖ്യധാരാ സിനിമയ്ക്ക് ഉൾക്കൊള്ളാനാകാത്ത തരത്തിൽ ഉള്ളടക്കം വളരെ ബോൾഡാണെന്നും ചിലർ അഭിപ്രായപ്പെടുന്നു.

ഇതിനിടെ ചിത്രത്തിന്റെ തെലുങ്ക് റിലീസിനെക്കുറിച്ചും കാർത്തിക് സുബ്ബരാജ് പ്രതികരിച്ചു. ചിത്രം തെലുങ്കിൽ റിലീസ് ചെയ്യണോ എന്ന് അദ്ദേഹം തെലുങ്ക് പ്രേക്ഷകരോട് ചോദിച്ചിരുന്നു. വിവാ​ദങ്ങൾക്കിടയിലും മികച്ച പ്രതികരണമാണ് കാർത്തിക് സുബ്ബരാജിന്റെ ചോദ്യത്തിന് ലഭിച്ചത്. ഇനി ചിത്രം തെലുങ്കിൽ എപ്പോൾ റിലീസ് ചെയ്യുമെന്നതാണ് അറിയാനുള്ളത്.