'കാണാനും കേള്‍ക്കാനും ആഗ്രഹിക്കുന്നു'- മൃണാലിനോട് ധനുഷ്

ബോളിവുഡ് താരം മൃണാൽ താക്കൂറിന്റെ ഒരു ഇൻ​സ്റ്റ​ഗ്രാം പോസ്റ്റിന് ധനുഷിന്റെ മറുപടിയാണ് ഇപ്പോൾ കോളിവുഡിലെ ചൂടേറിയ ചർച്ച. സിദ്ധാന്ത് ചതുര്‍വേദിക്കൊപ്പമുള്ള, തന്റെ 'ദോ ദിവാനേ ഷെഹര്‍ മേം' എന്ന ചിത്രത്തിന്റെ വിശേഷങ്ങള്‍ മൃണാല്‍ കഴിഞ്ഞദിവസം പ്രേക്ഷകരെ അറിയിച്ചിരുന്നു. അനുരാഗ് സൈകിയ ഒരുക്കിയ ചിത്രത്തിന്റെ തീം മ്യൂസിക് ഉള്‍ക്കൊള്ളുന്ന ചെറിയ ടീസര്‍ നടി പങ്കിടുകയും ചെയ്തു. ആരാധകരെ ആവേശത്തിലാക്കിയ പോസ്റ്റിന് ധനുഷ് പങ്കുവച്ച കുറിപ്പാണ് ശ്രദ്ധയാകര്‍ഷിച്ചത്.

'കാണാനും കേള്‍ക്കാനും ആഗ്രഹിക്കുന്നു' എന്നാണ് ധനുഷ് എഴുതിയത്. ധനുഷിന്റെ പ്രതികരണത്തിന് ഹൃദയത്തിന്റെയും സൂര്യകാന്തിയുടെയും ഇമോജികളുമാണ് മൃണാല്‍ മറുപടിയായി നല്‍കിയത്. താരങ്ങളുടെ പരസ്പരമുള്ള സന്ദേശത്തിന്റെ സ്‌ക്രീന്‍ഷോട്ട് സോഷ്യല്‍ മീഡിയയില്‍ പെട്ടെന്ന് വൈറലായി. 'കൂട്ടുകാരേ, ധനുഷ് മൃണാളിന്റെ ഇന്‍സ്റ്റഗ്രാം പോസ്റ്റില്‍ കമന്റ് ചെയ്തു' എന്ന് എക്‌സിൽ ഒരാൾ ആവേശത്തോടെ പോസ്റ്റ് ചെയ്തു. അതേസമയം 'തലൈവ' എന്നും 'തലൈവി' എന്നുമുള്ള അഭിസംബോധനയായിരുന്നു മറ്റൊരു ആരാധകന്റേത്.

ഇതോടെ ധനുഷും മൃണാലും ഡേറ്റിങ്ങിലെന്നാണ് തമിഴ് സിനിമാമാധ്യമങ്ങൾ റിപ്പോര്‍ട്ട് ചെയ്യുന്നത്. ഇരുവരുടെയും ബന്ധത്തെക്കുറിച്ചുള്ള ഗോസിപ്പുകള്‍ വീണ്ടും ഊര്‍ജിതമായി പ്രചരിക്കുകയും ചെയ്യുന്നു. ഓഗസ്റ്റില്‍ ഒരു സിനിമാ പ്രീമിയറിനിടെ ആരംഭിച്ച സൗഹൃദം ഇപ്പോള്‍ സോഷ്യല്‍ മീഡിയയില്‍ പുതിയൊരു ചര്‍ച്ചയായി മാറി.

ഈ വര്‍ഷം ആദ്യം സണ്‍ ഓഫ് സര്‍ദാര്‍ 2 പ്രീമിയറില്‍ ഇരുവരും ഊഷ്മളമായ ആലിംഗനം പങ്കുവച്ചതാണ് ഡേറ്റിങ് കിംവദന്തികള്‍ക്ക് ആക്കം കൂട്ടിയത്. രജനികാന്തിന്റെ മകൾ ഐശ്വര്യയുമായി പിരിഞ്ഞതിനുശേഷം ധനുഷിനെ ചുറ്റിപ്പറ്റിയുള്ള ഗോസിപ്പുകള്‍ വ്യാപകമായി പ്രചരിക്കുന്നുണ്ട്.