ആരെങ്കിലും അറിഞ്ഞോ...?'മോഹിനി' ഒടിടിയിൽ 'ആട്ടം' തുടങ്ങി

സൈജു കുറുപ്പ് നായകനായ കോമഡി ക്രൈം ത്രില്ലര്‍ 'ഭരതനാട്യം 2: മോഹിനിയാട്ടം' ഒടിടി പ്ലാറ്റ്ഫോമിലെത്തി. 'ഭരതനാട്യം' എന്ന ചിത്രത്തിന്റെ രണ്ടാംഭാ​ഗമായി ഏപ്രില്‍ 10-ന് തിയേറ്ററുകളില്‍ റിലീസ് ചെയ്ത ചിത്രം, പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്‌സിലാണ് അപ്രതീക്ഷിതമായി സ്ട്രീമിങ് ആരംഭിച്ചിരിക്കുന്നത്.

കൃഷ്ണദാസ് മുരളി സംവിധാനം ചെയ്ത ചിത്രം സൈജു കുറുപ്പിന്റെ ശശിധരന്‍ നായരുടെ കുടുംബം നേരിടുന്ന പുതിയ പ്രതിസന്ധികളെയും തുടര്‍ന്നുള്ള സംഭവവികാസങ്ങളെയും കേന്ദ്രീകരിച്ചാണ് ഒരുക്കിയിരിക്കുന്നത്. സൈജു കുറുപ്പിനൊപ്പം സുരാജ് വെഞ്ഞാറമൂട്, വിനയ് ഫോര്‍ട്ട്, ജഗദീഷ് എന്നിവരും പ്രധാന വേഷങ്ങളില്‍ എത്തുന്നു. സുരാജ് അവതരിപ്പിക്കുന്ന ഗോവിന്ദരാജ എന്ന കഥാപാത്രത്തിന്റെ കടന്നുവരവും തുടർന്നുണ്ടാകുന്ന സംഘര്‍ഷങ്ങളും ഹാസ്യത്തിന്റെ അകമ്പടിയോടെയാണ് സിനിമയില്‍ അവതരിപ്പിച്ചിരിക്കുന്നത്.

തിയേറ്ററുകളില്‍ മികച്ച നിരൂപക പ്രശംസ നേടിയ ചിത്രത്തില്‍ സൈജു കുറുപ്പിന്റെ പ്രകടനവും കൃഷ്ണദാസ് മുരളിയുടെ തിരക്കഥയുമാണ് പ്രധാന ആകര്‍ഷണമായി വിലയിരുത്തപ്പെടുന്നത്.