സ്റ്റിക്ക് മൂവ് ലൈക്ക് എ കിങ്...'കിങ് മൂവ്സു'മായി ഡെഫ് ജാം ഇന്ത്യ

കേരളത്തിൽ നിന്നുള്ള റാപ്പറും ഗാനരചയിതാവുമായ സ്റ്റിക്കിന്റെ പുതിയ ഗാനം 'കിങ് മൂവ്സ്' ഡെഫ് ജാം ഇന്ത്യ പുറത്തിറക്കി. സ്റ്റിക്കിന്റെ സംഗീതയാത്രയിലെ പുതിയൊരു തുടക്കം കൂടിയാണ് ഈ ഗാനം.

മൂർച്ചയുള്ള വരികളും കൃത്യമായ വാക്കുകളും വേറിട്ട കാഴ്ചപ്പാടുമാണ് സ്റ്റിക്കിനെ ശ്രദ്ധേയനാക്കുന്നത്. ഇന്ത്യയിൽ വളർന്നുവരുന്ന ഹിപ്-ഹോപ്പ് രംഗത്ത് സ്വന്തമായൊരു ഇടം അദ്ദേഹം ഇതിനകം ഉറപ്പിച്ചുകഴിഞ്ഞു. മലയാളത്തിൽ ആഴത്തിൽ വേരൂന്നിയ ആ സംഗീതത്തിൽ ചുറ്റുപാടുകളുടെയും സംസ്കാരത്തിന്റെയും സ്വാധീനം വ്യക്തമായി കാണാം. മലയാളത്തിനും ഇംഗ്ലീഷിനുമിടയിൽ അനായാസമായി ഒഴുകുന്ന വരികളിൽ, താൻ വളർന്ന നാടിനോടുള്ള ശക്തമായ ബന്ധവും പ്രകടമാണ്.

കഴിഞ്ഞ കുറച്ചു വർഷങ്ങളായി ഹിപ്-ഹോപ്പ് രംഗത്തെ നിരവധി കലാകാരന്മാരുമായി സ്റ്റിക്ക് സഹകരിച്ചിട്ടുണ്ട്. അനോണിമസ്, ഡിവോണിയൻ, നോയ്ഡൻസി, ഭരതൻ എന്നിവർക്കൊപ്പമുള്ള പ്രവർത്തനങ്ങളും അതിൽ ഉൾപ്പെടുന്നു. എഴുത്തിനും തനതായ ശൈലിക്കുമാണ് അദ്ദേഹം തന്റെ സംഗീതത്തിൽ എന്നും പ്രാധാന്യം നൽകുന്നത്. കേരളത്തിന്റെ മണ്ണിൽ ഉറച്ചുനിന്നുകൊണ്ട്, ഇന്ത്യയിലെ വലിയ ഹിപ്-ഹോപ്പ് ലോകത്തിലേക്കും അദ്ദേഹം തന്റെ സംഭാവനകൾ നൽകുന്നു.

'കിങ് മൂവ്സി'ലൂടെ ഡെഫ് ജാം ഇന്ത്യയിലെ തന്റെ യാത്രയ്ക്ക് തുടക്കമിടുകയാണ് സ്റ്റിക്ക്. ഒരു കലാകാരനെന്ന നിലയിൽ ഇന്ന് താൻ എവിടെ നിൽക്കുന്നു എന്നാണ് ഗാനം പറയുന്നത്. ആത്മവിശ്വാസവും സ്വന്തം വ്യക്തിത്വത്തിലുള്ള ഉറച്ച നിലപാടുമാണ് ഇതിന്റെ കാതൽ. തന്റെ വേരുകളെയും വ്യക്തിത്വത്തെയും ഇതുവരെ നേടിയെടുത്ത ഇടത്തെയും അഭിമാനത്തോടെ സ്വീകരിക്കുകയാണ് സ്റ്റിക്ക് ഈ ഗാനത്തിലൂടെ.

'കിങ് മൂവ്സ്' ഇന്ന് ഞാൻ ഒരു ആർട്ടിസ്റ്റ് എന്ന നിലയിൽ എവിടെ നിൽക്കുന്നു എന്ന് കൃത്യമായി കാണിക്കുന്ന പാട്ടാണ്. ആരുടെയും അംഗീകാരത്തിനു വേണ്ടിയല്ല ഞാൻ പാടുന്നത്. ഞാൻ ഇങ്ങനെയാകണം എന്ന് മറ്റുള്ളവർ വിചാരിക്കുന്നതിനനുസരിച്ച് സംഗീതം ചെയ്യാനും ഞാൻ ശ്രമിക്കാറില്ല. ഇത് എന്റെ എഴുത്താണ്, എന്റെ വേരുകളാണ്, ഇവിടെ എത്താൻ ഞാൻ എടുത്ത എല്ലാ പരിശ്രമവുമാണ്. ഡെഫ് ജാം ഇന്ത്യയ്ക്കൊപ്പമുള്ള യാത്ര ഈ പാട്ടിലൂടെ തുടങ്ങുന്നത് അതിനെ കൂടുതൽ സ്പെഷ്യലാക്കുന്നു. ഈ പുതിയ അധ്യായം എന്നെ എവിടെ എത്തിക്കുമെന്ന് കാണാൻ ഞാൻ കാത്തിരിക്കുകയാണ്'- സ്റ്റിക്ക് പറയുന്നു.

മലയാളം ഹിപ്-ഹോപ്പിന് കൂടുതൽ കേൾവിക്കാരെ ലഭിച്ചുകൊണ്ടിരിക്കുന്ന ഈ സമയത്ത്, പ്രാദേശിക ഭാഷയെയും സംസ്കാരത്തെയും സ്വന്തം ജീവിതാനുഭവങ്ങളെയും ഇന്ത്യൻ ഹിപ്-ഹോപ്പിലേക്ക് കൊണ്ടുവരുന്ന പുതുതലമുറ കലാകാരന്മാരിൽ ഒരാളാണ് സ്റ്റിക്ക്. ഡെഫ് ജാം ഇന്ത്യയ്ക്കൊപ്പമുള്ള ആദ്യ റിലീസ് ഈ യാത്രയിലെ സുപ്രധാനമായ അടുത്ത ചുവടാണ്. വരാനിരിക്കുന്നതിന്റെ തുടക്കം മാത്രമാണ് 'കിങ് മൂവ്സ്'.