ചേന്ദമം​ഗലത്തെ നെയ്ത്തുജീവിതം തുന്നി റിമയുടെ മാമാങ്കം;ബാ​ഗ്​ദാദിൽ ചരിത്രനേട്ടം

പ്രശസ്ത അഭിനേത്രിയും നർത്തകിയുമായ റിമ കല്ലിങ്കലിന്റെ മാമാങ്കം ഡാൻസ് കമ്പനി ബാ​ഗ്​ദാദ് ഇന്റർനാഷണൽ തിയേറ്റർ ഫെസ്റ്റിവലിൽ ബെസ്റ്റ് പ്ലേ അവാർഡ് നേടി. ഇനി ഒമാനിലെ അൽ ഡാൻ ഫെസ്റ്റിവലിൽ ഇവർ ഇന്ത്യയെ പ്രതിനിധീകരിക്കും. ബാഗ്ദാദ് ഇന്റർനാഷണൽ തിയേറ്റർ ഫെസ്റ്റിവലിൽ പ്രകടനം നടത്താനെത്തിയ ആദ്യ ഇന്ത്യൻ സംഘമായി മാമാങ്കം ഡാൻസ് കമ്പനി ചരിത്രം കുറിക്കുകയും ചെയ്തു.

ബാഗ്ദാദ് ഇന്റർനാഷണൽ തിയേറ്റർ ഫെസ്റ്റിവലിൽ ഇന്ത്യയെ പ്രതിനിധീകരിച്ച മാമാങ്കം ഡാൻസ് കമ്പനി, അവരുടെ ഏറെ പ്രശംസനേടിയ നൃത്താവിഷ്‌കാരമായ 'നെയ്ത്തെ' യിലൂടെയാണ് ലഭിച്ച ബെസ്റ്റ് പ്ലേ അവാർഡ് നേടിയത്.

ചേന്ദമംഗലത്തെ കൈത്തറി തൊഴിലാളികളുടെയും അവരുടെ ജീവിതവും ഫിസിക്കൽ തിയേറ്ററിന്റെ നൃത്തഭാഷയിലൂടെ പുനർസൃഷ്ടിക്കുകയാണ് 'നെയ്ത്തെ'യിൽ. 2018 ലെ പ്രളയം മൂലം നഷ്ടപ്പെട്ട നെയ്‌ത്തും, നെയ്ത്തുകാരുടെ സ്വപ്നങ്ങളുമെല്ലാമാണ് നൃത്താവിഷ്‌കരത്തിൻ്റെ പശ്ചാത്തലം.

പ്രേക്ഷകരെയും നിരൂപകരെയും ഏറെ ആകർഷിച്ച 'നെയ്ത്തെ' സ്റ്റാൻഡിങ് ഒവേഷൻ നേടിയാണ് സമാപിച്ചത്. പലരും ഈ അവതരണത്തെ ഭാഷാതടസ്സങ്ങളെ മറികടന്ന് മനുഷ്യാനുഭവങ്ങളെ ഉൾക്കൊള്ളുന്ന കല എന്ന് വിശേഷിപ്പിച്ചു. 'കേരളത്തിലെ നെയ്ത്തുകാരുടെ കലയേയും ധൈര്യത്തേയും നൃത്തഭാഷയിലൂടെ ആഗോള വേദിയിലേക്കെത്തിക്കാനാണ് ശ്രമിച്ചതെ'ന്ന് മാമാങ്കം ആർട്ടിസ്റ്റിക് ഡയറക്ടർ റിമ കല്ലിങ്കൽ പറഞ്ഞു.

ഈ വിജയത്തിന് പിന്നാലെ മാമാങ്കത്തിന് 2025 നവംബറിൽ ഒമാനിൽ നടക്കുന്ന പ്രശസ്തമായ അൽ ഡാൻ ഫെസ്റ്റിവലിൽ ഇന്ത്യയെ പ്രതിനിധീകരിക്കാൻ ക്ഷണം ലഭിച്ചു. 'നെയ്‌ത്തെ'യുടെ സംവിധാനം റിമ കല്ലിങ്കലാണ്. അശ്വിൻ ജോർജാണ് നൃത്തസംവിധാനം. ഗ്രീഷ്മാ നാരായൺ, അലോഷി അമൽ, പൂജിത കട്ടിക്കാട്, അനുശ്രീ പി.എസ്, സന്തോഷ് മാധവ്, അഞ്ജു ശ്യാമപ്രസാദ്, അമൃതശ്രീ ഓമനക്കുട്ടൻ, ഭവ്യ ഓമനക്കുട്ടൻ, ഗോപിക മഞ്ജുഷ എന്നിവരുടെ പ്രകടനമാണ് 'നെയ്ത്തെ'യിൽ പ്രധാനമായുള്ളത്.

ദൃശ്യഭാവന രൂപപ്പെടുത്തിയിരിക്കുന്നത് ആർട്ട് ഡയറക്ടർ അനിൽ ഇൻസ്പയർ ആണ്. ലൈറ്റ് ഡിസൈനർ ശ്രീകാന്ത് ക്യാമിയോ ആണ് ലൈറ്റിങ്. ലയണൽ ലെഷോയ് ആണ് ശബ്ദരൂപകല്പന ചെയ്തിരിക്കുന്നത്. ടീം മാനേജർ- ഗ്രീഷ്മ ബാബു, ഫോട്ടോഗ്രാഫർ- ജൈസൺ മാഡനി.

റിമ കല്ലിങ്കൽ 2014-ൽ സ്ഥാപിച്ച 'മാമാങ്കം' ഇന്ന് കേരളത്തിലെ മുൻനിര സമകാലിക ഫിസിക്കൽ തിയേറ്റർ-ഡാൻസ് സംഘങ്ങളിൽ ഒന്നാണ്. കേരളത്തിന്റെ തനത് ശാസ്ത്രീയ, നാടൻ, ആയോധന കലാപാരമ്പര്യങ്ങളെ അടിസ്ഥാനമാക്കി, ആധുനിക ലോക പ്രവണതകളോട് പ്രതികരിക്കുന്ന പ്രത്യേക നൃത്തഭാഷയാണ് മാമാങ്കത്തിലൂടെ ലക്ഷ്യമിടുന്നത്.